“Ma Jọ Ẹkwotọ Mai Ruiruo Ẹsibuobu No!”
1 Kọ who roro no ẹdẹjọ inọ a jọ ẹkwotọ ra ruiruo ẹsibuobu no fikiere ahwo nọ a wọhọ igodẹ a gbẹ riẹ hẹ? Ẹsejọhọ who roro no inọ: ‘Mẹ riẹ epanọ ahwo na a te kuyo. Fikieme ma jẹ ruabọhọ ezihe bru ahwo nọ a wo isiuru hu?’ Uzẹme o rọ inọ a rẹ jọ ekwotọ buobu ruiruo ẹsikpobi. Ghele na, ma re wo eriwo ọliọliọ kpahe onana, orọnikọ ọthọthọ họ. Fikieme o jẹ rọ ere? Muẹrohọ ẹjiroro ene nọ a kẹ evaọ obotọ na.
2 A Kuyo kẹ Elẹ Mai No: Jesu ọ ta nọ: “Ivuẹvu na i ghine bu, rekọ iruiruo e rẹ kakao; fikiere wha lẹ Olori ivuẹvu na re o vi iruiruo kpo obọ ivuẹvu riẹ.” (Luk 10:2) Evaọ ikpe buobu nọ e vrẹ ma yare obufihọ efa mi Jihova no. Evaọ eria buobu, ma wo iruiruo efa nọ ma gwọlọ no, yọ ma bi he ru ẹkwotọ na re ẹsibuobu viere. Kọ uzẹme na inọ Jihova ọ kuyo kẹ elẹ mai no o gbẹ lẹliẹ omai ghọghọ?
3 Ithihakọ E rẹ Mọ Emamọ Ubi: Makọ evaọ ẹkwotọ nọ a re jo ruiruo ẹsikpobi dede, ahwo a be j’owọ kẹ ovuẹ Uvie na yọ a bi wo eriariẹ uzẹme na. Fikiere, ma rẹ ruabọhọ ezihe kẹse kẹse avọ irẹro eduku ahwo udu oruọzewọ efa. (Aiz. 6:8-11) Wọhọ epanọ ilele ọsosuọ Jesu a ru, ‘nya kẹse kẹse’ bru ahwo nọ e rọ ẹkwotọ nọ a ghale k’owhẹ, daoma kpare isiuru rai fihọ Uvie Ọghẹnẹ.—Mat. 10:6, 7.
4 Evaọ Portugal ikoko buobu i re ru ẹkwotọ rai re k’oka k’oka, rekọ a gbe bi duku ahwo nọ e wọhọ igodẹ. Oniọvo-ọmọtẹ jọ o wo eriwo ọliọliọ. Ọ ta nọ: “Taure me te ti kpohọ usiuwoma ota k’ohiohiẹ k’ohiohiẹ, mẹ rẹ lẹ se Jihova re o fiobọhọ k’omẹ duku ohwo jọ nọ o wo isiuru kpahe ewuhrẹ Ebaibol na.” Ẹdẹjọ o te ru ọruẹrẹfihotọ uwuhrẹ kugbe ahwo nọ a bi ruiruo evaọ oria nọ a re jo ru eto. Rekọ, uwhremu na, omọvo họ ohwo nọ ọ romavia kẹ uwuhrẹ na. Ohwo ọyena ọ ta nọ: “Ahwo nọ a kiọkọ na a wo isiuru hu, rekọ me wo isiuru.” Oware wọhọ amara ọvo o te muọ ẹkẹ iwuhrẹ Ebaibol ivẹ riẹ họ eruo. U kri hi ọ tẹ họ-ame, uwhremu na ọ tẹ ruọ iruo ọkobaro na!
5 Iruo Na E Be Nyaharo: A bi whowho emamọ usi na, wọhọ epanọ Jesu ọ ta nọ o te jọ na. (Mat. 24:14) Makọ evaọ eria nọ ahwo a jọ ‘gwọlọ gaviezọ k’omai hi,’ ma be rehọ iruẹru usiuwoma ota na rọ kẹ ae ọjọriẹ. Ma rẹro nọ ejọ e te gaviezọ họ hayo tubẹ wọso uzẹme na dede. Ghele na, a rẹ vẹvẹ ahwo otiọye na unu ziezi kpahe ẹdhoguo Jihova nọ ọ be tha na.—Izik. 2:4, 5; 3:7, 8, 19.
6 Ma Ti Ru Ei Reno Ho: Orọnọ mai ma rẹ jiroro okenọ ma rẹ rọ d’obọ iruo usiuwoma ota na ji hi. Jihova ọ riẹ uzedhe okenọ u ti ro kuhọ. Ọ riẹ ahwo nọ e rrọ ẹkwotọ mai nọ e te j’owọ kẹ emamọ usi na. Nẹnẹ, ahwo jọ a rẹ ta nọ a wo isiuru hu, rekọ inwene ilogbo evaọ izuazọ rai—iruo nọ e va rai abọ, ẹyao ọgaga, uwhu ohwo nọ a you—e sae lẹliẹ ae j’owọ evaọ oke ofa. Fikiọ oziẹ-emu hayo fikinọ a wo uvẹ re a gaviezọ họ, ahwo buobu a ri ghine yo ovuẹ nọ ma bi whowho na ziezi hi. Iweze ewhẹwhẹtiẹ ẹwẹwariẹ o sai ru ai muẹrohọ jẹ gaviezọ.
7 Enọ e kpako no kẹle na je wo uviuwou obọ rai no a bi roro kpahe uzuazọ gaga yọ a be nọ enọ nọ Ẹme Ọghẹnẹ ọvo ọ rẹ sae kuyo rai. Uvovo aye jọ nọ ọ rọ oniọmọ o zizie Isẹri ivẹ ziọ uwou riẹ jẹ ta nọ: “Nọ mẹ jọ ọmaha, me wo otoriẹ oware nọ o soriẹ hẹ nọ oni mẹ ọ jẹ hai ro le Isẹri na, ọ vẹ ta kẹ ae nnọ o wo isiuru hu, nọ o rọnọ a gwọlọ t’ẹme kpahe Ebaibol na ọvo. Me ru ọtamuo inọ evaọ okenọ mẹ tẹ kpako no, rọo no, je wo uwou obọ mẹ no, mẹ te ta kẹ Isẹri Jihova re a nyaze re a ru Ebaibol na vẹ k’omẹ.” Oyena họ oware nọ o ru, yọ o were Isẹri nọ i weze bru ei na.
8 Kọ Whọ Sai Wo Ona Viere? Ẹsejọhọ o sae nwane jọ nọ ahwo nọ ma bi weze bru na họ enọ i re ru ei jọ bẹbẹ ẹsikpobi re ma jọ ẹkwotọ na ruiruo kẹse kẹse he. Ẹsejọ obọ mai u re no ze. Kọ ma rẹ rehọ ẹjiroro ọthọthọ muhọ? Oyena o rẹ sai kpomahọ uruemu mai yọ ẹsejọhọ edo uvo mai gbe oghẹrẹ nọ ovao mai o rrọ. Dhesẹ emamọ ẹzi gbe ovao owhẹwhẹtiẹ. Dawo edhere-emuhọ ọkpokpọ. Nwene ẹme-emuhọ ra, jẹ daoma ru ei woma viere. Ẹsejọhọ whọ sai nwene onọ emuhọ ra hayo fi ikereakere efa ba ẹmeọta na. Nọ inievo efa kpahe oware nọ a ruẹ nọ o be kẹ obokparọ evaọ usiuwoma ota evaọ ẹkwotọ na. Lele iwhowho-uvie gbe ekobaro sa-sa ruiruo evaọ usiuwoma ota, je muẹrohọ oware nọ o be lẹliẹ odibọgba rai kparobọ.
9 Iruo usiuwoma ota Uvie na i wo ọjẹrehọ gbe oghale Jihova, yọ abọ-owo mai evaọ eva riẹ u re dhesẹ uyoyou mai rọkẹ e gbe erivẹ mai. (Mat. 22:37-39) Fikiere j’oma ru iruo mai te urere, ababọ eriosehọ evaọ usiuwoma ota evaọ ẹkwotọ na n’oke ruọ oke.