Kọ Who Wo Ẹkwotọ Usiuwoma Ota Obọra?

1. Eme họ ẹkwotọ usiuwoma ota obọ ohwo?

¹ Ẹkwotọ usiuwoma ota obọ ohwo yọ onọ a ghale kẹ owhẹ. O rẹ sae jọ oria nọ o kẹle owhẹ oma nọ whọ rẹ sae nyate lọlọhọ, nọ whẹ ọvo hayo whẹ avọ owhowho-uvie ọfa a sae jọ ta usiuwoma. Dede nọ o rẹ kẹ erere re a nya lele ọruẹrẹfihotọ nọ ukoko u wo kẹ isẹri-ise ogbotu nọ o tẹ lọhọ, ẹkwotọ usiuwoma ota obọra nọ whọ rẹ jọ ruiruo evaọ oke ofa o rẹ sai fi obọ họ kẹ owhẹ ta usiuwoma ziezi, maero evaọ ikoko nọ i wo ekwotọ usiuwoma ota ilogbo.—Iruẹru 10:42.

2. Irere jọ vẹ i re no ẹkwotọ usiuwoma ota obọ-ohwo nọ ma re wo ze?

² Irere nọ E Riẹ: Ahwo jọ a ruẹ irere buobu no ẹkwoma usiuwoma nọ a be hae ta evaọ oke-eriosehọ uvo hayo nọ a tẹ nwani ku iruo họ no evaọ ẹkwotọ usiuwoma ota nọ a rọ kẹ ae nọ o kẹle oria iruo rai. Amọfa a be hai wo omaweromẹ orọ usiuwoma nọ a rẹ ta kugbe wọhọ uviuwou evaọ okegbe rai oware wọhọ auwa ọvo taure Obe Uwuhrẹ Ukoko u te ti muhọ. O wha riẹ ze nọ izihebro gbe ebe-iwuhrẹ Ebaibol nọ a wo i gbe ro thabọ no ai hi, nọ u bru araha ugho gbe oke kpotọ je ru epanọ a rẹ rọ nyate ahwo na oma lọhọ. Fikinọ ẹkwotọ usiuwoma ota obọ ohwo nọ a re wo u re fi obọ họ kẹ ohwo rehọ umutho oke ru eware buobu, o sai ru nọ ahwo jọ a je ru ọkobaro obufihọ n’oke t’oke hayo tube fi obe họ kẹ iruo ọkobaro oke-kpobi na. Fibae, nọ ma tẹ be jọ ẹkwotọ usiuwoma ota obọmai ta usiuwoma ẹsikpobi, o rẹ lẹliẹ ahwo ẹkwotọ na riẹ omai ziezi, je ru nọ a je fi eva họ omai, yọ onana o rẹ sai fi obọ họ kẹ omai kpọ ẹmeọta mai rri eware nọ e rrọ ọdawẹ kẹ ae, rọ ere ru nọ ewoma o je no odibọgba mai ze ziezi.

3. Eme ọkobaro jọ nọ o mi ẹkwotọ usiuwoma ota oboriẹ ọ ta?

³ Ọkobaro jọ nọ ọsẹro ọnyawariẹ ọ tudu họ awọ nọ o mi ẹkwotọ usiuwoma ota oboriẹ ọ ta nọ: “Mẹ jẹ ohrẹ na rehọ, u kri hi mẹ tẹ te riẹ ahwo ẹkwotọ mẹ na jẹ jọ wọhọ ogbẹnyusu kẹ ae. Me nwene oke usiuwoma ota mẹ fihọ oke nọ u kiehọ ae oma. Onana o wha riẹ ze nọ izihebro mẹ nọ e jọ 35 vẹre i te ti bu vrẹ 80 evaọ amara ọvo, me te ti wo ebe-iwuhrẹ Ebaibol ihrẹ.”

4. Ẹvẹ whọ sae rọ yare ẹkwotọ usiuwoma ota obọra jẹ jariẹ ruiruo?

⁴ Epanọ Whọ Sai ro Wo Ẹkwotọ Obọra: Whọ tẹ gwọlọ yare ẹkwotọ usiuwoma ota obọra, ta kẹ odibo ẹkwotọ usiuwoma ota na. Whọ sai zizie owhowho-uvie ọfa nọ o re lele owhẹ ruiruo, whọ vẹ jẹ hai kere eria nọ who jo di ahwo họ uwou hu họ obe. Whọ rẹ daoma re whọ ta ẹkwotọ na re u te kri evaọ emera ene. Otẹrọnọ whọ te sai ru ei re eva emera ene na ha, whọ sae ta kẹ ọsẹro Uwuhrẹ Obe Ukoko ra hayo amọfa re a fi obọ họ. Nọ emera ene na i te re no, whọ sai si obọ no ẹkwotọ na hayo wariẹ yare re whọ gbẹ jariẹ ta usiuwoma. Rekọ, u fo ho re who kru ẹkwotọ ọvona rifihọ, whọ sai siobọnoi re amọfa a sae rehọ iẹe re. Otẹrọnọ whọ rrọ ukoko nọ ẹkwotọ ọ jọ rro tere he, yọ o lọhọ re who wo ẹkwotọ obọra ha, whọ sae ta kẹ ọsẹro uwuhrẹ obe ukoko ra re ọ jọ ẹkwotọ utu rai kẹ owhẹ amabọ jọ.

5. Re ma sai ru iruo usiuwoma ota nọ a kẹ omai na gba, eme o gwọlọ?

⁵ Iruo nọ a kẹ omai re ma ta usiuwoma na yọ iruo ilogbo. (Mat. 24:14) O gwọlọ emamọ ọruẹrẹfihotọ. Fikiere, usiuwoma ota evaọ ẹkwotọ obọ ohwo kugbe orọ otu o sai fi obọ họ kẹ omai ta usiuwoma na kẹ ahwo te epanọ o rẹ sae lọhọ te kpobi.