Nọ Ma Gbe Diọ Ahwo họ Uwou Ho
1. Ẹbẹbe vẹ ma be nyaku ẹsikpobi nọ ma tẹ rrọ usiuwoma n’uwou ruọ uwou?
1 O be jọ bẹbẹ gaga enẹna re a diọ ahwo họ uwou evaọ eria jọ. ‘Oke obẹbẹ’ nana nọ ma rrọ na o be gba ibuobu họ nọ a bi ro ru iruo ehwa buobu re a sai wo utho nọ a ro yere uzuazọ. (2 Tim. 3:1) Ejọ a rẹ jọ uwou hu fikinọ a nyae dẹ eware hayo a kpohọ erozaha eriosehọ. Ẹvẹ ma sae rọ rehọ usiuwoma na nyate ahwo otiọye na oma?
2. Ẹvẹ ma sae rọ ruẹ nọ ma zihe bru ahwo nọ ma di họ uwou hu?
2 Wo Emamọ Okerefihotọ: Owojẹ ọsosuọ họ, kere iwou nọ who jo diọ ahwo họ ha fihotọ. Onana o mae roja otẹrọnọ wha rẹ jọ ẹkwotọ rai ta usiuwoma kẹse kẹse. Kọ whọ be hai kere odẹ iyẹrẹ na, inọmba ẹkwotọ na, odẹ ra gbe ideti na? Whọ rẹ sae siọ eria jọ ba evaọ ẹwẹ-obe na nọ who re kere eware efa fihọ nọ whẹ hayo owhowho-uvie ọfa o te zihe bru ahwo nọ who di họ uwou hu na.
3. Idhere jọ vẹ a jiroro rai kẹ omai nọ ma sae rọ nyate ahwo nọ ma dihọ uwou hu oma?
3 Nya eva Oghẹrẹ Oke Ofa: Ẹsejọhọ ahwo jọ nọ a jọ uwou evaọ uvo ho a sae jọ uwou evaọ owọwọ hayo urere-oka. Whọ sai nwene omaa ra re who zihe evaọ oke nọ who re ro di ahwo otiọye họ uwou? (1 Kọr. 10:24) O gbẹ lọhọ ere he, whọ sae rehọ obe nọ who kere eria nọ who jo di ahwo họ uwou hu na kẹ owhowho-uvie nọ ọ rẹ sae nya eva oghẹrẹ oke ofa. Hayo, whọ sai kere ileta se ahwo nọ who dihọ uwou hu. O sae were iwhowho-uvie nọ oma rai o ga te epanọ a be sae rọ ta usiuwoma nuwou ruọ uwou ẹsikpobi hi eva re a fiobọhọ kẹ owhẹ evaọ onana.
4. Oriruo vẹ o dhesẹ oware nọ u ro wuzou re ma zihe bru ahwo nọ ma dihọ uwou hu?
4 Ma wo oriruo jọ nọ u dhesẹ oware nọ u ro wuzou re ma daoma zihe bru ahwo nọ ma dihọ uwou hu. Ikpe esa soso iwhowho-uvie a je dhe uwou jọ ẹnyẹnya rekọ a je di ohwo na họ uwou hu, uwhremuna a te ti di ei họ. Kpakiyọ aye nọ ọ be rria uwou na o bi rẹro anwọ oke yena kpobi inọ Isẹri Jihova a nyaze re a wariẹ muọ obe-uwuhrẹ Ebaibol nọ a je wuhrẹ kugbei vẹre taure ọ tẹ te kwa ziọ oria yena.
5. Okevẹ ma rẹ rọ tanọ ma ru ẹkwotọ reno?
5 Ru Ẹkwotọ na Re: Okevẹ ma rẹ rọ tanọ ma ru ẹkwotọ reno? Oke na họ, nọ ma tẹ dawo utho oma mai kpobi rọ ruẹ nọ ma lele ohwo jọ tẹme evaọ uwou kpobi no. O rẹ sai kiehọ re ma nyase omobe-ovẹvẹ hayo emagazini nọ o kri no ba iwou nọ ma di ahwo họ họ, maero evaọ ekwotọ nọ ma rẹ jọ ta usiuwoma oke kpobi hi. Kẹsena a vẹ vuẹ odibo ẹkwotọ na ababọ okioraha re o kere iei fihotọ.
6. Fikieme ma jẹ daoma re ma rehọ emamọ usi na te ahwo kpobi nọ e rrọ ẹkwotọ mai oma?
6 Ma gwọlọ fiobọhọ kẹ utho ahwo kpobi nọ ma sai fiobọhọ kẹ re a wuhrẹ kpahe Jihova je se odẹ riẹ re a siwi ai. (Rom 10:13, 14) Onana o kẹre te ahwo nọ a be jọ iwou ho nọ ma tẹ rrọ usiuwoma n’uwou ruọ uwou. Wọhọ Pọl ukọ na, jọ o jọ isiuru ra ‘re who se isẹri usiuwoma aruoriwo Ọghẹnẹ’ na.—Iruẹru 20:24.