Kọ Ukoko Rai U Wo Ẹkwotọ Ologbo?
1 No ikpewho Judia rite iwhre ọ Galili, Jesu o se isẹri ọwhọ nya ẹkwotọ ologbo Izrẹl anwae na soso duwu. (Mak 1:38, 39; Luk 23:5) Ma rẹ rehọ emamọ usi na nyate ahwo buobu te epanọ o rẹ sae lọhọ te kpobi. (Mak 13:10) Dede na, o rẹ sae jọ use-abọ. Fikieme?
2 Ikoko buobu evaọ Nigeria i wo ẹkwotọ nọ abọ ologbo riẹ ọ rrọ iwhre, nọ i thabọ no ohwohwo gaga. Kọ eme ma rẹ sai ru ro fiobọhọ kẹ ahwo nọ a rrọ ekwotọ ilogbo itieye na re a wuhrẹ uzẹme na kpahe Jihova, Jesu, gbe Uvie na?
3 M’Omaa Ziezi: O gwọlọ re ọsẹro usiuwoma ota na gbe ọsẹro ẹkwotọ na a kuobọgbe kpọ omodawọ ukoko na re a ru iruo buobu. Ẹsejọ a rẹ sae ruẹrẹ Ẹdẹ-Ọmaha obọdẹ jọ fihọ nọ ibuobu e rẹ sae jọ raha okpẹdẹ soso fihọ iruo na. Okenọ a te bi ru ekwotọ ithethabọ, wha m’omaa re wha raha oke buobu evaọ usiuwoma ota otẹrọnọ o lọhọ, wha vẹ wha emu uvo lele oma. Wha sai ru ewuhrẹ kẹ usiuwoma ota vẹrẹ vi epaọ anwẹdẹ re o k’uvẹ oke nọ wha rẹ rọ nya kpohọ obọ ẹkwotọ na hayo wha ve ru ewuhrẹ kẹ usiuwoma ota na kẹle oria nọ wha be te jọ ta usiuwoma na. Wha ru utu ahwo usiuwoma ota na kakao re ahwo na kpobi a sae ruẹ iwou nọ i re te ai ru ziezi. Wha ru ọruẹrẹfihotọ re wha kpohọ usiuwoma ota evaọ eria iwhre evaọ ezi nọ ovao ehru gbe edhere e rẹ jọ sasasa. Ru ọruẹrẹfihotọ re utu ahwo usiuwoma ota jọ o sae nyate iwou kpobi nọ e rrọ uzedhe ẹkwotọ na.
4 Wha ruẹ nnọ wha wha ebe buobu lele oma. Otẹrọnọ ẹkwotọ na yọ ọnọ a re ru kẹse kẹse he, o rẹ sai kiehọ re a nya siọ omobe-ovẹvẹ jọ hayo emagazini anwae jọ ba kẹ ahwo nọ a dihọ uwou hu.
5 Wha Ruiruo-Kugbe: Ẹkwotọ ologbo nọ a re ru o rẹ gwọlọ obufihọ ohwo kpobi nọ ọ rrọ ukoko na. Okenọ o tẹ gwọlọ nọ a rẹ dhẹ omoto oke krẹkri, enọ e ruọ omoto na a rẹ ghale araha epẹtro na. A re dhesẹ areghẹ evaọ okenọ wha di ahwo nọ a wo isiuru ẹmeọta họ uwou. Jọ ẹgwọlọ nọ a rẹ rọ nyate ahwo kpobi nọ a rrọ ẹkwotọ na oma ọ hae j’owhẹ eva ẹsikpobi. Whọ tẹ gwọlọ lele ohwo nọ o wo isiuru t’ẹme krẹkri, kọ whọ sai ru ọruẹrẹfihotọ kẹ ozihebro evaọ okenọ wha te ru ẹkwotọ nọ a kẹ owhai na reno?
6 Ru ugogo ọruẹrẹfihotọ re who zihe bru enọ i wo isiuru kpobi. U te no adrẹse na no, daoma re who mi inọmba ifonu enọ i wo isiuru na re whọ sai te ae oma jẹ rehọ ifonu se-isẹri haro kẹ ae. Otẹrọnọ idhere hayo iwou na i wo inọmba ha, romatotọ drọ udhesẹ-oria na hayo kere oghẹrẹ nọ whọ sae rọ nyate enọ i wo isiuru na oma evaọ ozihebro.
7 Ẹvẹ uvẹ-ọghọ nọ ma wo o rro te re ma wha uthubro Jesu na haro inọ: “Kẹwho kẹwho hayo k’iwhre k’iwhre nọ wha rẹ te rua, wha guọlọ ohwo eva riẹ nọ o te i”! (Mat. 10:11) Jihova ọ te ghinẹ ghale omodawọ rai nọ wha be rehọ oma rai kẹ n’evaze evaọ iruo nana nọ e rẹ mai kẹ erere na!