Ẹzi Oma-Fialọ Via O rẹ Wha Eghale Ze
1. Ẹvẹ Jihova ọ rọ ghale Devidi gbe Nehemaya rọkẹ ẹzi oma ofialọ via rai?
1 Nọ Goliat ọ jẹ poviẹ egbaẹmo Izrẹl, ọgbaẹmo ọvo jọ ọ hẹ sae fialọ oma via re ọ họre iẹe. Rekọ ọgbaẹmo ọvo ọ fialoma via ha, ukpoye kọ othuru-igodẹ ọmaha gheghe, nọ o wuhrẹ kpahe ẹmo ho. (1 Sam. 17:32) Okenọ ahwo Ju nọ i zihe no igbo ze a gbabọkẹ ọwariẹbọ igbẹhẹ Jerusalẹm, ọwegho ovie Pasia ọye ọ fialoma via nyasiọ ọkwa ọghọ riẹ evaọ uwou-ovie na ba kpohọ Jerusalẹm re ọ sae rẹrote iruo ebabọ na. (Neh. 2:5) Jihova ọ ghale Devidi gbe Nehemaya rọkẹ oma nọ a fialọ via.—1 Sam. 17:45, 50; Neh. 6:15, 16.
2. Fikieme Ileleikristi a je dhesẹ ẹzi oma fialọ via?
2 Nẹnẹ, ẹzi ọ oma nọ a rẹ fialọ via o rrọ akpọ na ha. Evaọ “edẹ urere” nana ahwo a bi yeri uzuazọ nọ a bi jo wo uvẹ hẹ, yọ ibuobu a “you oma-obọrai.” (2 Tim. 3:1, 2) O lọhọ re ohwo ọ rehọ oma kpobi kẹ ilale isiuru omobọ riẹ te epanọ o re ro gbabọkẹ uvẹ nọ o re ro fiobọhọ kẹ ahwo nọ a gwọlọ obufihọ. Rekọ, wọhọ Ileleikristi, o rrọ isiuru mai re ma rehọ aro kele Jesu, ọnọ ọ rọ unevaze fiobọhọ kẹ amọfa. (Jọn 5:5-9; 13:12-15; 1 Pita 2:21) Ẹvẹ ma sai ro dhesẹ ẹzi oma fialọ via, kọ eghale vẹ i re noi ze te omai?
3. Ẹvẹ ẹzi oma fialọ via u re ro fi obọ họ evaọ iwuhrẹ ikoko?
3 Fiki Inievo Mai: Ma sae kẹ amọfa ‘okẹ abọ-ẹzi’ ẹkwoma uyo nọ ma rẹ kẹ evaọ abọ iwuhrẹ ukoko nọ e gwọlọ ọkpahefihọ ogbotu. (Rom 1:11) Iyo nọ ma rẹ kẹ eva iwuhrẹ e rẹ kẹ Jihova orro, ru nọ uzẹme na u re ro te omai udu ziezi, jẹ lẹliẹ omai reawere iwuhrẹ na. (Ol. 26:12) Ma sae jẹ fialọ oma via re ma ru ẹme re ma ru ẹme omọfa evaọ Isukulu Odibọgba Esuo Ọghẹnẹ na nọ o tẹ gwọlọ ere. Onana u ti fi obọ họ kẹ omai wo ẹnyaharo evaọ ona uwuhrẹ mai.
4. Idhere efa jọ vẹ ma sai ro dhesẹ ẹzi oma fialọ via?
4 Inievo a sai dhesẹ ẹzi oma fialọ via ẹkwoma omodawọ re a te kẹ ewha-iruo nọ a rẹ rẹrote evaọ ukoko na. (Aiz. 32:2; 1 Tim. 3:1) Ohwo kpobi ọ sai fiobọhọ nọ ikokohọ e jẹ nya kpatiẹ ẹkwoma oma fialọ via re a ruiruo evaọ eko-iruo sa-sa na. Nọ ma tẹ fialọ oma via re ma lele ọsẹro ọnyawariẹ kpohọ usiuwoma hayo there emu rọ ghọ e, onana o rẹ wha “oma osasọ” ze. (Rom 1:12) Nọ ma tẹ rehọ ugogo edhere jọ ro fi obọ họ kẹ emọ nọ i wo esẹ hẹ, eyae-uku, enọ e be mọ, ini nọ i wo emọ boba gbe amọfa evaọ ukoko na, ma ti wo oghọghọ gbe aruoriwo Jihova.—Itẹ 19:17; Iruẹru 20:35.
5. Iruo vẹ nọ i kpomahọ Egwa Uvie e gwọlọ ahwo nọ a rẹ rehọ unevaze fialọ oma via?
5 Edhere ọfa nọ ma rẹ rọ rehọ oke gbe ẹgba mai ro fi obọ họ họ, ma re wobọ evaọ erufo gbe ẹruorote Ọgwa Uvie na. Fibae, fikinọ ahwo buobu a bi dede uzẹme na rehọ, ẹgwọlọ ọ riẹ gaga kẹ Egwa Uvie ekpokpọ gbe ahwo nọ a rẹ fialọ oma via kẹ ebabọ rai. Ọzae jọ avọ aye riẹ a fialoma via re a fiobọhọ kẹ Ogbẹgwae Ebabọ Ubrotọ oborai dede nọ a riẹ kpahe iruo ebabọ họ. Nọ oke o be nya na, a te wuhrẹ ọzae na avọ aye riẹ kpahe ebabọ, enẹna a bi fiobọhọ wọ eblọko họ. Aye na ọ ta nọ: “Iruo nọ ma bi lele amọfa ru o wha riẹ ze nọ ma ro wo usu okpekpe kugbe amọfa no. Ma te ku iruo okpẹdẹ na họ no, oma o rẹ rrọ omai rekọ yọ ma rrọ jajaja evaọ abọ-ẹzi.
6. Fikieme iruo usiuwoma ota na e jẹ rrọ iruo unevaze nọ e mai wuzou nọ ma re ru?
6 Ẹkwoma Usiuwoma Ota: Iruo unevaze nọ e mai wuzou nọ ma sai ru nẹnẹ họ iruo usiuwoma ota Uvie na. Nọ ma bi fi obọ họ kẹ ahwo wo otoriẹ ohrẹ Ebaibol je fi ei họ iruo na, a be rọ ere duku uvi ẹjiroro ọrọ uzuazọ je wo ẹgba nọ a re ro siobọno iruemu iyoma. A re wuhrẹ kpahe ẹruore ọghaghae nọ ọ rrọ Ebaibol na kẹ obaro na. Ẹkwoma Ebaibol na nọ ma bi ro wuhrẹ ahwo, ma bi ru iruo unevaze nọ e rẹ wha irere ebẹdẹ bẹdẹ se amọfa. (Jọn 17:3; 1 Tim. 4:16) Ẹsejọhọ uyero mai o sae kẹ omai uvẹ nọ ma re ro wobọ ziezi evaọ iruo nana ẹkwoma ọkobaro obufihọ hayo ọrọ okekpobi, ẹkwa kpohọ eria nọ ẹgwọlọ kẹ iwhowho-uvie ọ mae jọ rro, hayo ewuhrẹ ẹvẹrẹ ọfa.
7. Fikieme oma fialọ via o jẹ r’oja gaga nẹnẹ?
7 Devidi Ovie na ọ ruẹaro inọ okenọ Mesaya na o ti mu isuẹsu riẹ họ, ahwo Ọghẹnẹ a te fialọ oma rai via hayo rehọ oma rai kẹ wọhọ ‘okẹ nọ u no eva ze.’ (Ol. 110:3) Nọ Jihova o bi ru ivuẹvu urere erọ abọ-ẹzi na dhẹ kpatakpata na, iruo e da otọ fia nọ ma rẹ fialọ oma via kẹ. (Aiz. 60:22) Kọ whọ ta nọ “Mẹ na! Vi omẹ” no? (Aiz. 6:8) Evaọ uzẹme, nọ ma te bi dhesẹ ẹzi oma fialọ via, ma re ru eva were Jihova, je wo osaohwa ulogbo.