Ebabọ Egwa-Uvie—Abọjọ nọ O Wuzou Eva Egagọ Mai
1 Eva etoke ikpe isoi nọ e vrẹ na, Egwa Uvie nọ a jọ ẹkwotọ Nigeria bọ i bu te 1,205. Iruo nọ Ẹko-Iruiruo Ebabọ Ọgwa Uvie gbe amọfa nọ a fiobọhọ kẹ ae a ru e da omai ẹro fia. Dede nọ ma sai ru iruo buobu gba no, iruo efa buobu e riẹ nọ ma re gbe ru evaọ ebabọ Egwa Uvie. Ẹvẹ mai kpobi ma sae rọ tha abọ nana nọ ọ jọ egagọ mai kẹ Jihova wuzou gaga na uke?—Evia. 7:15.
2 Jọ U No Owhẹ Eva Ze: Otẹrọnọ whẹ yọ owhowho-uvie nọ o wo emamọ edikihẹ evaọ ukoko na, yọ whọ kpako te ikpe 17 hayo vrẹ ere no, ma zizie owhẹ re whọ fialoma ze re who lele Ẹko-Iruiruo Ebabọ Ọgwa Uvie na ruiruo nọ a tẹ be jọ Ọgwa Uvie rai hayo enọ e kẹle owhai ruiruo. Dedenọ u wo uvumọ obe nọ a re kere re who te ruiruo kugbe ai hi, ahwo nọ Ogbẹgwae Iruo Ukoko na u kuenu kẹ ọvo họ enọ a rẹ sai zizie re a w’obọ evaọ iruo ebabọ Egwa Uvie nọ e kẹle owhai na. (Ol. 110:3) Ohwo kpobi nọ ọ be fialoma via ọ rẹ jọ ohwo nọ u re no eva ze re o ruiruo, o ve je wo ẹzi ọrọwokugbe. (Ol. 133:1) Whọ gbẹ maki wo ona ebabọ họ, whọ rẹ sae zọhọ fihọ ẹnyaharo ebabọ ziezi ghele. A sai je tube wuhrẹ owhẹ eware nọ whọ sae rọ jọ iruo na fiobọhọ ziezi evaọ obaro.
3 Otẹrọnọ whọ sae fialoma via ha, whọ rẹ sai dhesẹ uketha ra ẹkwoma uduotahawọ nọ whọ rẹ kẹ amọfa nọ a rẹ sae jọ ọruẹrẹfihotọ na w’obọ. Whọ rẹ sai fiobọhọ ru ẹme ahwo ukoko ra nọ a bi ruiruo evaọ ebabọ Ọgwa Uvie. Ẹkwoma omaa nọ a rẹ ma họ aro, ekpako ukoko e rẹ sai mu ẹro họ inọ a rọ ẹro te ukoko na ziezi nọ ejọ i te kpohọ iruo ebabọ Egwa Uvie. Ababọ avro, eva e rẹ were Jihova nọ ma tẹ rọ okugbe ruiruo rọ wha isiuru Uvie haro.—Hib. 13:16.
4 Hae Kẹ Uduotahawọ: Re a bọ eria egagọ o rẹ rehọ oke gbe iruo egaga. Fikiere, u re vevẹ inọ ahwo nọ a be jọ iruo ebabọ fiobọhọ oke-kpobi wọhọ Idibo Ebabọ Ọgwa Uvie a te hae jọ ukoko rai eva etoke jọ họ. Jọ o hae vẹrẹ omai obọ re ma jiri ahwo nọ a bi w’obọ eva ebabọ jẹ tuduhọ ae awọ fiki omarodheidhe rai nọ a be rọ rehọ ẹro te “iruo enana” nọ e r’oja gaga na.—Iruẹru 6:3; Rom 14:19.
5 Jọ Owowa: Usiuwoma ota kpahe Uvie Ọghẹnẹ họ ugogo iruo egagọ mai. (Mak 13:10) Fiki onana nọ a wo họ iroro, Ẹko-Iruiruo Ebabọ Ọgwa Uvie a be daoma ma omaa ebabọ re ahwo nọ a fialoma via bi lele ai ruiruo na a gbe mu no ukoko rai hi. Epọvo na re, ahwo nọ a fialoma via bi fiobọhọ evaọ iruo ebabọ a rẹ daoma jọ owowa evaọ ẹruorote ewha-iruo ibuobu rai. Wọhọ oriruo, a rẹ kuvẹ hẹ re iruo ebabọ e whaha ae ekpohọ ikokohọ. Ere ọvona re, otẹrọnọ iweze ọsẹro okogho i kie fihọ etoke nọ ukoko jọ o be rọ bọ Ọgwa Uvie, iwhowho-uvie na e rẹ daoma re a rọ oke jọ kpohọ usiuwoma ota, je w’obọ evaọ iruo ebabọ na.
6 Pọl ukọ na o dhesẹ ahwo ukoko na wọhọ enọ e be rọ okugbe ọvo ruiruo rọ “kẹ oma na oro gbe ekokohọ eva uyoyou.” (Ẹf. 4:16) Uyoyou nọ ma wo kẹ Jihova gbe egagọ uzẹme o be w’omai ruiruo kugbe re ma sai whowho emamọ usi na, jẹ tha ebabọ Egwa Uvie uke.
[Study Questions]
1. Eme a jọ ebabọ Egwa Uvie rugba no, kọ ẹgwọlọ vẹ ọ gbẹ rrọ otọ?
2. Ẹvẹ ma sae rọ tha iruo ebabọ Egwa Uvie uke ziezi?
3. Idhere efa vẹ ma sai ro dhesẹ nọ ma be tha ọruẹrẹfihotọ nana uke?
4. Ẹvẹ ma sae rọ kẹ ahwo nọ a bi ru iruo ebabọ Egwa Uvie na ọwhọ?
5. Ẹvẹ ahwo nọ a fialoma via bi fiobọhọ evaọ ebabọ a sae rọ jọ owowa?
6. Eme ma re rugba nọ ahwo ukoko na kpobi a te ruiruo kugbe rọ wha egagọ uzẹme haro?