Ebabọ Ọgwa Uvie Evaọ Nigeria

¹ Nọ ma te riwi ẹkwotọ akpọ na soso, o rẹ sasa udu re a ruẹ ẹvi obọdẹ nọ ọ be jọ evaọ ukoko otọakpọ Jihova! Evaọ ukpe n’ukpe na evaọ Nigeria ọvo, ikoko ekpokpọ 172 e roma via, yọ ikoko 3,348 i kuomagbe enọ e riẹ vẹre wariẹ akpọ na họ. Avọ ẹvi ọnana kpobi, u re gbunu hu inọ ẹgwọlọ ọ rrọ kẹ Egwa Uvie.

² Inievo emezae gbe emetẹ buobu a dhesẹ ọwhọ gbe uketha ulogbo kẹ ukoko Jihova no ẹkwoma oke gbe ekwakwa rai nọ a siobọno evaọ ebabọ Ọgwa Uvie. Egbẹgwae Ebabọ Ubrotọ 25 nọ i bi ruiruo evaọ Nigeria e be rẹro te ẹgwọlọ ọrọ ọvuọvuọ ole ikoko 160 riẹ evaọ ibrotọ rai. A mu ẹruọsa ebabọ gbe aruẹrẹ h’obọ egbẹgwae ubrotọ na, yọ iruo rai e rọ ghaghae. A bi ru ọruẹrẹfihọ ebabọ Ọgwa Uvie na kpobi gba ẹkwoma ẹzi ọ ẹkẹ gbe omarọkẹ Oleleikristi—abọdekọ ẹzi nọ ọ d’akpọ na fia.—2 Tim. 3:2, 4.

³ Re u fiobọhọ bọ emamọ Egwa Uvie, Society ọ rehọ obe ona emamọ Ọgwa Uvie kẹ egbẹgwae ubrotọ. Onana u ti fiobọhọ rẹro te araha oke gbe ekwakwa ọ iruiruo unevaze na. U ti je fiobọhọ evaọ ẹruọsa araha ọrọ Ẹkpa-Ugho Ọgwa Uvie Society na. Ekpako e sai muhọ ẹsalọ evaọ ona ebabọ enana. Ewo obe onana u ti fiobọhọ bọ Egwa Uvie nọ i thoma jẹ rọ ziezi. Nọ ikoko e be roma kpotọ evaọ ebabọ emamọ Egwa Uvie na, ma rẹro nọ owha-iruo ewena, enọ e rẹ drọ eplane uwou, egba-eriariẹ ebabọ, gbe iruiruo ona efa nọ i bi fiobọhọ avọ unevaze u ti vori gaga.

⁴ O Gwọlọ Vi Edhere Ọvo nọ A Sai ro Ru Ei: Ẹjiroro kpahe sọ a rẹ yarọ hayo bọ Egwa Uvie o re no obọ ikoko na ze. A rẹ jẹ wha owha araha ebabọ gbe ẹruorote kpobi. Re a siọ ogbẹraha igho ba, ikoko buobu e daoma no re a ru abọ ologbo iruo na ẹkwoma obufihọ ahwo unevaze nọ i wo ona.

⁵ A rẹ sae rehọ ibriki bọ egwa na, eblọko isimeti, ọviẹẹ, ire, hayo ekwakwa efa, wọhọ epanọ araha na ọ rọ jegbe onọ o kẹle otọ je bu evaọ oria na. Uyoma kẹhẹ, Egwa Uvie buobu nọ ikoko jọ i muhọ e riotọ te ikpe buobu no. Ahwo jọ nọ a wo isiuru a rehọ uyero hayo oria nọ a bọ Egwa Uvie jọ fihọ rọ f’oma siọ iwuhrẹ ba ẹnya no. Ababọ avro, nọ a tẹ bọ Egwa Uvie nọ i fo je kiehọ, u re fiobọhọ ru epanọ iruo na i w’uzou te vevẹ kẹ ahwo okegbe na.

⁶ Oware jọ nọ o rẹ whae ze nọ Ọgwa Uvie o jẹ yagha evaọ ikpe buobu na o sae jọ fikinọ uwou na o rro hrọ hayo ona riẹ o ghare te epanọ a gbẹ sae bọe reno ho fiki ababọ ugho. Ibuobu e rẹ ‘keria tao re a kele igho rai hi’ re a riẹ sọ iwhowho-uvie na a te sae hwa araha ẹbọre uwou na. (Luk 14:28) Efa i muhọ avọ umutho ugho nọ o r’obọ gheghe fikiere a te serihọ evaọ ikpe buobu taure a tẹ te nyaharo. Otẹrọnọ ere o via k’owhai, iviena wha nya bru Ogbẹgwae Ebabọ Ubrotọ oria rai. A ta kẹ ai no re a t’ẹrovi obọ nọ a re fihọ re a kuọ Egwa Uvie buobu nọ e yagha na họ re a sae rehọ ae mudhe.

⁷ Ebabọ-ovẹrẹ na yọ edhere ọfa nọ a re ro muọ Ọgwa Uvie họ je ku ei họ evaọ oke okpẹkpẹe. Jọ ikoko nọ e be j’iroro ebabọ ọgwa uvie ọkpokpọ a roro kpahe edhere ebabọ-ovẹrẹ na. U ti mu ibuobu ẹro no ho inọ a rẹ sai muọ ebabọ Ọgwa Uvie họ je ku ei họ kẹ eromudhe evaọ amara ọvo. Dede na, a dhesẹ onana via no evaọ eria ivẹ sa-sa evaọ Nigeria (Ewossa, Edo State, gbe Dopemu, Lagos State), yọ inievo na a ghọghọ nọ a rue riẹ. Eva e te were omai re ma ruẹ Egwa Uvie nọ a bọ evaọ edhere otiọna.

⁸ Evaọ Lagos, ebabọ Ọgwa Uvie jọ i muhọ ikpe 25 nọ i kpemu. Kẹle na ikoko nọ e be jariẹ ru iwuhrẹ a tẹ j’iroro nọ a re ku ei họ re a rehọ iẹ mudhe. Nọ a bi ru ei na, a te w’iroro nọ u ti woma re a bọ ọgwa ọfa re o whaha ẹkeke ọgwa nọ ọ riẹ vẹre na. Nọ ahwo nọ a te jọ ọgwa ọkpokpọ na ru iwuhrẹ a rọ usu ikoko nọ e jẹ bọ ọnọ ọ riẹ vẹre na, a tẹ j’iroro nọ a rẹ bọ egwa ivẹ na reno jẹ rehọ ai mudhe ususu. Ẹkwoma edhere ebabọ-ovẹrẹ na, ebabọ ọgwa ọkpokpọ na o tẹ rehọ edẹ 15 ọvo, a tẹ rehọ egwa ivẹ na mudhe evaọ ẹdọvo na.

⁹ Nọ oke nọ o rẹ rehọ no emuhọ rite ekuhọ ebabọ-ovẹrẹ o rọ kpẹkpẹe gaga na, ma k’ohrẹ nnọ ukoko kpobi nọ o gwọlọ rehọ edhere ọnana bọ a rẹ kaki wo ebe uzi otọ na, omaa ọ esọviọ, gbe emamọ eplane uwou. Oghẹrẹ nọ o rẹ jọ kpobi, u fo re wha wo enuoku kẹ ebabọ taure wha te muhọ ẹbọ. Dede na, oria nọ oyena o gbẹ lọhọ họ, wha re mi uvẹ fihotọ evaọ okenọ wha te muọ ebabọ na họ yọ wha vẹ dhẹ ohrẹ riẹ avọ osegboja. U w’uzou re wha vi ebe otọ rai se Society kẹ ẹkiẹ-vuhumu. Ma re siobọno ugho ẹkwoma ọruẹrẹfihọ Ẹkpa-Ugho Ọgwa Uvie Society na otẹrọnọ ukoko na o gwọlọ obufihọ utioye na. Jọ ukoko kpobi nọ o gwọlọ bọ ẹkwoma edhere ebabọ ovẹrẹ na a kake t’ẹme ọ ebabọ na kugbe Ogbẹgwae Ebabọ Ubrotọ oria rai tao. A re kere obe ayare se Society.

¹⁰ Ahwo Unevaze A rẹ Tha Iruo Obọdẹ Uke: Society ọ v’avọ uyere rọkẹ ahwo unevaze buobu nọ i bi fiobọhọ kẹ ebabọ Ọgwa Uvie. O rẹ ghinẹ kẹ evawere re a ruẹ ahwo unevaze buobu nọ e roma rai kẹ evaọ k’abọ k’abọ ebabọ Ọgwa Uvie. Obokparọ ọruẹrẹfihotọ ọnana o lọhọ fiki ẹzi unevaze, ọghoruo, gbe ẹmeoyo ọrọ iruiruo unevaze na, enọ i siobọno oke nọ a rẹ raha kẹ ikoko gbe iviuwou rai ziezi. (Ol. 110:3; Kọl. 3:23) Owojẹ uyoyou nana u ru rai fo kẹ ujiro, ọjẹrehọ, gbe uketha ovọvọ.—Rom 12:10; Hib. 13:1.

¹¹ A ta kẹ enọ i te kẹ obufihọ kẹ Egbẹgwae Ebabọ Ubrotọ kpobi re a kere efọmo ọ Kingdom Hall Volunteer Worker Questionnaire (S-82) na. Ukoko na u re vi ai se ogbẹgwae ubrotọ na re a dhesẹ ete gbe omarọvia oruiruo. Okenọ enwene ọ tẹ ruọ edikihẹ ohwo unevaze, wọhọ epaọ okenọ ọ tẹ kua no oria no hayo a rehọ e riẹ mu odibo oruiruo hayo ọkpako, a rẹ wariẹ kere efọmo ọkpokpọ ababọ okioraha kẹsiẹe okere-obe ukoko na o ve vi ei. Otẹrọnọ ohwo unevaze ọ gbẹ wariẹ te he, ekpako na i re kere ileta se ogbẹgwae ubrotọ na ababọ okioraha. A tẹ gwọlọ efọmo efa, a rẹ sae yare ai eva Literature Order Form ọrọ k’amara k’amara na. Ọsẹro okogho o wo isiuru kpahe ahwo nọ a fialoma kẹ iruo efuafo nana re. Fikiere, ọ rẹ kiẹ efale ọ ebe Kingdom Hall Volunteer Worker Questionnaires na evaọ oke kpobi nọ o weze ziọ ukoko na.

¹² Esikpotọ Araha Ebabọ: A kẹ Egbẹgwae Ebabọ Ubrotọ na ọkpọvio no re a wo ẹko-iruo edadẹ evaọ otọ ẹruọsa ọkpako nọ o te ziezi. Inievo nọ i bi ruiruo evaọ ẹko-iruo nana a rẹ roma totọ gwọlọ evuẹ kpahe edadẹ re a ruẹse kiẹ unuigho nọ o mai ku via ẹkwoma eria sa-sa nọ a rẹ jọ tho gbe ohwo nọ ọ te mai si ugho no. Evaọ edhere ọnana, a rẹ sae j’iroro kpahe ohwo nọ a rẹ dẹ mi gbe ekwakwa nọ a rẹ dẹ. Ẹsejọ, evaọ etoke iruo Ọgwa Uvie, a rẹ sai zizie inievo nọ i te evaọ ukoko na re a fiobọhọ evaọ ẹko-iruo ọnana. Oke kpobi nọ iruo Ọgwa Uvie, makọ ọkpokpọ hayo aruẹrẹ, e tẹ gwọlọ obufihọ ahwo unevaze no ikoko nọ e te jọ ọgwa na ru iwuhrẹ hẹ ze, ogbẹgwae ubrotọ na o rẹ sẹro ebabọ na.

¹³ Dede nọ uyoyou ahwo-akpọ buobu u fu no evaọ edẹ urere enana, ahwo Ọghẹnẹ a gbe bi dhesẹ uyoyou rai kẹ ohwohwo, uyoyou nọ o fa iwhru uyẹ gbe ekwotọ vrẹ. (Mat. 24:12) Evaọ aruorokele Ọsẹ obọ odhiwu mai, joma gbe dhesẹ uyoyou utioye ẹkwoma uketha avọ unevaze rọkẹ ebabọ Egwa Uvie evaọ Nigeria. Ma te ru ere o te wha eghale Jihova buobu avọ ọjẹrehọ riẹ s’omai.—Mal. 3:10; Hib. 6:10.