Ọruẹrẹfihotọ Ebabọ Egwa Uvie Ọ be Nya Haro
1 Evaọ 1983 eva Okokohọ Ubrotọ ọrọ “Okugbe Uvie” nọ a ru evaọ United States, a whowho nnọ ma ti wo obọdẹ ẹkpa-ugho nọ ma rẹ rọ tha ebabọ gbe erukpokpọ Egwa Uvie uke evaọ United States gbe Canada. Evaọ oke yena ma riẹ oghale nọ u ti no emuhọ ọkakao otiọye na ze he. Ma te mu orugba eme obọdẹ nọ Olezi 92:4 o ta na họ ẹruẹ vọvọ viere: “O whẹ, ỌNOWO, whọ rehọ iruo ra ru omẹ eva were, fiki iruo abọ ra mẹ rọ suile aghọghọ.”
2 Enẹna ma be ghọghọ gaga evaọ oware nọ ma bi wo te obọ. Nẹnẹ na ọruẹrẹfihotọ ebabọ ekpakpata Egwa Uvie ọ be nya haro. Evaọ edhere jọ, mai kpobi ma wo uvẹ-ọghọ nọ ma re ro wo obọ evaọ iruẹru nana. Ma re ru ere ẹkwoma azọhọ-unevaze abọ ugho okakao hayo ulogbo nọ u re fi obọ họ evaọ ebabọ eria egagọ efa evaọ otọakpọ na soso. Inievo buobu a si obọ no ekwakwa gbe oke rai, ẹgba, gbe eriariẹ rai no evaọ omaa-ebabọ itieye na. Oware nọ o be wha obokparọ ọruẹrẹfihotọ na kpobi ze họ ọkpọvio, uketha, gbe obọdẹ eghale Jihova kpahe omodawọ okugbe mai.—Olezi 127:1
3 Iwou-egha buobu e nya lele oriruo nọ a kaki fihọ kẹ ikoko evaọ United States na no. Eva Egwa Uvie nọ e rrọ ekwotọ buobu, a wo ẹkpẹti nọ iwhowho-uvie na i re fi azọhọ-unevaze rai họ kẹ Ẹkpa-Ugho Ọgwa Uvie na. Evaọ obọ United States, Odibọgba Uvie Mai ọrọ March 1997 u whowho enwene jọ evaọ ọruẹrẹfihotọ nana. O ta nọ: “Anwọ oke nọ a ro ru Ẹkpa-Ugho Ọgwa Uvie Society evaọ 1983 na, inievo na a rehọ eva rai kpobi ru azọhọ unevaze no, u te ru ei lọhọ re a jọ etẹe momo ugho rọkẹ ebabọ Egwa Uvie. Evaọ orẹwho nana [United States], ikoko nọ i bu te 2,700 i wo erere no ọruẹrẹfihotọ nana ze no. Edhere ọfa ọ riẹ hẹ nọ ikoko buobu e hẹ sae rọ bọ Egwa Uvie ekpokpọ hayo ruẹrẹ enọ e gwọlọ aruẹrẹ. Enẹna ẹgwọlọ ọkpakpata ọ riẹ re a jọ igho nana nọ a wo ẹkwoma unevaze na momo ejọ kẹ ikoko nọ e rrọ erẹwho nọ i wobọ tere he. Uketha nọ wha rẹ gbẹ rọkẹ ọruẹrẹfihotọ nana o da Society gbe ikoko nọ i bi wo erere no azọhọ-unevaze rai na ze ẹro fia.”
4 Owhowhovia yena ọ jọ uzizie re a wo obọ evaọ omaa ebabọ ekpakpata Egwa Uvie. Ẹkpa-Ugho Ọgwa Uvie na ọ be te kẹre te ẹruorote ẹgwọlọ inievo mai nọ e rrọ ekwotọ efa, yọ a ti gbe momo igho noi ze kẹ ebabọ Egwa Uvie evaọ orẹwho nana. Uzoẹme ofa jọ evaọ ukere ọ Odibọgba Uvie Mai ọrọ August 1997 (ọrọ obọ United States) o ta nnọ: “Ẹgwọlọ kẹ ebabọ Egwa Uvie ọ rrọ otọ evaọ akpọ na soso. Evaọ etoke ukpe iruo n’ukpo na ọvo, ikoko ekpokpọ 3,288 a tohọ. Ibuobu enana e rrọ evaọ Africa, Asia, Central gbe South Africa, jegbe Eastern Europe.”
5 Eme o no rie ze no anwọ oke oyena? 2001 Yearbook na o n’iyẹrẹ nnọ: “Avọ obufihọ ọruẹrẹfihotọ nana, evaọ erẹwho 30, a bọ Egwa Uvie 453 reno, yọ a be bọ 727 efa. [Evaọ Nigeria, a bọ Egwa Uvie ekpokpọ 171 jẹ rehọ ae mudhe evaọ etoke ukpe iruo 2002 na.] A fi ẹgba họ ebabọ emamọ Egwa Uvie rọkẹ orẹwho kpobi nọ o be rehọ ekwakwa gbe ona ebabọ oborai ruiruo. Evaọ Kenya, itho nọ a tọ no otọ ze a be rọ bọ; evaọ Togo ibriki a be mae rọ bọ; evaọ [Nigeria gbe] obọ Cameroon eblọko ekọkre nọ a rẹ wariẹ plasta eye a be mae rọ bọ. Evaọ edhere nana, o rẹ vẹrẹ inievo emotọ na obọ re a wuhrẹ ona nọ o gwọlọ evaọ eru abọ iruo nọ i w’uzou evaọ omaa-ebabọ nọ a bi ru evaọ orẹwho rai.”
6 A rẹ sae ruẹ imuẹro eghale Jihova kpahe omaa ebabọ nana evaọ ubro-akpọ ulogbo orọ Africa. Nọ who bi rri iwoho Egwa Uvie jọ nọ a bọ no na, dai roro epanọ ebabọ itieye na i kpomahọ iruo Isẹri Jihova no! Onana o rrọ ere evaọ abasa jọ nọ e viodẹ gaga—okugbe inievo akpọ soso mai, epanọ u kpomahọ ahwo okegbe na, gbe ẹvi evaọ unu ahwo nọ a bi kpohọ iwuhrẹ ukoko. Nọ uko-obeva nana u fi elo họ Egwa Uvie nọ a bọ evaọ Africa na, ukere ọ Odibọgba Uvie Mai erọ obaro e te tọ ẹro vi epanọ omaa ebabọ Ọgwa Uvie na o be rọ nyaharo evaọ ibrotọ efa akpọ na.
[Pictures on page 3]
CENTRAL AFRICAN REPUBLIC
Bimbo, Bangui
Begoua, Bangui
[Pictures on page 4]
Ukonga, Tanzania
[Picture on page 4]
Accra, Ghana
[Picture on page 4]
Salala, Liberia
[Picture on page 4]
Karoi, Zimbabwe
[Pictures on pages 4, 5]
Allada, Benin—Ọgwa Uvie vẹre
Allada, Benin—Ọgwa Uvie ọkpokpọ
[Picture on page 5]
Kpeme, Togo
[Picture on page 5]
Sokodé, Togo
[Pictures on pages 4, 5]
Fidjrosse, Benin
[Picture on page 6]
Lyenga, Zambia—Ọgwa Uvie vẹre
[Picture on page 6]
Lyenga, Zambia—Ọgwa Uvie ọkpokpọ
[Picture on page 6]
Kinshasa, Congo
[Picture on page 6]
Musambira, Rwanda