Kọ Whọ Sae Rehọ Oke gbe Ẹgba Ra Ru Iruo?

Wọhọ epanọ Aizaya ọ ruẹaro riẹ, abọ ukoko Jihova nọ o rrọ otọakpọ u bi dhe ebuebu gaga. (Aiz 54:2) Fiki onana, o gwọlọ nọ a rẹ bọ Egwa Uvie, Egwa Okokohọ, gbe iwou Ebẹtẹle ekpokpọ efa. Yọ nọ a tẹ bọ iwou nana no, o gwọlọ nọ a rẹ rẹrote ai, o tẹ jẹ gwọlọ nọ a rẹ wariẹ bọ enọ i kri no. Uvẹ sa-sa vẹ iruo nana u rovie fihọ kẹ omai nọ ma sae rọ rehọ oke gbe ẹgba mai ru iruo kẹ Jihova?

• Ma sai kuomagbe utu usi uwoma ota mai ru Ọgwa Uvie na fo nọ u te te utu mai

• Ma sae fialoma via re a wuhrẹ omai epanọ ma sae rọ rẹrote Ọgwa Uvie mai

• Ma sai fili efọmo Local Design/Construction Volunteer Application (DC-50), re ma fiobọhọ no oke te oke nọ a te bi ru ebabọ jọ nọ o kẹle oria nọ ma be rria

• Ma sai fili efọmo Application for Volunteer Program (A-19), re ma sae jọ Ebẹtẹle nọ ọ rrọ orẹwho mai hayo Ebẹtẹle nọ ọ rrọ orẹwho ọfa ru iruo oka ọvo hayo bu vi ere

WHA RRI IVIDIO NA OMAA IRUO EBABỌ EKPOKPỌ​—AMABỌ JỌ RIẸ, KẸSENA WHA VẸ KIYO ENỌ NANA:

• No anwọ 2014 ze, oghẹrẹ vẹ ividio nọ ukoko na u bi ru i ro bu vi epaọ ọsosuọ no?

• Re ukoko na o sai ru ividio buobu nọ ma gwọlọ, oghẹrẹ uwou vẹ ukoko na o be ma omaa riẹ nọ a gwọlọ bọ, kọ oke vẹ ebabọ na i ti ro muhọ je kuhọ?

• Ẹvẹ ohwo ọ sae rọ fialoma via kẹ ebabọ nana nọ a be ma omaa riẹ na?

• Otẹrọnọ ma gwọlọ fiobọhọ evaọ ebabọ Ramapo na, fikieme u ro fo re ma fili efọmo (DC-50), ma ve je lele Local Design/Construction, koyehọ LDC, ru iruo ebabọ nọ o kẹle oria nọ ma be rria?

• Eware jọ vẹ e via nọ i dhesẹ nọ Jihova họ ọnọ ọ be kpọ ebabọ nana?

• O tẹ make rọnọ ma te sae fialoma via kẹ iruo nana ha, oghẹrẹ vẹ ma sai ro fiobọhọ evaọ iruo ebabọ nana ghele?