Iruo Ebabọ nọ A Ru Re Taure Okpẹyao COVID-19 O te ti Kie Ze

Fikinọ idu ahwo buobu a bi kurẹriẹ ziọ ukoko na jẹ họ-ame kukpe kukpe, u ru nọ ma rọ gwọlọ eria efa buobu nọ ma rẹ jọ gọ Jihova. Fiki onana, Ẹko-Iruo Local Design/Construction evaọ akpọ na soso a tẹ ma omaa nọ a rẹ bọ hayo ruẹrẹ eria egagọ mai nọ i bu te idu ivẹ gbe egba ihrẹ (2,700) evaọ ukpe iruo 2020 na.a

Rekọ fiki okpẹyao COVID-19 nọ ọ tehe akpọ soso na, a gbẹ sai ru omaa rai na gba ha. Re a sae thọ inievo-emezae gbe emetẹ mai je ru lele izi egọmeti, Ogbẹgwae Ebe-Iwhowho Utu Ẹruorote na o tẹ jiroro nọ a siọ iruo ebabọ buobu nọ a hai ti ru na ba tao evaọ akpọ na soso. O make rrọ ere na, evaọ ukpe iruo 2020 na, ukoko na o sae bọ jẹ ruẹrẹ eria egagọ mai nọ i bu vi odu ọvo gbe egba ihrẹ (1,700) soso taure ẹyao COVID-19 na o te ti kie ze. U te no ere no, a sae jọ iwou ogha nọ i bu vi udhusoi (100) soso ru iruo ebabọ ilogbo re. Joma ta kpahe epanọ ivẹ jọ evaọ usu ebabọ nana i ro fiobọhọ kẹ inievo mai no.

Uwou ogha Cameroon. Uwou ogha Cameroon vẹre nọ o jọ Douala o kawo hrọ yọ o gwọlọ nọ a rẹ jariẹ ruẹrẹ eware buobu. Ogbẹgwae Ebe-Iwhowho o tẹ jẹ gwọlọ nọ a rẹ ruẹrẹ uwou ogha na, rekọ nọ a roro unuigho nọ a rẹ rọ ruẹrẹ iẹe, a tẹ ruẹ nọ unuigho na dede o tubẹ vrẹ unuigho nọ a rẹ sae zẹ iwou na. A te je roro sọ a rẹ bọ uwou ogha ofa fihọ otọ ofa hayo dẹ uwou nọ a bọ no vẹre re a ruẹrẹ iẹe fihọ epanọ a sae rọ jariẹ ru iruo, rekọ iroro ivẹ na e gbabọ họ.

Rekọ evaọ oke yena, inievo na a te yo nọ evaọ ofẹ ẹkpẹlobọ ovatha-ọre Douala, egọmeti ọ be gwọlọ ru edhere nya akotọ Ọgwa Okokohọ mai jọ vrẹ. Edhere na o ti ru nọ ohwo ọ sae ro te Ọgwa Okokohọ na lọlọhọ je ru nọ o ti ro wo ikpẹ, ame gbe eware itieye na efa. Yọ eware nana họ eware nọ ma gwọlọ evaọ uwou ogha dẹẹ. Fikiere Utu Ẹruorote na u te kuenu nọ a bọ uwou ogha ọkpokpọ fihọ abọjọ otọ nọ Ọgwa Okokohọ na ọ rrọ na.

Isẹri Jihova avọ ahwo ekọmpene nọ ukoko na o haya a kuobọgbe ru iruo ebabọ na, yọ onana u ru nọ iruo na e gbẹ rọ rehọ oke gbe ugho ga hrọ họ. Wọhọ oriruo, nọ a ku iruo na kpobi họ no, a ruẹ nọ unuigho nọ a raha o rehọ unuigho nọ o vrẹ ₦762,000,000.00 soso kpotọ vi unuigho nọ a je rẹro nọ a te raha. U woma gaga inọ inievo mai nọ i bi ru iruo evaọ Ebẹtẹle Cameroon a sae kwa ruọ uwou ogha ọkpokpọ na omoke jọ taure ẹyao COVID-19 na o te ti kie ze.

Eva e be were inievo mai nọ e rrọ Ebẹtẹle Cameroon ru iruo gaga enẹna nọ a be rọ rria emamọ iwou gbe ifisi ekpokpọ rai, yọ a rri rie nọ uwou ogha okpokpọ na yọ okẹ nọ u no obọ Jihova ze. Ọzae-avọ-aye jọ a ta nọ, “Ma gwọlọ ru iruo vi epaọ anwẹdẹ re ma ro dhesẹ nọ okẹ nana o da omai ẹro ziezi.”

Uwou Efafa Tojolabal nọ Ọ Rrọ Ebẹtẹle He Evaọ Mexico (RTO). Evaọ ikpe buobu, utu efafa ẹvẹrẹ Tojolabal u je ru iruo evaọ uwou ogha Central America nọ o kẹle okpẹwho Mexico. Rekọ ẹwho Altamirano avọ Las Margaritas a rẹ mae jọ ta ẹvẹrẹ Tojolabal, yọ ewho nana e rehọ enwenọ emaele egba ezeza gbe udhe (620) thabọ no oria nọ uwou ogha na o rrọ! Nọ orọnọ ẹvẹrẹ o re dhe enwenwene na, o jọ bẹbẹ kẹ efefafa ẹvẹrẹ Tojolabal na re a riẹ epanọ a be ta ẹvẹrẹ na enẹna jẹ rọ ere fa ebe rai. Yọ o jọ bẹbẹ kẹ uwou ogha na re a ruẹ inievo-emezae gbe emetẹ nọ e be rria kẹle oyena nọ e rẹ sae nyaze ti fiobọhọ fa ẹvẹrẹ Tojolabal je rekọdo eware sa-sa.

Fikiere Ogbẹgwae Ebe-Ikere Utu Ẹruorote na o tẹ jẹ gwọlọ nọ a re fi utu efafa ẹvẹrẹ Tojolabal na fihọ oria nọ a be jọ ta ẹvẹrẹ na dẹẹ. Re a sai ru onana, uwou ogha na o tẹ jiroro nọ a rẹ dẹ uwou jọ jẹ ruẹrẹ iẹe fihọ oghẹrẹ nọ inievo na a sae rọ jariẹ ru iruo. Onana u ku vi ẹsenọ a hae te bọ uwou okpokpọ hayo haya efisi nọ inievo na a rẹ jọ ru iruo.

Oniọvo jọ nọ ọ rrọ usu efefafa na ọ ta kpahe epanọ onana u fiobọhọ kẹ ae te no inọ: “Evaọ ikpe ikpe soso nọ me je ro ru iru efafa evaọ uwou ogha na, mẹ nyaku uviuwou ovuọvo kẹle oyena nọ o be ta ẹvẹrẹ mẹ ẹdẹvo ho. Rekọ enẹna, ọfisi mai ọ rrọ oria nọ a be jọ ta ẹvẹrẹ Tojolabal dẹẹ. Fikiere kẹdẹ kẹdẹ me re lele ahwo nọ a be ta ẹvẹrẹ Tojolabal ta ẹme. Onana u ru nọ mẹ rọ riẹ eme Tojolabal buobu no, yọ u bi fiobọhọ kẹ omẹ gaga evaọ iruo mẹ.”

Iruo Ebabọ nọ A ti Ru Evaọ Ukpe Iruo 2021

Evaọ ukpe iruo 2021, ukoko na o ma omaa nọ a te bọ RTO gbe eria nọ a rẹ jọ ru isukulu ukoko na nọ i te 75, otẹrọnọ o tẹ lọhọ. A ti je ru iruo ilogbo evaọ iwou ogha eree gbe oria okpokpọ nọ a be bọ fihọ Ramapo evaọ New York nọ o te jọ abọ jọ oria nọ u wuzou iruẹru mai. A te jẹ kwa uwou ogha Argentina avọ Italy kpohọ eria efa. U te no ere no, ma gwọlọ Egwa Uvie ekpokpọ nọ i bu vi odu ọvo (1,000) yọ eria egagọ mai nọ i bu vi idu ezeza (6,000) soso i woma ha, fikiere o gwọlọ nọ a rẹ wariẹ bọ ae. Ofariẹ, o gwọlọ nọ a rẹ ruẹrẹ Egwa Uvie nọ i bu te idu ene (4,000) soso.

Ẹvẹ ma be sae rọ ruẹ ugho bọ eria nana kpobi jẹ ruẹrẹ ae na? Brọda Lázaro González nọ ọ rrọ omọvo Ogbẹgwae Uwou Ogha Central America ọ kuyo onọ nana evaọ okenọ ọ jẹ ta kpahe ebabọ ọfisi efafa Tojolabal na. Ọ ta nọ: “Evaọ ẹkwotọ uwou ogha mai na, ma wo ugho tere he. Fikiere o gbẹ rrọ inievo akpọ-soso na nọ a bi fiobọhọ họ, ma hae te sae bọ ọfisi efafa nana kẹ ibe eg’Ọghẹnẹ mai vievie he. Ugho nọ inievo mai a bi ro ru unevaze evaọ akpọ na soso oye u ru rie lọhọ nọ efefafa na a sae rọ rrọ oria nọ a be jọ ta ẹvẹrẹ rai bi ru iruo na. Ma bi yere inievo akpọ soso na gaga rọkẹ emamọ ẹzi ọghoruo rai.” O rrọ vevẹ, unevaze nọ wha bi ru kẹ iruo akpọ soso na, u ru nọ ma be sai ro ru iruo ebabọ nana; yọ unevaze nana buobu yọ onọ a bi ru evaọ donate.jw.org.