Ebabọ nọ I bi Fiobọhọ kẹ Omai Ru Iruo Usi Uwoma Ota Na

O rrọ Utu Ẹruorote na oja gaga re a rọ igho nọ a ro ru okẹ unevaze bọ iwou nọ i re fiobọhọ kẹ omai ru iruo usi uwoma ota Uvie na. Wọhọ oriruo, evaọ ukpe iruo 2023, egbẹgwae sa-sa nọ iwou ogha Isẹri Jihova a bi ro ruiruo a raha edọla ima egba isoi ($500,000,000) rọ dẹ, bọ, ruẹrẹ, jẹ rẹrote Egwa Uvie gbe Egwa Ikokohọ evaọ akpọ na soso.a U te no unuigho yena no, ikoko Isẹri Jihova nọ e rrọ akpọ na soso a raha igho re rọ rẹrote Egwa Uvie rai.

U te no ere no, a be jẹ rọ igho unevaze bọ iwou ogha jẹ rẹrote ai, yọ onana u bi fiobọhọ nọ a be sai ro ru iruo usi uwoma ota na evaọ akpọ na soso. Ma siọ eware jọ nọ ma jẹ hai ru evaọ iwou ogha ba, ma te je bru ejọ kpotọ re ma sae rọ igho nọ a bi ro ru unevaze bọ Egwa Uvie gbe Egwa Ikokohọ jẹ rẹrote ai. O make rrọ ere na, ma gwọlọ ugho nọ ma rẹ rọ ruẹrẹ, wariẹ bọ, hayo kwa iwou ogha jọ kpohọ eria efa. Fikieme o rọ gwọlọ nọ ma re ru iruo nana? Oghẹrẹ vẹ iruo nọ a be jọ iwou ogha ru i bi ro fiobọhọ kẹ ikoko na? Joma ruẹ.

O rẹ Lẹliẹ Uwou na Tọ Ziezi

O vrẹ ikpe ọgba hayo udhuvẹ no nọ a rọ bọ iwou ogha buobu! Oniọvo nọ a re se Nicholas nọ o bi ru iruo evaọ Ẹko-Iruo Ebabọ Akpọ-Soso ọ ta nọ: “Nọ a tẹ be make rẹrote uwou ziezi, ọ rẹ who jẹ raha ghele nọ oke o be nya na. Nọ a tẹ wariẹ ruẹrẹ uwou, u re ru nọ uwou na o rẹ rọ tọ vi epanọ o hae te tọ te.”

U fo nọ eware i re nwene re evaọ Ebẹtẹle fiki ẹvi nọ ọ rrọ ukoko na. Evaọ akpọ na soso, iwhowho-uvie i bi dhe ebuebu. Okenọ a rọ bọ iwou ogha buobu yọ iwhowho-uvie i ri bu te epanọ a bu te enẹna ha. Fikiere, o gwọlọ nọ a re fiba unu ahwo nọ a bi ru iruo evaọ iwou ogha na. Onana o wha riẹ ze nọ iwou ogha nọ e jẹ gba ahwo vẹre e rọ vọ mu enu no, e gbẹ be gba ahwo ho!

A re je roro kpahe epanọ a rẹ rọ bọ iwou na re e gbẹ wha omonwa hayo uwhu ze he. Fikinọ edẹ urere na ma be rria na, eware okpẹtu buobu e be via nọ e rẹ sae wha uwhu ze. (Luk 21:11) Nọ ma tẹ be wariẹ iwou na ruẹrẹ, ma rẹ rehọ edhere ọkpokpọ nọ ọ mai woma ruẹrẹ ae, onọ u re ru ai g a ziezi e gbẹ kake raha ha nọ oware okpẹtu o tẹ make via. A sae gbẹ jarae ru epanọ a rẹ rọ dhogbo bru inievo nọ oware okpẹtu o via kẹ je gbe fiobọhọ evaọ iruo usi uwoma ota na nọ orọnọ oware ovo o via kẹ iwou nana ha na.

“Jihova Ọ Ghale Iroro nọ Ma Jẹ Na”

Utu Ẹruorote na u kuenu kẹ iruo ebabọ sa-sa, onọ o wha riẹ ze nọ a rọ jọ iwou ogha udhuvẹ-gbesa ru iruo ebabọ ilogbo evaọ ukpe iruo 2023. Onana u dhesẹ nọ evaọ enwenọ iwou Ebẹtẹle nọ e rrọ akpọ na soso a jẹ jọ ru oghẹrẹ iruo ebabọ jọ. Rri iriruo jọ nọ i dhesẹ epanọ iruo nana nọ a bi ru na i wuzou te.

Angola. Oniọvo nọ a re se Matt nọ ọ rrọ omọvo Ogbẹgwae Uwou Ogha Angola ọ ta nọ: “Ma wo uvẹ nọ ma be rọ ruẹ epanọ eruẹaruẹ Hagai 2:7 u bi ro rugba evaọ obọdẹ edhere. Evaọ oware ikpe ikpe ọvo, iwhowho-uvie nọ ma wo i vihọ gaga. E rehọ abọvo bu vi enọ ma wo vẹre! Onana o wha riẹ ze nọ o rọ gwọlọ nọ unu ahwo nọ a rrọ Ebẹtẹle o rẹ rehọ akuasa vihọ re. Rekọ, fikinọ iwou nọ ma wo evaọ Ebẹtẹle e sae gba ahwo na kpobi hi, ma sai zizie unu ahwo nọ ma gwọlọ gba ha. Fikiere, inievo na buobu nọ e rrọ Ebẹtẹle, a wo iruo buobu nọ a bi ru, yọ unu euwa nọ a bi ro ru iruo o be vrẹ unu euwa nọ u fo nọ o rẹ jọ.”

A te fi inievo jọ họ re a kiẹ kpahe epanọ a sai ro ru uwou ogha na rro vi epanọ ọ rrọ. Evaọ oke ọsosuọ, a roro nọ oware nọ o te mae vẹrẹ je kiehọ họ re a wariẹ ruẹrẹ iwou nọ ma wo vẹre na. Rekọ nọ a kiẹ kpahe iẹe ziezi no, a tẹ ruẹ nọ u ti kiehọ tere he re a wariẹ ruẹrẹ iwou na. Ukpoye, a ta nọ o te mai woma re a dẹ uwou jọ nọ o kẹle etẹe, a vẹ wariẹ ruẹrẹ iẹe. Brọda Matt ọ ta nọ, “Okenọ a kake vuẹ omai Ogbẹgwae Uwou Ogha na nọ jọ ma dẹ uwou jọ nọ a bọ no vẹre re a ruẹrẹ iẹe, ma je roro nọ uwou na u ti woma te uwou nọ mai ọvo ma bọ họ. Rekọ nọ a ru iruo na kpobi no enẹna, ma ruẹ nọ uwou na u kiehọ kẹ oware nọ ma gwọlọ rehọ iẹe ru. Jihova ọ ghale iroro nọ ma jẹ na.”

O wọhọ nọ evaọ obaro o tẹ gwọlọ nọ a bọ iwou efa kugbe enọ a wo obọnana. Rekọ evaọ enẹna, uwou okpokpọ na avọ iwou esese sa-sa nọ e rrọ ighẹ Ebẹtẹle na gbe iwou efa nọ a haya nọ ahwo a be rria i bi fiobọhọ nọ uwou ogha na o be sae rọ rẹrote ẹvi a bi wo evaọ ẹkwotọ uwou ogha na.

Japan. U te enwenọ ikpe udhuvẹ no nọ a rọ bọ iwou ọsosuọ nọ a bọ fihọ uwou ogha na, yọ a re ruẹrẹ ai ziezi anwọ oke yena ha. O make rọnọ inievo na a be daoma gaga re a rẹrote ae na, iwou na i kri vrẹ epanọ a rẹro nọ i ti kri te no. Fikiere ma be ta ẹme na, a be ruẹrẹ iwou na, yọ iruo na e rrọ ruaro.

A nwene eware buobu no evaọ Ebẹtẹle nọ ikpe na e be nya na. Rite ukpe 2015, a jẹ hai there emu kpobi nọ uviuwou Ebẹtẹle a rẹ re kẹ ae. Fikiere, oria nọ a rẹ jọ there emu nọ a bọ fihọ ibriwou nọ ahwo Ebẹtẹle na buobu a be rria evaọ Japan ọ rrọ kakao. Rekọ enẹna, inievo nọ e rrọ Ebẹtẹle na ọvo a bi there enwenọ emu kpobi nọ a be re kẹ omarai. Fikiere, enẹna nọ a be wariẹ iwou na ruẹrẹ na, a bi ru oria nọ a rẹ jọ there emu evaọ ibriwou na rro vi epanọ o jọ, re inievo na e sai there emu rai lọlọhọ. Oniọvo-ọmọtẹ nọ a re se Kumiko nọ ọ be jọ uwou ogha Japan ru iruo ọ ta nọ, “Oghẹrẹ nọ ikichini na ọ rrọ enẹna o be jomẹ there emu ziezi, fikiere nọ a ta nọ mai ọvo ma hai there emu na buobu kẹ omamai na, mẹ be sai ru ei lọlọhọ.”

Iruo nọ a bi ru evaọ uwou ogha Japan i wuzou gaga evaọ iruo usi uwoma ota nọ ma bi ru evaọ akpọ soso na. (Matiu 28:19, 20) Ẹvẹ o rọ rrọ ere? Iwou ogha ivẹ ọvo a be jọ printi oma Ebaibol na soso, yọ Japan ọvo rai jọ. Fikiere a bi ru oware jọ fihọ oria nọ a rẹ jọ printi ebe na evaọ ebabọ na, oye họ, oware nọ a re ro bru akọ ebe, o ve je se ovu rehọ, re ovu na o gbe kpokpo ahwo nọ a bi ru iruo evaọ etẹe he. Ugho nọ a rọ dẹ oware nana jẹ be whẹe họ u bu te enwenọ edọla ima ọvo ($1,000,000). O make ghare tere na, ma riẹ nọ u ti fiobọhọ nọ a te gbẹ sai ro printi ebe je vi ai se ikoko na, maero kọ Ebaibol na.

Inievo na a daoma gaga re a ruẹ nọ a gbe bi printi Ebaibol ghelọ iruo ebabọ na. Oniọvo nọ a re se Trey nọ ọ rrọ omọvo Ogbẹgwae Uwou Ogha Japan ọ ta nọ: “Evaọ etoke ebabọ na, ukoko na u je siobọno Ebaibol nọ a fa fihọ evẹrẹ sa-sa buobu, yọ ahwo nọ a gwọlọ Ebaibol nana evaọ akpọ na soso a je dhe ebuebu. Fikiere re ma sai fi oke họ nọ a rẹ rọ whẹ ekwakwa ekpokpọ na họ, a ve je gbe bi printi ebe, o gwọlọ nọ eko-iruo buobu evaọ Ebẹtẹle gbe ekọntratọ na a re ru iruo kugbe ziezi.” Ghelọ ebẹbẹ yena nọ ma wo evaọ okenọ iruo ebabọ na e rọ jọ gaga evaọ oria nọ a rẹ jọ printi ebe na, ma jẹ sai printi Ebaibol nọ i bu te idu egba ivẹ gbe udhe (220,000) kamara kamara, no amara Asa rite Aria 2023. Ma sai ru iruo nana kpobi ababọ ugho ofa nọ ma raha kugbe onọ ma hae te raha vẹre.

Oware ofa jọ nọ u wuzou gaga evaọ iruo ebabọ na họ, epanọ a re ro ru re ikpẹ, AC, gbe eware itieye e gbẹ rehọ ogaga ẹlẹtriki ga hrọ họ. Ma ti wo solar panel ekpokpọ, yọ onana u ti ru nọ ma gbẹ te raha te unuigho nọ ma jẹ raha vẹre he, ma ve ti koko enwenọ edọla idu udhozeza ($120,000) noi ze kukpe kukpe. Ma ti fi inwido nọ i wo ewẹ eglase esa nọ i wo okpa ziezi fihọ uwou na, onọ u ti ru nọ ikpẹ, AC, gbe eware itieye e gbẹ te rehọ ogaga ẹlẹtriki ga hrọ họ, ma vẹ te sai koko ugho nọ u ti bu te oware wọhọ edọla idu ikpe ($10,000) noi ze kukpe kukpe. O make rọnọ evaọ obọnana, eware nana nọ ma ti fihọ iwou nọ a be ruẹrẹ na i ti ru omai raha ugho vi epanọ ma hae te raha vẹre, u ti ru nọ ma ti ro koko ugho nọ u bu vi edọla ima esa gbe egba isoi ($3,500,000) evaọ etoke nọ solar panel gbe inwido na e te tọ te na. U ti je ru nọ eware nọ e rẹ sae nua ofou na i gbe ti no iwou na ze gahrọ họ.

“Iruo E Gbẹ Vọ Otọ”

Iruo ebabọ nana nọ a bi ru evaọ iwou ogha ivẹ nana u dhesẹ iruo nọ o gwọlọ nọ a re ru evaọ iwou Ebẹtẹle re iruo nọ a be jarai ru fiki usi uwoma ota na e gbẹ nyaharo ziezi. Rekọ iruo na i ri re no ho. Oniọvo nọ a re se Aaron nọ o bi ru iruo evaọ Ẹko-Iruo Ebabọ Akpọ-Soso ọ ta nọ, “Inievo na i ru iruo gaga no, rekọ iruo e gbẹ vọ otọ. Ẹvẹ ma te sai ro ru iruo nana re?” Oniọvo na ọ ta nọ: “Ma bi yere owhai kpobi nọ e be kẹ okẹ unevaze nọ ma be rọ ruẹ ugho ru iruo ebabọ nana. Ma te je bi yere ahwo kpobi nọ a fialoma via kẹ iruo evaọ oke nọ u kpemu gbe enọ i bi ru epanọ a rẹ rọ fialoma via evaọ ẹdẹfa. Oghẹrẹ nọ inievo mai a be rọ rehọ ugboma rai ru iruo jẹ be rọ ugho ru unevaze u dhesẹ nọ Jihova ọ be ghale iruo na.”—Olezi 110:3.

Igho nọ a be rọ unevaze kẹ ma bi ro ru iruo ebabọ ekpokpọ gbe iwou nọ ma be ruẹrẹ kpobi. Yọ donate.jw.org a bi jo ru unevaze nana buobu. Ma bi yere owhẹ gaga rọkẹ unevaze nọ whọ be hai ru ẹsikpobi na.