Idhu na E Fa No kẹ Evuo
1. Obọdẹ iruo vẹ i muhọ anwẹdẹ?
1 Nọ Jesu ọ ta usiuwoma kẹ aye Sameria jọ no, ọ tẹ ta kẹ ilele riẹ inọ: “Wha kpare aro rai, wha ri idhu, epanọ e fano kẹ evuo.” (Jọn 4:35, 36) Evaọ oke yena iruo ivuẹvu abọ-ẹzi i muhọ no, yọ Jesu ọ kparo ruẹ epanọ iruo na e te kẹre te evaọ akpọ na soso. Jesu ọ gbẹ be kpọ iruo ivuẹvu na evaọ obọ odhiwu nọ ọ rrọ enẹna. (Mat. 28:19, 20) Imuẹro vẹ i dhesẹ inọ iruo na i gbe bi vihọ nọ e be kẹle obọ ekuhọ no na?
2. Eme u dhesẹ nọ iruo ivuẹvu na i bi vihọ evaọ akpọ-soso?
2 Ivuẹvu Evaọ Akpọ-Soso: Evaọ ukpe iruo 2009 na, ma jọ akpọ-soso wo ẹvi iwhowho-uvie 188,730. Ekwotọ nọ a jọ whaha iruo usiuwoma ota na i wo ẹvi 2,727. Ebe-iwuhrẹ Ebaibol nọ a n’iyẹrẹ rai evaọ kamara kamara i bu vrẹ 7,619,000, yọ unu nana u bu vrẹ unu iwhowho-uvie, o tẹ jẹ rehọ ubro ima rọ vrẹ unu ebe-iwuhrẹ nọ a n’iyẹrẹ rai evaọ 2008. Fiki epanọ iruo na e be nya kẹre kpata kpata evaọ ekwotọ buobu, ẹgwọlọ kẹ imishọnare gbe enọ i kpohọ Isukulu Ewuhrẹ Odibọgba (MTS) o re ruaro. Ekwotọ evẹrẹ ọfa i bi wo ẹvi gaga evaọ erẹwho buobu. O rrọ vevẹ inọ Jihova o bi fi ẹvi họ iruo na evaọ ekuhọ ivuẹvu na. (Aiz. 60:22) Kọ who wo emamọ eriwo kpahe ẹkwotọ ra?
3. Eme ahwo jọ a sai roro kpahe ẹkwotọ rai?
3 Ivuẹvu na Evaọ Ẹkwotọ Ra: Ahwo jọ a sae ta nọ: “Ẹvi o bi no ẹkwotọ mẹ ze ziezi hi.” Uzẹme o rrọ inọ ekwotọ jọ i bi wo ẹvi te ejọ họ, hayo i gbe bi wo ẹvi te epaọ ọsosuọ họ. Fikiere, iwhowho-uvie jọ a sai roro inọ ahwo a kurẹriẹ re no evaọ ekwotọ yena, yọ enẹna, umutho gheghe nọ i kiọkọ a be gwọlọ. Kọ ere o ginẹ rrọ?
4. Didi uruemu u fo nọ ma re wo kpahe odibọgba mai, kọ fikieme?
4 No emuhọ ivuẹvu na rite ekuhọ riẹ yọ etoke iruo ilogbo. Muẹrohọ epanọ eme Jesu nana e gwọlọ ovẹrẹ te: “Ivuẹvu na i ghine bu, rekọ iruiruo e rẹ kakao. Fikiere wha lẹ Olori ivuẹvu na re o vi iruiruo kpobọ ivuẹvu riẹ.” (Mat. 9:37, 38) Jihova nọ ọ rrọ Olori ivuẹvu na ọye ọ riẹ oke gbe oria nọ ẹvi ọ rẹ jọ romavia. (Jọn 6:44; 1 Kọr. 3:6-8) Ovẹ họ onọ u te omai? Ebaibol e kuyo nọ: “Evaọ ohiohiẹ kọ ibi ra, gbe evaọ owọwọ who si obọ ra no ho.” (Ọtausi. 11:4-6) Ẹhẹ, orọnikọ enẹna nọ ivuẹvu na i te ekuhọ no na ma re jo serihọ họ!
5. Fikieme ma rẹ rọ ruabọhọ usiuwoma na ota avọ ajọwha evaọ ẹkwotọ nọ o wọhọ nọ o bi wo ẹvi hi?
5 Ruabọhọ Ivuẹvu Na: O tẹ make rọnọ ma jọ ẹkwotọ mai ta usiuwoma unuẹse buobu no, yọ o wọhọ nọ ẹvi ọ riẹ hẹ, o gbẹ gwọlọ nọ ma rẹ rọ ajọwha avọ oma ovẹrẹ ru iruo na. (2 Tim. 4:2) Eware iyoma sa-sa nọ e be via evaọ akpọ na e be lẹliẹ ahwo nwene uruemu rai je bi roro gaga kpahe obaro na. Nọ izoge e be kpako na, ẹsiẹe a rẹ mai roro kpahe epanọ a re ro wo ufuoma gbe udhedhẹ iroro. Ma tẹ ruabọhọ iruo na, ma ti gbe fi obọ họ kẹ amọfa. Ahwo nọ a jẹ gaviezọ vẹre he a sae gaviezọ oke ofa. Makọ enọ i keke aro fihọ siọ ovuẹ mai u fo nọ ma rẹ vẹvẹ ae unu.—Izik. 2:4, 5; 3:19.
6. Otẹrọnọ ẹkwotọ mai u bi fou ehoo, eme o re fi obọ họ kẹ omai yọrọ ajọwha?
6 Otẹrọnọ ẹkwotọ mai u bi fou ehoo, eme o re fi obọ họ kẹ omai yọrọ ajọwha? U te no usiuwoma n’uwou ruọ uwou no, ma rẹ sae daoma ta usiuwoma evaọ eria ekiọthuọ hayo evaọ ifonu. Hayo ma rẹ sae ta ẹme kpahe eware sa-sa. Ma rẹ sai nwene oke usiuwoma ota mai re ma kpohọ usiuwoma evaọ owọwọ hayo oke nọ ahwo a sae rọ jọ uwou. Ma rẹ sai wuhrẹ ẹvẹrẹ ọfa re ma sae ta usiuwoma kẹ ahwo ẹvẹrẹ na. Ma rẹ sai ru odibọgba mai kẹre ẹkwoma ẹruọ iruo ọkobaro oke-kpobi. Hayo ma rẹ sae kwa kpohọ oria nọ iwhowho-uvie i jo bu tere he. Ma te se iruo ivuẹvu na gboja, ma te dawo ẹgba mai kpobi evaọ iruo nana nọ i wuzou gaga na.
7. Rri bọo oke vẹ ma te ruabọhọ iruo ivuẹvu na?
7 Umutho oke ewhẹrẹ a wo nọ a re ro vu ekakọ rai kokohọ, fikiere a rẹ moyẹlẹ hayo rolobọ họ bẹsenọ iruo na i re reno. Oghẹrẹ oma ovẹrẹ ovona iruo usiuwoma ota na e gwọlọ. Rri bọo oke vẹ ma te ruabọhọ iruo ivuẹvu na? Evaọ etoke nana kpobi rite “urere” riẹ. (Mat. 24:14; 28:20) Wọhọ Jesu, ma gwọlọ ru iruo nọ a kẹ omai t’oka. (Jọn 4:34; 17:4) Fikiere, joma gbẹ rọ ajọwha, evawere, gbe osegboja ru iruo usiuwoma ota na rri bọo urere na. (Mat. 24:13) Iruo ivuẹvu na i ri kuhọ họ!
[Ẹme nọ a fi ẹgba họ nọ ọ rrọ ẹwẹ-obe avọ 2]
No emuhọ ivuẹvu na rite ekuhọ riẹ yọ etoke iruo ilogbo