Fikieme Ma Je Bi Zihe?
1 Kọ whọ nọ oma ra onọ oyena no ẹdẹjọ, ẹsejọhọ evaọ okenọ whọ be ruẹrẹ oma họ kẹ usiuwoma ota? Evaọ eria jọ nọ a re jo ru ẹkuotọ mai erueruo, ahwo nọ i wo uwou a rẹ sai vuhu omai a ve le omai n’oma. Enọ e be riẹ uyo kẹ i bu hu. Rekọ emamọ ẹjiroro e vọ riẹ nọ ma jẹ ruabọhọ ezihe.
2 Orọ ọsosuọ, a juzi k’omai nọ ma re whowho ovuẹ Uvie na bẹsenọ urere na o rẹ ze. (Mat. 24:14; 28:19, 20) Aizaya ọruaro na ọ nọ kpahe epanọ ọ te ta usiuwoma kri te. Uyo nọ a kẹ riẹ a kere i rie fihọ Aizaya 6:11. O rọ vevẹ—a ta kẹe nọ ọ gbẹ hae rehọ ovuẹ Ọghẹnẹ zihe bru ahwo na. Epọvo na re nẹnẹ, dede nọ a re le omai, Jihova ọ gwọlọ nọ ma re zihe bru ahwo nọ e be rria ẹkuotọ mai. (Izik. 3:10, 11) Onana yọ owha-iruo ọfuafo nọ a wọ họ omai uzou.—1 Kọr. 9:17.
3 Ẹjiroro ọfa nọ ma je gbe zihe họ onana o rẹ k’omai uvẹ dhesẹ epanọ omarọkẹ Jihova mai u kodo te. (1 Jọn 5:3) U te no ere no, nọ ma te roro kpahe oware nọ obaro u kru kẹ ohwo-akpọ, fikieme ma je siuke kpemu no omodawọ nọ ma rẹ rọ gwọlọ vẹvẹ erivẹ mai unu avọ uyoyou? (2 Tim. 4:2; Jem. 2:8) Ẹrọwọ nọ ma rẹ rọ wha iruo mai haro o rẹ kẹ ahwo na uvẹ buobu nọ a rẹ rọ kẹ uyo kẹ ovuẹ esiwo Ọghẹnẹ, a gbẹ sai gu inoma ha inọ a vẹvẹ e rai unu hu.—Izik. 5:13.
4 Ofariẹ, ma riẹ okenọ udu ahwo jọ i re nwene he. Ẹsejọ enwene uzuazọ rai o rẹ lẹliẹ ai nwene iroro, okpẹtu jọ evaọ uviuwou rai, hayo eyero akpọ nọ u ru rai roro gaga kpahe obaro rai. Ofa re, oware nọ ma ta evaọ unuẹthẹ rai o rẹ sae ru ai kpahe emamọ uyo nọ a rẹ kẹ. (Ọtausi. 9:11; 1 Kọr. 7:31) Ofariẹ, ahwo a be kua no oria ruọ oria. Ma rẹ sae ruẹ ahwo kpokpọ evaọ ẹkuotọ mai enọ e te kuyo kẹ usiuwoma na—ẹsejọ evrawha nọ ae ọvo a be rria je bi roro gaga kpahe ẹjiroro uzuazọ rai.
5 Kọ ma te gbẹ hai zihe? E! Ikereakere na ọ k’omai uduotahawọ nọ ma re ro zihe bru ahwo na kẹse kẹse. Evaọ ekuhọ riẹ, okenọ iruo usiuwoma ota na u te kuhọ no, Jihova ọ te ghale omai kẹ omodawọ mai evaọ odibọgba na, ọ te jẹ ghale ahwo nọ e kuyo ziezi kẹ usiuwoma Uvie na re.—1 Tim. 4:16.