Dhesẹ Uvi Ọdawẹ Kẹ Isiuru nọ A Duku Kpobi
1 Iruo ewhowho Uvie na evaọ akpọ na soso u ti te oba kẹle, evaọ okioye ahwo nọ “e riẹ Ọghẹnẹ hẹ” a te rọ ruẹ uye ọraha. (2 Tẹs. 1:7-9) Fikiere, uvi ọdawẹ kẹ izuazọ ahwo o be wọ ahwo Jihova re a daoma rehọ ovuẹ Uvie na bru ahwo buobu.—Zef. 2:3.
2 K’amara k’amara, a be raha ima euwa buobu rọ gwọlọ ahwo nọ i wo isiuru kẹ “emamọ usi uwoma” na. (Aiz. 52:7) Evaọ uyo kẹ ebe nọ a bi fihọ ada, ahwo buobu a vi hayo a rehọ Uwou-Eroro Na gbe Awake! no hayo ibroshọ na Eme Ọghẹnẹ Ọ Gwọlọ Mi Omai? Uvi ọdawẹ kẹ ahwo nana o rẹ w’omai re ma nya lele isiuru nọ ma nyaku kpobi.—Itẹ 3:27.
3 Ru Okerefihotọ Ọgbagba: Ma re ru eware buobu gba otẹrọnọ ma re kere isiuru gbe ebe nọ ma fihọ ada kpobi fihọ otọ gbagba. Evuẹ wọhọ odẹ ọnọ o wo uwou na gbe adrẹse riẹ, ẹdẹ gbe oke nọ who ro weze nya, obe nọ who fihọ ada, gbe uzoẹme nọ wha ta kpahe u re fiobọhọ k’owhẹ ziezi nọ who te zihe. Ofariẹ, otẹrọnọ who kere eme jọ nọ ohwo na ọ ta fihotọ evaọ ẹme ọsosuọ rai, whọ rẹ sae wariẹ eme na ziezi nọ whọ be ruabọ họ ẹme na evaọ ozihebro na.
4 Kaki ru Izihebro: Bro ahwo nọ who fi ebe họ ada kẹ amara n’ukpo who zihe bru no? Kọ eka buobu e vrẹ no nọ whọ re gbẹ ruẹ ohwo na ha? Uvi ọdawẹ kẹ omokpokpọ ebẹdẹ bẹdẹ rai o rẹ wọ owhẹ re who zihe vẹrẹ vẹrẹ, u re fo nọ umutho edẹ jọ e tẹ vrẹ no, nọ ọ gbẹ be kareghẹhọ ẹme nọ wha kake ta na. Ẹkwoma ezihe vẹrẹ vẹrẹ re whọ bọ isiuru na ga, whọ jẹ sae za omodawọ Setan dhe re ọ tẹ nyaze te “tọlọ ẹme nọ a kọ họ eva rai vrẹ.”—Mak 4:15.
5 Omaruẹrẹhọ O r’Oja: Obokparọ nọ who re wo evaọ izihebro o roma hwa epanọ whọ ruẹrẹ oma họ te. Moma ẹme nọ who ti ro muhọ re whọ tẹ nya. Ẹwẹ-obe urere ọ Odibọgba Uvie Mai ọrọ April 1997 ọ kẹ ẹjiroro sa-sa nọ ma rẹ sai fihọ iruo avọ obokparọ nọ who bi fi emagazini na họ ada hayo ibroshọ Ọghẹnẹ Ọ Gwọlọ na. Onọ u lele i rie họ who re wo eme nọ who ti lele ohwo na ta họ iroro nọ who te zihe. Kọ eme whọ rẹ sae ta nọ who te bi lele isiuru? Ẹvẹ a sai ro mu uwuhrẹ Ebaibol họ?
6 Nọ who te zihe bru ohwo nọ who lele t’ẹme kpahe oware nọ o gwọlọ re a ru otọakpọ na fo je ru ei fihọ emamọ oria nọ a rẹ rria, whọ rẹ sae ta nọ:
◼ “Okiẹdẹ nọ mẹ nyaze, ma rọwo nọ o gwọlọ omodawọ ulogbo taure a te ru otọakpọ na zihe ruọ aparadase udhedhẹ. Kọ who roro nọ ahwo-akpọ a wo oware nọ o gwọlọ re a ru iruo nana? [K’uvẹ kẹ uyo.] Iviena muẹrohọ oware nọ o soriẹ nọ u je fo nọ Ọghẹnẹ ọ rẹ j’owọ ruọ iruẹru ahwo.” Se Olezi 37:38. Who ve rovie kpohọ uwuhrẹ avọ 5 evaọ ibroshọ Ọghẹnẹ Ọ Gwọlọ na, whọ vẹ rehọ eria jọ evaọ edhe-eme 4-5 na ro dhesẹ epanọ Ọghẹnẹ o ti ro ru eruẹaruẹ nana gba. Nyaharo fodẹ uwuhrẹ Ebaibol kẹe evaọ ibroshọ na.
7 Otẹrọnọ wha ta kpahe Uvie Ọghẹnẹ who te fi ibroshọ “Ọghẹnẹ Ọ Gwọlọ” na họ ada evaọ iweze ọsosuọ ra, nọ who te bi zihe whọ rẹ sae ta ẹme wọhọ ọnana:
◼ “Okiẹdẹ nọ ma t’ẹme, ma sae vuhumu nọ Uvie Ọghẹnẹ yọ uvi egọmeti nọ o ti su otọakpọ na soso. Ebaibol na o dhesẹ nọ Kristi Jesu ọ rẹ te jọ osu riẹ. Kọ whọ sai roro kpahe irere jọ nọ e te jariẹ nọ ma te wo oghẹrẹ egọmeti gbe osu otiọna?” K’uvẹ kẹ uyo. Rovie ibroshọ Ọghẹnẹ Ọ Gwọlọ na kpohọ uwuhrẹ avọ 6. Rehọ eme no edhe-ẹme avọ 6-7 ze gbe uwoho nọ o rọ ẹwẹ-obe avọ 13, dhesẹ oware nọ Uvie Ọghẹnẹ o ti ru kẹ ohwo-akpọ evaọ obaro. Se Daniẹl 2:44, yọ u te kiehọ, dhesẹ obe Eriariẹ na kẹe jẹ fodẹ uwuhrẹ Ebaibol.
8 Whọ tẹ nyaku ohwo nọ ọ rọwo nọ egagọ akpọ na e wha ẹbẹbẹ se ohwo-akpọ no, whọ rẹ sae nọ onọ onana evaọ ozihebro ra:
◼ “Kọ who roro no ẹdẹjọ kpahe epanọ ma sae rọ riẹ egagọ nọ u wo ọjẹrehọ Ọghẹnẹ? [K’uvẹ kẹ uyo.] Ibroshọ ọnana Eme Ọghẹnẹ Ọ Gwọlọ Mi Omai? ọ kẹ eka nọ a re ro vuhu egagọ uzẹme.” Rovie kpohọ uwuhrẹ avọ 13, jẹ ta kpahe igogo eme isoi nọ a kere jẹlẹ na evaọ edhe-eme 3-7. Whọ rẹ sae nyaharo ta nọ: “Kugbe ẹgwọlọ egagọ uzẹme na, mai omomọvo ọ rẹ kiẹ riwi oware nọ Ọghẹnẹ ọ gwọlọ mi omai.” Se Jọn 4:23, 24. Ta nọ whọ te t’ẹme ọnana haro okiofa. Rovie kpohọ uwuhrẹ 1 evaọ ibroshọ na, je dhesẹ epanọ ma re ru uwuhrẹ.
9 Nọ who te zihe re whọ gbẹ taharo kpahe evawere uviuwou, whọ rẹ sae ta eme wọhọ enana:
◼ “Okenọ ma kake ruoma, mẹ ta k’owhẹ kpahe edidi evawere uviuwou, onọ o rọ efihiruo ohrẹ nọ o rọ Ẹme Ọghẹnẹ, Ebaibol na. Nọ a tẹ be t’ẹme kpahe ẹgwọlọ uviuwou inẹnẹ, kọ whọ rọwo nọ Ebaibol na ọ who hrọ manikọ o gbe w’iruo nẹnẹ?” K’uvẹ kẹ uyo. Fi obe Eriariẹ na họ ada. Rovie kpohọ uzou avọ 2, who ve se eme nọ ohwo jọ ọ ta evaọ edhe-ẹme avọ 13 na. Fi igogo eme nọ e rọ edhe-ẹme avọ 3 na hiruo, whọ vẹ fodẹ uwuhrẹ Ebaibol uviuwou.
10 Ẹkwoma okerefihotọ ọgbagba nọ ma re wo, ruẹrẹ oma kpahe ziezi, je zihe vẹrẹ vẹrẹ re ma bọ isiuru rai haro viere, ma jẹ sai dhesẹ oghẹrẹ uyoyou ọrivẹ nọ u re siwi ai ziọ edhere esiwo.—Mat. 22:39; Gal. 6:10.