‘Ẹme nọ A Ta Evaọ Ẹruoke’
1 Kọ ẹghale ovuẹ uzuazọ na kugbe amọfa o rrọ use-abọ k’owhẹ? Kọ who bi roro nọ whọ rẹ ta eme ilogbo jọ hrọ ro si enọ e be kezọ k’owhẹ urru? Evaọ okenọ Jesu o vi ilele riẹ vrẹ, ọ ta kẹ ae nọ: “Nọ wha te nya, wha hẹ vuẹ nọ, ‘Uvie odhiwu o kẹle ino.’ ” (Mat. 10:7) Ovuẹ na o jọ vevẹ o tẹ jẹ jọ lọlọhọ re a whowho iẹe. Nẹnẹ na u wo ohẹriẹ hẹ.
2 Ẹsibuobu umutho eme jọ ọvo o gwọlọ re a muọ ẹmeọta họ. Okenọ Filip o zere ọwharọ Ẹtiopia na, ọ nọ riẹ nọ: “Whọ riẹ [oware nọ] who re se na?” (Iruẹru 8:30) Ẹvẹ ẹmeọta-kugbe nọ o no ‘ẹme nọ a ta evaọ ẹruoke’ nana ze na ọ kẹ erere te!—Itẹ 25:11.
3 Whọ rẹ sae rehọ edhere ẹmeọta ọyena ruiruo evaọ odibọgba ra. Evaọ oghẹrẹ vẹ? Ẹkwoma ẹromuhotọ gbe ẹsalọ eme nọ i fo uyero na. Nọ onọ jọ, re whọ gaviezọ kẹ uyo na.
4 Enọ Jọ Nọ I w’Uzou: Re a muọ ẹmeọta họ, whọ rẹ sae dao enọ enana jọ:
◼ “Kọ whọ be hae lẹ Olẹ Olori (hayo, Ọsẹ Mai) na evaọ egagọ ra?” (Mat. 6:9, 10) Wariẹ abọ olẹ na jọ, re whọ ta nọ: “Ahwo jọ a rẹ nọ inọ, ‘Didi odẹ Ọghẹnẹ nọ Jesu ọ ta nọ o jọ fuafo (hayo, ọrẹri) na?’ Amọfa a rẹ nọ inọ, ‘Eme họ Uvie na nọ Jesu ọ ta nọ ma lẹ kẹ na?’ Kọ who duku iyo nọ e rẹ veva kẹ enọ enana no?”
◼ “Kọ whọ nọ no ẹdẹjọ inọ: ‘Eme họ otofa uzuazọ?’ ” Dhesẹ nnọ u w’obọ kpahe eriariẹ Ọghẹnẹ.—Ọtausi. 12:13; Jọn 17:3.
◼ “Kọ who roro nọ a ti si uwhu n’otọ ẹdẹjọ?” Rehọ Aizaya 25:8 gbe Eviavia 21:4 rọ kẹ uyo ogbagba.
◼ “Kọ ifue elọlọhọ jọ e riẹ kẹ ozighi nọ ọ rrọ akpọ na?” Dhesẹ nọ Ọghẹnẹ o wuhrẹ nnọ “you omọfa.”—Mat. 22:39.
◼ “Kọ erae i ti no obọ odhiwu ze te raha otọakpọ mai na ẹdẹjọ?” Dhesẹ eyaa Ebaibol na inọ otọakpọ na o te jọ bẹdẹ bẹdẹ.—Ol. 104:5.
5 Ta emamọ usi na evaọ edhere ọlọlọhọ, onọ o rẹ jọ vevẹ jegbe evaọ edhere ẹwo. Jihova ọ te ghale omodawọ ra re whọ ghale makọ ‘ẹme ọvo’ ọrọ uzẹme na kugbe amọfa.