Eme nọ E rọ Lọlọhọ jẹ rọ Vevẹ E Mai Woma
1 Fikieme ahwo a jẹ mae gaviezọ kẹ iwhowho-uvie emaha na nọ a tẹ be ghale ovuẹ Uvie na kẹ ai ẹsikpobi? Ẹjiroro ọvo jọ họ eme rai e rọ lọlọhọ. Iwhowho-uvie jọ a sai roro nọ re a se emamọ isẹri o gwọlọ ẹmeọta ziezi. Dede na, eware nọ a rọ ẹro ruẹ no i dhesẹ nọ ẹme nọ ọ rrọ lọlọhọ jẹ rrọ vevẹ họ onọ o mai woma.
2 Jesu o whowho Uvie Ọghẹnẹ evaọ edhere ọlọlọhọ, nọ o rọ vevẹ yọ o wuhrẹ ilele riẹ re a ru ere re. (Mat. 4:17; 10:5-7; Luk 10:1, 9) Ọ rehọ eme-emuhọ, enọ, gbe etadhesẹ nọ e rọ lọlọhọ ro wo ezọgaviẹ enọ e be kezọ kẹe jẹ nyate udu rai. (Jọn 4:7-14) U re woma re ma raro kele oriruo riẹ jẹ t’eme nọ a rẹ sai wo otoriẹ rai lọlọhọ.
3 “Ovuẹ usiuwoma uvie na” họ ovuẹ nọ ma re whowho. (Mat. 24:14) Who te ru Uvie na wọhọ ugogo uzoẹme ra u ti fiobọhọ ru ẹme ra lọhọ. T’ẹme kpahe eware nọ e rọ ọdawẹ enọ e be kezọ k’owhẹ na. Eyae e rẹ mai wo isiuru kpahe izoẹme nọ i kie kpahe uviuwou rai vi izoẹme esuo. Oware nọ o mae rọ ọdawẹ kẹ ọsẹ họ iruo riẹ gbe ufuoma uviuwou riẹ. Emoha a wo isiuru kpahe obaro rai; ahwo nọ e kpako no, a wo isiuru kpahe omokpokpọ gbe omofọwẹ rai. Ahwo a rẹ mai wo ọdawẹ kpahe eware nọ e via evaọ okogho rai vi enọ e via evaọ ẹkwotọ ugbothabọ. Nọ wha tẹ t’ẹme kpahe eme nọ a mai wo isiuru kpahe no, kpọ iroro kpohọ eghale nọ ahwo-akpọ ẹmeoyo a te reawere rai evaọ otọ esuo Uvie Ọghẹnẹ. Umutho eme nọ e rọ lọlọhọ, nọ a salọ ziezi kugbe ikereakere jọ o sae jọ edhere nọ ọ mai woma nọ a rẹ rọ kpare isiuru enọ e be gaviezọ k’owhẹ.
4 Whọ rẹ sai mu ẹmeọta họ ẹkwoma ẹta inọ:
◼ “Ababọ avro whọ te rọwo inọ eyao buobu nọ a rẹ sai siwi hi i bi kie ahwo-akpọ. Kọ whọ riẹ inọ Ọghẹnẹ ọ yeyaa nọ o ti si oghẹrẹ ẹyao kpobi jegbe uwhu no kẹle na?” Kuvẹ kẹ uyo, kẹsena who ve se Eviavia 21:3, 4.
5 Avọ eme nọ e rọ lọlọhọ jẹ rọ vevẹ, a jọ whọ nyate iroro gbe udu ahwo efa evaọ ẹkwotọ ra, fiobọhọ kẹ ae wuhrẹ kpahe Jihova gbe irẹro awere uzuazọ ebẹdẹ bẹdẹ.—Jọn 17:3.