Dhesẹ Uvi Isiuru—Ẹkwoma Oma Oruẹrẹ Kpahe
1 Oma nọ ma rẹ ruẹrẹ kpahe ziezi kẹ odibọgba na u re fi obọ họ kẹ omai dhesẹ uvi isiuru kpahe amọfa. Evaọ oghẹrẹ vẹ? Nọ ma tẹ ruẹrẹ oma kpahe ziezi, ma gbẹ ruawa ga hrọ kpahe epanọ ma re fi ẹme mai họ họ, ma vẹ sae rọ ere tẹrovi jẹ gaviezọ kẹ ohwo nọ ma be ta ẹme kẹ na. Ofariẹ, u re fi obọ họ kẹ omai nọ ma gbe nuhu hu evaọ ẹmeọta mai jẹ lẹliẹ omai ta ẹme na ududu. Rekọ ẹvẹ ma sae rọ ruẹrẹ oma kpahe nọ ẹme mai o je mu omai unu ziezi?
2 Rehọ Edhere Ẹmeọta nọ O Kiehọ ro Ruiruo: Jọ idhere usiuwoma ota nọ a jiroro rai fihọ Odibọgba Uvie Mai ọrọ January 2005 na salọ ojọ nọ u kiehọ kẹ ẹkwotọ rai, re who roro epanọ whọ sae rọ rehọ eme obọra tae. Kpọ ẹme na rri ẹkwotọ rai. Wọhọ oriruo, otẹrọnọ whọ be hae nyaku ahwo oghẹrẹ egagọ jọ hayo ẹvẹrẹ jọ, roro kpahe oware nọ u re si ai urru nọ whọ te ta kẹ ae. Ẹme ra nọ whọ rẹ kpọ rri ahwo nọ whọ be ta ẹme kẹ u re dhesẹ inọ who wo uvi isiuru kpahe ae.—1 Kọr. 9:22.
3 Nọ whọ be rehọ edhere usiuwoma ota na ro ruiruo na, hai nwene iei lele oghẹrẹ uyero sa-sa. Nọ eme-emuhọ na e roja gaga na, muẹrohọ oghẹrẹ nọ ahwo a be kpahe fihọ eme-emuhọ ra. Kọ oware nọ whọ gwọlọ tẹme kpahe na u si rai urru? Kọ a be kẹ uyo enọ nọ whọ nọ rai? O gbẹ rrọ ere he, ru inwene bẹsenọ whọ rẹ ruẹ edhere nọ o kiehọ.
4 Eware nọ I re Fi Obọ họ kẹ Ohwo Kareghẹhọ Ẹme: O rrọ bẹbẹ kẹ ahwo jọ re a kareghẹhọ edhere usiuwoma ota nọ a gwọlọ ro ruiruo nọ a tẹ nyate unuẹthẹ. O tẹ rrọ ere kẹ owhẹ, kọ whọ sae ta kẹ omọfa no re ọ keria gba owhẹ ruẹrẹ ẹme na kpahe, re whọ jẹ ta ẹme na kẹe yọ ọ be kezọ kẹ owhẹ? Onana o rẹ sai fi obọ họ kẹ owhẹ nọ ẹme na ọ jẹ jọ owhẹ iroro ziezi, whọ vẹ sae tae kẹ omọfa evaọ edhere ọlọlọhọ avọ ona. O rẹ sae jẹ lẹliẹ owhẹ ruẹrẹ oma kpahe re whọ sae kpahe fihọ oghẹrẹ ẹme sa-sa nọ ahwo a ta.
5 Oware ofa nọ u re fi obọ họ kẹ owhẹ kareghẹhọ oware nọ whọ te ta họ eme jọ nọ who re kere kpẹkpẹe fihọ omobe, whọ vẹ dhẹe duwu taure who te ti te unuẹthẹ na. Ahwo jọ a ruẹ nọ omobe utionana o rẹ lẹliẹ ai dhomamu, jẹ sae ta ẹme kugbe ahwo ziezi. Evaọ idhere enana, oma nọ ma rẹ ruẹrẹ kpahe ziezi o rẹ sai fi obọ họ kẹ omai dhesẹ uvi isiuru kpahe amọfa, o vẹ jẹ rọ ere wha ẹnyaharo họ emamọ usi nọ ma bi whowho na.