Dhesẹ Uvi Isiuru—Ẹkwoma Ẹme Ra nọ Who re Nwene
1 Pọl ukọ na o fi emamọ oriruo họ otọ evaọ edhere usiuwoma ota riẹ nọ o je nwene ẹsikpobi lele oghẹrẹ nọ uyero gbe iroro ahwo nọ ọ be t’ẹme kẹ e rrọ. (1 Kọr 9:19-23) Ma rẹ daoma ru epọvo na re. Ma tẹ ruẹrẹ oma kpahe, ma sae rehọ idhere ẹmeọta oriruo nọ e roma via evaọ Odibọgba Uvie Mai ro ruiruo kiehọ ẹgwọlọ ahwo nọ a rrọ ẹkwotọ mai. Nọ ma tẹ nyate unuẹthẹ, ẹsejọhọ ma ti muẹrohọ eware jọ nọ i dhesẹ oghẹrẹ eware nọ e rrọ isiuru kẹ ọnọ o wo uwou na, ma ve fi enana ba ẹmeọta mai. Dede na, edhere ọfa ọ riẹ nọ ma rẹ sai jo ru enwene evaọ odibọgba mai.
2 Kpọ Ẹme Ra Lele Ẹme nọ Amọfa A Ta: Ma tẹ be ta usiuwoma, ma be hae nọ ahwo nọ ma be t’ẹme kẹ enọ, ma ve je zizie ai re a kpahe fihọ iẹe. Kọ ẹvẹ who re rri ẹme nọ a be kpahe na? Kọ whọ rẹ gwọlọ kẹ uyere erueru ọvo, whọ vẹ ruabọhọ ẹme ra nọ whọ ruẹ kpahe? Hayo kọ ẹme ra o re dhesẹ nọ who bi roro kpahe uyo nọ ohwo nọ whọ be ta ẹme kẹ na ọ kẹ? Nọ who te dhesẹ uvi isiuru kpahe ẹme nọ amọfa a ta, whọ te sae rehọ areghẹ nọ enọ efa nọ i ti fiobọhọ kẹ owhẹ riẹ oware nọ o ginẹ rrọ iroro rai. (Itẹ 20:5) Whọ vẹ rọ enẹ tẹrovi abọ ovuẹ Uvie na nọ o mai kie kpahe oware nọ o rrọ ohwo na oja.
3 Onana o gwọlọ nọ u re no omai eva ze re ma ta kpahe izoẹme efa u te no onọ ma jiroro nọ ma te ta kpahe vẹre. Otẹrọnọ ma rehọ ẹbẹbẹ jọ nọ a t’ẹme te evaọ iyẹrẹ awhusi ro mu ẹme họ, kẹsena ọnọ o wo uwou na ọ tẹ fodẹ oware jọ nọ o via evaọ obonẹ hayo nọ o rrọ ọdawẹ kẹe, uvi isiuru mai re ma nyate ẹgwọlọ ohwo na o te w’omai re ma kpọ ẹmeọta Ebaibol mai na rri ugogo oware yena nọ o mae rrọ ọdawẹ kẹe na.—Fil 2:4.
4 Ẹme Mai nọ Ma re Nwene: Nọ ohwo nọ ma be t’ẹme kẹ ọ tẹ nọ onọ, o rẹ mai woma re ma ruabọhọ ẹmeọta na okeofa nọ ma tẹ kiẹ evuẹ efa kpahe ẹme na no. Ma sae jẹ kẹe obe ukoko na nọ o ta ẹme kpahe ẹme na ziezi. Enana kpobi i re dhesẹ uvi isiuru mai nọ ma gwọlọ ro fiobọhọ kẹ amọfa re a ze te riẹ Jihova.—2 Kọr 2:17.