Ruẹrẹ Oma Kpahe kẹ Iruo Iwoma Kpobi
1 Nọ Jesu o je vi ilele riẹ re a nyae ta usiuwoma na, o wuhrẹ i rai tao. (Mat. 10:5-14) Dede nọ eware e vọ omai kpobi obọ, omoke jọ nọ ma rẹ rọ ruẹrẹ oma kpahe taure ma te kpohọ usiuwoma nuwou ruọ uwou na u re fi obọ họ k’omai wo emamọ iyẹrẹ.—2 Kọr. 9:6.
2 Epanọ Ma rẹ rọ Ruẹrẹ Oma Kpahe: Oghẹrẹ nọ ma re ro mu oma họ ẹruẹrẹ kpahe họ ma rẹ daoma riẹ oware nọ o rrọ obe nọ ma gwọlọ fihọ ada. Ma re je roro kpahe ahwo nọ a rrọ ẹkwotọ mai. Eware vẹ e rrọ ẹbẹbẹ kẹ ae? Didi oghẹrẹ iwuhrẹ egagọ a jọ ẹkwotọ na rọwo? Ma sai rri idhere usiuwoma ota oriruo nọ e rrọ Odibọgba Uvie Mai gbe omobe ọ Epanọ A ro Muhọ Jẹ Ruabọhọ Ebaibol E rọ Jiroro.
3 Idhesẹvia nọ a be hae jọ Ewuhrẹ Odibọgba na ru nọ ma re muẹrohọ ziezi u ti fi obọ họ k’omai re. Nọ ma bi wo ẹnyaharo evaọ ona usiuwoma ota ziezi na, o gbẹ te gwọlọ oke thethei mi omai nọ ma rẹ rọ ruẹrẹ oma kpahe he. Rekọ, ma te roro kpahe oware nọ ma te ta taure ma te ti kpohọ usiuwoma ẹsikpobi, jẹ daoma ru ona usiuwoma ota mai woma ziezi, ẹsiẹe ẹme mai ọ te mae nyate ahwo udu. U te je fo nọ ma re rri ẹkpa usiuwoma ota mai re ma ruẹ nọ ebe nọ ma ti fihọ ada e riẹ.
4 Eme o ti fi obọ họ k’omai kareghẹhọ ẹme nọ ma ruẹrẹ họ? Oware jọ nọ u re fi obọ họ k’omai họ, ma re wuhrẹ oghẹrẹ nọ ma te rọ tae do via. Ahwo jọ a re ru odhesẹvia epanọ a rẹ rọ ta usiuwoma evaọ etoke uwuhrẹ uviuwou rai. Efa a ruẹ nọ u re fi obọ họ nọ a te kere eme nọ a te ta na kpẹkpẹe fihọ omobe, a vẹ dhẹe du taure a te ti te unuẹthẹ.
5 Erere nọ Ọ Riẹ: Oma nọ ma rẹ ruẹrẹ kpahe ziezi u re ru omai wo ona ziezi je wo oghọghọ evaọ iruo odibọgba na. U re fi obọ họ kẹ omai dhomamu jẹ ta ẹme ududu kẹ ahwo. U re ru nọ ma te sae rọ gaviezọ ziezi kẹ ohwo nọ ma bi lele ta ẹme viukpenọ ma re roro kpahe oware nọ ma be te ta ọvo. Ofariẹ, ma tẹ riẹ oware nọ o rrọ eva obe, o te lẹliẹ omai ta ẹme avọ ajọwha nọ ma te bi fi ei họ ada.
6 Ikereakere na e ta udu họ omai awọ nọ ma “thọomavẹre kẹ iruo oruọzewọ kpobi.” (Tait. 3:1) Didi iruo i woma vi iruo usiuwoma ota na? Ma tẹ ruẹrẹ oma kpahe ziezi, u re dhesẹ nọ ma wo adhẹẹ kẹ ohwo nọ ọ rọwo nọ ọ rẹ gaviezọ k’omai, gbe Jihova Ọghẹnẹ nọ o vi omai uwou na.—Aiz. 43:10.