Epanọ Ma Sai ro Wo Onaa Ziezi Evaọ Usiuwoma Ota—Ruẹrẹ Ẹme-Emuhọ Ra Họ Ziezi

Oware nọ U ro Wuzou: Ẹme-emuhọ mai ọ gbẹ were he, ẹsejọhọ ohwo nọ ma gwọlọ ta usiuwoma kẹ na ọ te kẹ omai uvẹ ta ẹme na ha. Fikiere, iwhowho-uvie buobu a rri nọ ẹme-emuhọ rai o wuzou gaga evaọ usiuwoma ota. Dede nọ iriruo usiuwoma ota e rrọ Odibọgba Uvie Mai gbe obe ọ Ebaibol E rọ Jiroro na, ma rẹ sai nwene ẹme-emuhọ na re o were ohwo nọ ma be ta usiuwoma kẹ. Fikiere, o te mai woma re ma ruẹrẹ ẹme-emuhọ mai họ ziezi ukpenọ ma rẹ ta ẹme kpobi nọ o ziọ omai iroro.—Itẹ 15:28.

Epanọ A re ro Ru Ei:

Salọ uzoẹme nọ whọ gwọlọ ta kpahe. Uzoẹme na o rẹ rọwokugbe obe nọ whọ gwọlọ kẹ ohwo na, o vẹ jẹ jọ onọ o rẹ were ahwo ẹkwotọ ra.
Romatotọ ruẹrẹ ẹme nọ whọ te ta họ nọ who te yere ohwo na no. Whọ sae ta ọkpọ eme itiena: “Mẹ nyaze fikinọ . . . ,” “Ahwo buobu a be ruawa kpahe . . . ,” “Ivie mẹ gwọlọ nọ owhẹ onọ jọ . . . ,” hayo ẹme ọfa. Eme ekpẹkpẹe nọ e rrọ vevẹ e rẹ mai woma. Iwhowho-uvie jọ a re wuhrẹ ẹme-emuhọ rai fihọ uzou re o siọ ae ẹro ba ẹthọrọ.
Ruẹrẹ onọ jọ họ nọ whọ rẹ sae nọ re ohwo na ọ ta onọ ọ riẹe eva. (Mat. 17:25) Riẹ nọ ohwo na o je roro eware efa taure whọ tẹ te nyaze, fikiere onọ na o rẹ jọ onọ o rẹ bẹe ẹza hayo kpomovuọ họ iẹe oma ha.

Dao Onana Evaọ Amara Na:

Wha jọ egagọ uviuwou rai fi oke jọ họ nọ wha rẹ rọ ruẹrẹ ẹme-emuhọ họ je ru odhesẹvia epanọ wha te rọ rehọ iẹe ta usiuwoma.
Whọ tẹ rrọ usiuwoma, vuẹ oniọvo nọ wha gbẹ rrọ usu na ẹme nọ whọ ruẹrẹ họ nọ whọ te ta. (Itẹ 27:17) Otẹrọnọ ẹme-emuhọ ra o were tere he, daoma nwene iei.