Rehọ Omobe “Eware nọ Ma Sai Wuhrẹ Evaọ Ebaibol Na” Mu Ẹme Họ Kugbe Ahwo
1. Obe okpokpọ vẹ ma wo nọ u re fiobọhọ kẹ omai evaọ usiuwoma na?
1 Ẹvẹ ma sae rọ rehọ omobe “Eware nọ Ma Sai Wuhrẹ Evaọ Ebaibol Na” rọ ruẹrẹ ẹme nọ ma te ta họ evaọ usiuwoma? Omobe na u wo eria Ebaibol nọ a ruẹrẹhọ otọ izoẹme sa-sa nọ o rẹ sai fiobọhọ kẹ omai mu ẹme họ kugbe ahwo lọlọhọ.
2. Ẹvẹ ma sae rọ rehọ omobe “Eware nọ Ma Sai Wuhrẹ Evaọ Ebaibol Na” ta usiuwoma?
2 Whọ sae salọ onọ avọ 8 na jẹ ta nọ: “Ma be ta ẹme kpẹkpẹe kugbe ahwo kpahe onọ nana, ‘Kọ Ọghẹnẹ ọ be wha uye-oruẹ ahwo-akpọ ze?’ [Evaọ ekwotọ jọ, who te dhesẹ onọ na kẹ ohwo na o rẹ mai woma.] Ẹvẹ who rri rie? [Kuvẹ kẹ uyo.] Ebaibol na ọ kẹ uyo ogbagba onọ nana.” Se jẹ ta kpahe oria ikereakere jọ no Ebaibol na ze. Otẹrọnọ ohwo na o dhesẹ isiuru, whọ sai dhesẹ enọ 20 nọ e rrọ obe na kẹe jẹ vuẹe re ọ salọ onọ o were riẹ nọ wha te ta kpahe ẹdẹ ọfa. Hayo whọ sae kẹe obe jọ nọ ma re ro wuhrẹ kugbe ahwo nọ o gbẹ ta kpahe uzoẹme nọ who ru vẹ kẹe na.
3. Ẹvẹ ma sae rọ rehọ omobe “Eware nọ Ma Sai Wuhrẹ Evaọ Ebaibol Na” ta usiuwoma evaọ ẹkwotọ nọ ahwo a jọ rrọ egagọ Ileleikristi hi?
3 Onọ avọ 4 gbe 13 rite 17 o rẹ sai fiobọhọ gaga evaọ ẹkwotọ nọ ahwo a jọ rrọ egagọ Ileleikristi hi. Wọhọ oriruo, whọ sae salọ onọ avọ 17 na jẹ ta nọ: “Ma be ta ẹme kpẹkpẹe kugbe ahwo kpahe oware jọ nọ u re fiobọhọ kẹ iviuwou. Ababọ avro, iviuwou e be rẹriẹ ovao dhe ebẹbẹ buobu enẹna, o gbẹ rrọ ere? [Kuvẹ kẹ uyo.] Oria ikere nana u fiobọhọ kẹ ezae avọ eyae buobu no: “Jọ aye o wo adhẹẹ odidi kẹ ọzae riẹ.” [U du gwọlọ nọ whọ rẹ vuẹ ohwo na nọ obe Ahwo Ẹfisọs 5:33 ẹme na o no ze he. Otẹrọnọ aye who bi lele ta ẹme, whọ sai dhunu te eme nọ e rrọ Ahwo Ẹfisọs 5:28.] Kọ who roro nọ ọzae-avọ-aye a te fi onana họ iruo, orọo rai u ti wo evawere?”
4. Eme whọ rẹ sai ru nọ who te ku ẹme họ no kugbe ohwo nọ ọ rrọ egagọ Ileleikristi hi?
4 Nọ wha tẹ ta ẹme na kuhọ no, wha ve fi ẹdẹ họ nọ who ti ro zihe re wha gbẹ ta ẹme na haro. Whọ sae ta kpahe oria ikere ọfa nọ o rrọ otọ onọ nọ wha ta kpahe na evaọ ẹdẹ ọfa. Evaọ oke nọ whọ riẹ nọ u kiehọ, vuẹ ohwo na nọ eme nọ whọ be ta na e rrọ evaọ Ebaibol. Rọ ẹkwoma ẹme nọ who lele ohwo na ta no gbe oghẹrẹ nọ o rri Ebaibol na kẹe obe nọ whọ riẹ nọ o te were iẹe.—Rri uko-obeva Odibọgba Uvie Mai ọrọ Akpegbivẹ 2013.