Ẹthẹ Iruo Ọkẹkẹe O Rovie Fihọ
1 Wọhọ ọnọ o re whowho emamọ usi na avọ ọwhọ, Pọl ọ jẹ rọ osegboja kiẹ ekwotọ nọ ẹgwọlọ e jẹ mae rro, ọvo rai jọ họ okpẹwho ọ Ẹfẹsọs. O wo obokparọ evaọ obei te epanọ o ro kere se ibe Ileleikristi riẹ nọ: “Ẹthẹ iruo o rovie fihọ kẹ omẹ.” (1 Kọr. 16:9) Pọl o te gbe ruiruo evaọ ẹkwotọ ọyena je fiobọhọ kẹ ahwo Ẹfẹsọs buobu zihe ruọ enọ e rọwọ.—Iruẹru 19:1-20, 26.
2 Nẹnẹ na, a rovie ẹthẹ iruo ọkẹkẹe fihọ k’omai. A k’omai uzizie re ma fiobọhọ kẹ ikoko nọ e be sai ru ẹkwotọ rai kpobi re he evaọ k’ukpe k’ukpe. Fikiere omodawọ mai o rẹ sae ruẹrẹ ẹgwọlọ nọ ọ rọ eria itieye na họ.—Wawo 2 Ahwo Kọrint 8:13-15.
3 Kọ Whọ Sae Ruiruo Evaọ Oria nọ Ẹgwọlọ Ọ Jọ Mae Rro? Kọ whọ rehọ oma olẹ roro kpahe epanọ o rẹ lọhọ te re who ruiruo evaọ oria ofa no? Ẹsejọhọ whọ rẹ sai fiobọhọ kẹ ukoko jọ evaọ okpẹwho nọ whọ be rria. Kọ eme who gbe lele ọsẹro okogho ra t’ẹme ọnana ha re whọ ruẹ ẹjiroro riẹ? Hayo o sae jọ nọ evaọ udevie ẹkwotọ ukoko ra, ogbotu ahwo nọ i diezọ hayo ahwo evẹrẹ efa e riẹ nọ ohwo ọvo ọ re sai fiobọhọ kẹ hẹ. Re a sai ru ẹgwọlọ ọnana gba, kọ whọ sae daoma ra re who wuhrẹ evẹrẹ rai? Yọ ofariẹ re, ẹsejọhọ utu ẹvẹrẹ hayo ukoko jọ o kẹle etẹe nọ a be ‘lẹ Olori na kẹ iruiruo Uvie efa.’ (Mat. 9:37, 38) Otẹrọ ere, kọ whọ sai fiobọhọ?
4 Evaọ umutho ikpe ikpe nọ e vrẹ na, idu iviuwou Ileleikristi a nya kpohọ ekwotọ efa re a wo abọ ọvọvọ no evaọ iruo ivuẹvu na. Imava-orọo jọ nọ i ru onana a ta nọ: “Ma gwọlọ gọ Jihova evaọ oria nọ ma jẹ sae mai fiobọhọ.” Otẹrọnọ who wo ẹgwọlọ ọnana yọ whọ ruẹ nọ o lọhọ re who kpohọ oria ofa evaọ orẹwho onana hayo otẹrọnọ who te re who ruiruo evaọ ẹkwotọ ọfa, kaki lele ekpako ukoko ra t’ẹme kpahe ẹjiroro na tao.
5 Whọ tẹ gwọlọ nọ mi Ukoko-Ulogbo kpahe oria nọ ẹgwọlọ ọ rọ, who re kere ileta, who ve dhesẹ ugogo ẹgwọlọ ra fihọ iẹe whọ vẹ rehiẹ kẹ Ogbẹgwae Iruo Ukoko na. A ti kuọ eme rai kugbei a ve vi ei se Ukoko-Ulogbo. Evaọ oghẹrẹ kpobi, nọ ẹthẹ ologbo kẹ iruẹru o gbe rovie fihọ na, jọ mai kpobi ma gbe ru iruo buobu evaọ egagọ Jihova.—I Kọr. 15:58.