Fiobọhọ kẹ Erivẹ-Orọo nọ E rọ Isẹri Hi
1 O rẹ jọ oware oghọghọ ulogbo otẹrọnọ imava-orọo a kuomagbe evaọ egagọ uzẹme. Dede na, evaọ iviuwou buobu omọvo evaọ imava-orọo na họ ọnọ ọ jẹ edhere uzẹme rehọ no. Kọ ẹvẹ ma sai ro fiobọhọ kẹ erivẹ-orọo enana nọ e rọ Isẹri hi na jẹ tudu họ ae awọ re a lele omai gọ Jihova?—1 Tim. 2:1-4.
2 Wo Otoriẹ Iroro Rai: Dede nọ erivẹ-orọo jọ nọ e rọ Isẹri hi a re dhesẹ ọwọsuọ, ẹsibuobu ababọ-osegboja hayo seba-ẹrọwokugbe họ ẹbẹbẹ na. Ohwo ọ rẹ sai wo iroro nnọ a bi rri rie vo hayo o re dhesẹ ihri-eriọ kpahe isiuru ẹzi ọkpokpọ ọrivẹ-orọo riẹ. Ọzae uwou-orọo jọ ọ ta nọ: “Nọ mẹ ọvo mẹ tẹ rọ uwou, o rẹ wọhọ nọ a se omẹ no.” Ọfa jọ ọ ta nọ: “O rọ omẹ oma wọhọ ẹsenọ aye gbe emọ mẹ a bi gbabọ k’omẹ.” Ezae jọ a rẹ sai roro nọ a bi ku uviuwou rai fiẹ fihọ egagọ jọ. (Rri Uwou-Eroro Na, August 15, 1990 (ọrọ Oyibo), ẹwẹ-obe avọ 20-23.) Oye o soriẹ nọ o jẹ mai woma, nọ o tẹ lọhọ, re ọzae na ọ hae jọ kugbe aye riẹ evaọ ọruẹrẹfihọ obe uwuhrẹ Ebaibol no oke emuhọ ze.
3 Ruiruo Kugbe Wọhọ Utu: Imava-orọo jọ a ruiruo kugbe ziezi evaọ obufihọ kẹ ahwo nọ a rọo no ziọ ukoko na. Nọ oniọvo ọmọtẹ na o te mu obe uwuhrẹ họ kugbe aye na no, oniọvo ọmọzae na o ve weze bru ọzae na. Ẹsibuobu ọ rẹ sai mu obe uwuhrẹ họ kugbe ọzae na.
4 Wo Oma Ogbẹnyusu Avọ Ọrara-Ọghọ: Iviuwou nọ e rọ ukoko na a rẹ sai fiobọhọ ẹkwoma isiuru nọ a re wo kpahe iviuwou nọ i ti kuomagbe evaọ egagọ uzẹme na ha. Umutho iweze ogbẹnyusu e rẹ sai fiobọhọ kẹ ọrivẹ-orọo nọ ọ rọ Osẹri hi na re ọ ruẹ Isẹri Jihova wọhọ Ileleikristi nọ e rọ sasasa, avọ ẹruọsa enọ i wo ewoma ohwo kpobi fihọ udu.
5 N’oke ruoke, ekpako na a rẹ sae kiẹ omodawọ nọ a ru kẹle riwi re a fiobọhọ kẹ erivẹ-orọo nọ e rọ Isẹri hi a ve roro oware ofa nọ a rẹ sai ru avọ ẹruore nnọ a ti wo obokparọ rehọ ai bru Jihova ze.—1 Pita 3:1, ẹme-otofa, NW.