Enọ Ahwo nọ A s’Ebe

Kọ u fo re omọvo Isẹri Jihova o kpohọ ehaa-orọo omoni riẹ hayo ogbẹrioma nọ ọ rrọ osẹri hi?

Ehaa-orọo yọ etoke evawere, yọ wọhọ epanọ o rẹ jọ ohwo kpobi oma, Oleleikristi ọ rẹ gwọlọ jariẹ. Dede na, nọ a te zizie emaha, u fo re a nọ esẹgbini rai hayo ahwo nọ a rrọ otọ rai, enọ e rẹ ta onọ a re ru kẹ ai. (Ahwo Ẹfẹsọs 6:1-3) Kọ otẹrọnọ ọzae nọ ọ rrọ omọvo Isẹri Jihova ha ọ ta kẹ aye riẹ nọ ọ rrọ omọvo Isẹri Jihova inọ o lele iei kpohọ ehaa-orọo nọ a ti ru evaọ ichọche? Obroziẹ-iroro riẹ ọ sae kẹe uvẹ re ọ nya wọhọ ohwo nọ ọ nyai rri ọvo, jẹ gbaemu inọ o ti wabọ evaọ oware egagọ ovuọvo nọ a ti ru evaọ etẹe he.

Sọ ohwo o re kpohọ ehaa-orọo itieye na hayo ọ rẹ nya ha yọ ẹme omobọ ohwo. Dede na, u fo re Oleleikristi kpobi ọ kareghẹhọ inọ o ti guọvunu kẹ Jihova yọ u fo re o roro kpahe ehri-izi Ikereakere jọ nọ ọ tẹ be jiroro sọ o re kpohọ ehaa-orọo ohwo nọ ọ rrọ ukoko ho.

Oware nọ o rẹ mae jọ Oleleikristi oja họ epanọ o re ro wo ọjẹrehọ Ọghẹnẹ. Jesu ọ ta nọ: “Ọghẹnẹ họ ẹzi, enọ e be gọ e, e rẹ rọ ẹzi gbe uzẹme gọ e hrọ.” (Jọn 4:24) Fikiere, Isẹri Jihova a re wobọ evaọ ọgwakugbe-ẹrọwọ họ, wọhọ elẹ hayo iruẹru egagọ nọ e wọso uwuhrẹ Ebaibol.—2 Ahwo Kọrint 6:14-17.

Oleleikristi o re vuhumu nọ iroro kpobi nọ ọ jẹ e rẹ sai kpomahọ amọfa. Whọ tẹ jiroro nọ whọ rẹ nya, kọ o te dha imoni ra eva nọ who gbe wobọ evaọ iruẹru orọo na evaọ obọ ichọche na ha? U re je fo re who roro kpahe epanọ o te jọ ibe Ileleikristi ra oma nọ whọ tẹ nya. (Ahwo Rom 14:13) O tẹ makọ rrọ nọ whẹ hayo ahwo uviuwou ra a ku rie họ inọ ekpohọ ehaa-orọo omoni rai jọ evaọ obọ ichọche o te wha ẹbẹbẹ ze he, kọ who roro no sọ o sai ti kpomahọ inievo Ileleikristi ra yoyoma? Kọ o sai ti ru otujọ zoruẹ?

Ekpohọ ehaa-orọo omoni ohwo evaọ obọ ichọche o sae wha iyero ebẹbẹ jọ ze. Kọ otẹrọnọ a tẹ ta kẹ owhẹ inọ whọ jọ usu ahwo nọ a re lele imava nọ e be rọo na? Kọ otẹrọnọ ọrivẹ orọo ra ọ rrọ ukoko ho yọ ọ gwọlọ nọ ọ rẹ jọ ehaa-orọo na wabọ vọvọ? Otẹrọnọ oria ofa jọ a ti jo ru ehaa-orọo na yọ oguẹdhọ hayo ohwo egọmeti ọ te whẹ imava na gbe, re a jariẹ o sae te nwane jọ ẹbẹbẹ hẹ keme onana yọ iruẹru uzi egọmeti gheghe nọ u wobọ kugbe egagọ họ.

Dede na, o gwọlọ omoyọrọ ulogbo nọ o tẹ rrọ ehaa-orọo nọ a bi ru evaọ uwou egagọ hayo nọ osu egagọ ọ te jọ whẹ imava na gbe. Re whọ ruẹsi ru lele obroziẹ-iroro ra nọ whọ rehọ Ebaibol wuhrẹ no jẹ whaha obọ-urolo kẹ orọwọ ra hayo eruo oware nọ ọ rẹ sae wha omovuọ se imava nọ e be rọo na, whọ sae jiroro nọ whọ be nya ha. (Itẹ 22:3) Whọ sae whaha idhọvẹ nọ whọ rẹ wha se uviuwou ra gbe omara ẹkwoma orọwọ ra nọ whọ rẹ kake ta vevẹ kẹ ae re oke u te ti te, dhesẹ epanọ whọ te sae jọ ehaa-orọo na wobọ te hayo oware ofa nọ who roro nọ o te mai kiehọ.

Nọ a tẹ roma totọ roro jẹ kiẹ kpahe ẹme na no, Ileleikristi jọ a sae jiroro nọ o thọ họ re a kpohọ ehaa-orọo omoni rai evaọ ichọche wọhọ enọ e rẹ jọ oria ovo rri ọvo. Rekọ otẹrọnọ Oleleikristi o roro i rie inọ ọ tẹ nya, o te jọ odawọ kẹe re o rolobọ kẹ ehri-izi Ebaibol, ọ sai ku ei họ inọ ẹbẹbẹ nọ o ti noi ze ọ rro vi erere riẹ. Ọ tẹ jiroro nọ o re kpohọ obọ ichọche na ha, rekọ fikinọ a zizie i rie na, o re kpohọ oria nọ a te jọ ghọ enọ i kpohọ ehaa-orọo na, ọ rẹ gbaemu inọ o re “ru [eware] kpobi rọ kẹ Ọghẹnẹ oruaro.” (1 Ahwo Kọrint 10:31) Evaọ iroro-ejẹ itieye na, “kohwo kohwo ọvuọ uye riẹ ọ rẹ te wha.” (Ahwo Galesha 6:5) Fikiere, onọ whọ jiroro nọ who re ru kpobi, kareghẹhọ nọ ẹyọrọ obroziẹ-iroro ọfuafo evaọ aro Ọghẹnẹ u wuzou gaga.