Ẹkpẹti Onọ
◼ Otẹrọnọ imava nọ e be rọo a gwọlọ jọ Ọgwa Uvie ru orọo rai, eware vẹ o gwọlọ nọ a rẹ jiroro ai kugbe ekpako na?
Ọruẹrẹfihotọ ehaa orọo nọ a ru lele ehri-izi Ebaibol o rẹ wha ọghọ se Jihova. Onana o mae rrọ ere kpahe ehaa orọo nọ a jọ Ọgwa Uvie ru, keme ahwo a re rri oware kpobi nọ a jọ Ọgwa Uvie ru kiekpahe ukoko na. Nọ ahwo nọ a gwọlọ rọo a tẹ yare Ọgwa Uvie kẹ ehaa orọo rai, o gwọlọ nọ ekpako ukoko nọ e be jọ Ọgwa Uvie na ru ewuhrẹ a lele ai jiroro kpahe ọruẹrẹfihotọ na re ‘eware kpobi e nya kpatiẹ ziezi.’—1 Kọr. 14:40.
Imava nọ e be rọo nọ a gwọlọ jọ Ọgwa Uvie ru ehaa orọo rai a re kere ileta ayare se ogbẹgwae iruo ukoko nọ o be jọ Ọgwa Uvie na ru ewuhrẹ. Ileta rai na i re dhesẹ ẹdẹ gbe oke nọ a ti ro ru ehaa orọo na, a ve je vi ileta na se ogbẹgwae iruo ukoko na ẹruoke. A re woi họ iroro inọ ekpako na a ti nwene oke nọ a be hae rọ jọ Ọgwa Uvie na ru iwuhrẹ fiki ehaa orọo ho. Ofariẹ, ọzae avọ aye na a rẹ jọ ahwo nọ a wo emamọ edikihẹ evaọ ukoko na, nọ e be nya lele ehri-izi Ebaibol gbe itee ikiẹrẹe Jihova.
Re a ruẹ nọ ehaa orọo na e wha orro se Ọghẹnẹ mai, ọzae avọ aye na a re lele ogbẹgwae iruo ukoko na jiroro epanọ ọruẹrẹfihotọ ehaa orọo na ọ te jọ taure a te ti ku ọruẹrẹfihotọ rai họ. Dede nọ ekpako na a rẹ gba ẹjiroro obọ rai họ enọ e be rọo na ha, a rẹ kpọ oware kpobi nọ a muẹrohọ nnọ o nya lele itee ukoko Jihova ha vi. Ile nọ a salọ no Kingdom Melodies ze hayo nọ e rrọ obe-ile mai na ọvo a rẹ jọ Ọgwa Uvie na kporo. Taure a te ru oware jọ kpobi fihọ Ọgwa Uvie na nọ u re fi eru bae hayo go egbara na fihọ oghẹrẹ ofa, ekpako na a re kuenu kẹe tao. Otẹrọnọ a te rehọ iwoho hayo vidio eware nọ a bi ru na, a re muẹrohọ nọ onana u si adhẹẹ no ehaa na ha. Otẹrọnọ ohwo nọ ọ rrọ omọvo Isẹri Jihova ha ọ be te jariẹ re o fi ahwo họ iwoho, ọzae nọ ọ be rọo na ọ rẹ ruẹ nọ ọ vuẹ ohwo na kpahe emamọ ẹgọ nọ ọ rẹ wha, ohwo na ọ rẹ rọ ere dhesẹ ọghọ kẹ ehaa na. Ekpako na a sae kuvẹ re a jọ Ọgwa Uvie na wuhrẹ epanọ a te jọ ehaa orọo na ru thakpinọ u kpomahọ iwuhrẹ ukoko hayo ọruẹrẹfihotọ efa ha. A re fi uvumọ obe-uzizie họ ebọdo evuẹ na ha. Rekọ, ekpako na a sae jọ Ewuhrẹ Odibọgba ru owhowhovia kpẹkpẹe rọ jẹ ukoko na riẹ kpahe ehaa orọo nọ a te jọ Ọgwa Uvie na ru.
Dede nọ o rrọ utee he re te emezae te emetẹ nọ i re ko oghẹrẹ iwu evona nọ e rẹ jọ usu kugbe ọzae avọ aye na a jọ enọ e họ-ame no ho, u fo vievie he re ahwo nọ a bi yeri uzuazọ rai nya lele ehri-izi Ebaibol ho hayo nọ uruemu rai o rẹ sae wha enọ fihọ amọfa udu a jọ ehaa na w’obọ. Otẹrọnọ ọkpako ukoko ọ riẹ, ọye ọ rẹ kẹ ovuẹ orọo na. Ekpako yọ iwuhrẹ Ẹme Ọghẹnẹ nọ i te ziezi, fikiere ae họ ahwo nọ a mai te nọ a te riẹ ẹme otiọye nọ o wuzou gaga na ru no Ikereakere na ze.—1 Tim. 3:2.
Nọ o rọnọ eware nọ a jọ ehaa orọo na ru e rẹ sai kpomahọ ọkpako nọ ọ te kẹ ovuẹ orọo na, a rẹ vuẹe kpahe ọruẹrẹfihotọ ehaa orọo na evaọ ẹruoke. Ọ te keria kugbe imava nọ e be rọo na ọ vẹ nọ ai kpahe uruemu rai evaọ etoke nọ a jẹ rọ nya usu orọo na; o gwọlọ nọ imava nọ e be rọo na a rẹ ta eva rai vevẹ kẹ ọkpako na. Otẹrọnọ ọzae na hayo aye na ọ rọo no ẹdẹjọ, ọ rẹ kẹ imuẹro nọ i re dhesẹ vevẹ inọ evaọ abọ Ikereakere na gbe abọ-uzi egọmeti, o wo udu nọ ọ sae rọ wariẹ rọo. (Mat. 19:9) O gwọlọ nọ a re dhesẹ oware nọ o rẹ kẹ imuẹro nọ a ginẹ fa orọo na kẹ ọkpako na.
Nọ imava nọ e be gwọlọ rọo na a tẹ rọ eva rai kpobi lele ekpako na jiroro jẹ nya lele ithubro nọ a te kẹ ai, ehaa orọo na e te wha evawere se ahwo kpobi.—Itẹ 15:22; Hib. 13:17.