Kọ Whẹ yọ Osẹri ọ Oke-Kpobi?
1 Kọ whọ te k’uyo E kẹ onọ onana? Dede nọ idibo Jihova kpobi nọ e rọ oma mudhe no e rẹ sai fi odẹ h’otọ kẹ odibọgba oke-kpobi na ha, kọ o gbẹ rọ oware iroro re a rẹro nnọ mai kpobi ma re rri oma mai wọhọ Isẹri oke-kpobi riẹ? Ẹhẹ, ma re ru ere.
2 Ma wo oware utioye he wọhọ Oleleikristi ubroke. Jesu ọ ta kpahe Ọsẹ riẹ nọ: “Me bi ru eware nọ e be were iẹe kẹse kẹse.” (Jọn 8:29) Pọl, ọnọ o wo oghẹrẹ iroro ọvo na, ọ kpakpa omai re ma ‘ru eware kpobi rọ kẹ Ọghẹnẹ oruaro.’ (1 Kọr. 10:31) Fikiere, evaọ oghẹrẹ kpobi, mai kpobi a re rri omobọ mai wọhọ Isẹri oke-kpobi erọ Jihova. Nọ ma te roro evaọ edhere ọnana, u re kpomahọ omai wowoma evaọ iruo kpobi nọ ma bi ru.
3 Roro Imuẹro Na: Eriwo mai, ẹme-unu mai, gbe uruemu mai e rẹ sai dhesẹ kẹ amọfa inọ mai ghinọ Isẹri Jihova. Ma re w’iroro kpahe ẹgwọlọ ọrọ eriwo ọkpakpatiẹ, ẹme-unu owoma, gbe emamọ uruemu evaọ oke kpobi nọ ma rọ usiuwoma hayo bi kpohọ iwuhrẹ Ileleikristi. Dede na, makinọ ma bi kpohọ isukulu, bi ruiruo evaọ akiruo, hayo be zaharo, oware kpobi kpahe omai u re dhesẹ imuẹro inọ ma be rria lele ute okiẹrẹe Jihova.
4 Jesu ọ ta nọ: “Ẹwho nọ ọ rọ ehru ugbehru a sai si ei no ho. . . . Ru re elo rai o lo iraro ahwo, re a ruẹ iruo iwoma rai, a jiri Ọsẹ rai nọ ọ rọ obọ odhiwu.” (Mat. 5:14-16) Ere o rẹ jọ evaọ oware kpobi nọ ma re ru gbe evaọ oke kpobi. Otẹrọnọ ma ruẹ nọ ma bi wo ehoo isẹri-ise fikiọ oria nọ ma rọ hayo oware nọ ma bi ru, u re fo re ma nọ omobọ mai inọ, ‘Kọ mẹ be gọ Jihova evaọ ubro-oke manikọ oke-kpobi?’ Wha joma siobọno uvẹ ẹme-ọta kẹ amọfa ha kpahe emamọ usi Uvie Ọghẹnẹ na.
5 Kareghẹhọ, ma rẹ kẹ Jihova adhẹẹ je ru ei eva were okenọ ma tẹ sae k’uyo onọ na, “Kọ whẹ yọ Osẹri ọ oke-kpobi?” avọ “E!” nọ u do via ziezi.