“Ru Eware Kpobi rọ Kẹ Ọghẹnẹ Oruaro”

NỌ MA rrọ idibo Ọghẹnẹ nọ e roma mudhe no na, o gba omai họ nọ ma re dhesẹ oruaro Jihova via evaọ ẹme kpobi nọ ma be ta gbe oware kpobi nọ ma bi ru. Pọl ukọ na ọ ta ẹme jọ nọ o rẹ kpọ omai nọ o kere nọ: “Te wha be re hayo wha be da hayo wha bi ru oware ofa jọ kpobi, wha ru eware kpobi rọ kẹ Ọghẹnẹ oruaro.” (1 Kọr. 10:31) Onana o gwọlọ nọ ma re koko izi ikiẹrẹe Jihova, enọ i dhesẹ obọdẹ ohwo nọ ọ rrọ via. (Kọl. 3:10) Re ma jọ ahwo ọfuafo, o gba omai họ nọ ma rẹ rọ aro kele Ọghẹnẹ.​—Ẹf. 5:1, 2.

² Nọ o je si iroro Ileleikristi kpohọ onana, Pita ukọ na o kere nọ: “Wọhọ emọ nọ i bi yoẹme, wha gbẹ kuvẹ hẹ re isiuru nọ wha wo vẹre evaọ okenọ wha jọ igbori e kpọ owhai, rekọ wọhọ Ọrẹri nọ o se owhai na, whai omarai wha jọ ọrẹri evaọ uruemu rai kpobi, keme a kere nọ: ‘Wha rẹ jọ ọrẹri hrọ, keme mẹ ọrẹri.’” (1 Pita 1:14-16) Wọhọ epanọ o jọ evaọ Izrẹl oke anwae, o gwọlọ nọ ahwo kpobi nọ a rrọ ukoko Ileleikristi na a rẹ jọ ọrẹri ẹsikpobi. Onana u dhesẹ nọ a rẹ kare epe, jẹ kẹnoma kẹ eware nọ i re gbe ohwo ku gbe isiuru akpọ na. A vẹ sae jọ ahwo nọ a salọ kẹ iruo efuafo.​—Ọny. 20:5.

³ Ma rẹ jọ ọrẹri nọ ma te bi koko izi gbe ehri-izi Jihova nọ a kere vevẹ fihọ Ebaibol na. (2 Tim. 3:16) A rọ ẹkwoma ewuhrẹ Ebaibol na wuhrẹ omai kpahe Jihova gbe idhere riẹ, yọ u ru omai si kẹle iẹe. Uwuhrẹ nana u ru omai vuhumu no inọ o roja re ma kake gwọlọ Uvie Ọghẹnẹ jẹ rehọ eruo oreva Jihova karo evaọ uzuazọ mai. (Mat. 6:33; Rom 12:2) Onana o gwọlọ nọ ma rẹ whẹ uruemu okpokpọ na họ oma.​—Ẹf. 4:22-24.

ẸFUỌ EVAỌ EGAGỌ GBE URUEMU

⁴ Orọnikọ ẹsikpobi o rẹ jọ lọlọhọ re ma nya lele izi ikiẹrẹe Jihova ha. Ọwegrẹ mai, Setan Ẹdhọ na, ọ be gwọlọ gale ovao mai no uzẹme na. Eware iyoma akpọ nana nọ i re su ohwo thọ gbe ekpehre isiuru nọ e rrọ oma mai i re ru ei jọ bẹbẹ ẹsejọ. Re ma sai yeri uzuazọ ohwo nọ ọ roma mudhe no ma rẹ họre gaga re ma sẹro usu mai kugbe Ọghẹnẹ. Ikereakere na e ta kẹ omai nọ u re gbe omai unu hu nọ ma tẹ nyaku ọwọsuọ hayo edawọ. Ma rẹ ruẹ uye fiki ẹrẹreokie. (2 Tim. 3:12) Eva e rẹ sae were omai nọ edawọ i te te omai, keme ma riẹ nọ edawọ itieye na yọ imuẹro inọ ma bi ru oreva Ọghẹnẹ.​—1 Pita 3:14-16; 4:12, 14-16.

⁵ Dede nọ Jesu ọ jọ gbagba, o wuhrẹ ẹmeoyo no eware nọ ọ ruẹ uye rai ze. O kie kẹ edawọ Setan he makọ ẹsiẹvo, yọ o siuru ekwa akpọ na ha. (Mat. 4:1-11; Jọn 6:15) Jesu o roro ẹdẹvo ho inọ ọ rẹ ghẹmeeyo kẹ Ọghẹnẹ. Dede nọ uzuazọ ẹgbakiete riẹ o lẹliẹ akpọ na mukpahe iẹe, ọ nya lele izi ikiẹrẹe Jihova ẹsikpobi. Omoke jọ taure o te ti whu, Jesu ọ vẹvẹ ilele riẹ unu inọ akpọ na o ti mukpahe ai re. No anwọ oke yena ze, ilele Jesu e be nyaku ukpokpoma, rekọ a bi kru udu ga keme a riẹ nọ Ọmọ Ọghẹnẹ o fi akpọ na kparobọ.​—Jọn 15:19; 16:33; 17:16.

⁶ Re ma siọ obọ ba ewo kugbe akpọ na, o gwọlọ nọ ma rẹ rọ ekoko izi ikiẹrẹe Jihova karo, wọhọ epanọ Olori mai o ru. U te no oma nọ ma re sino isuẹsu akpọ gbe eware akpọ na efa no, ma rẹ siọ uruemu otọtọ akpọ na hrọ. Ma re se ohrẹ nọ o rrọ Jemis 1:21 na gboja: “Wha siobọno egbegbe kpobi gbe oghẹrẹ eyoma kpobi, re wha rọ ẹwolẹ jẹ ẹme nọ a be kọ fihọ udu rai na rehọ, onọ o rẹ sai siwi owhai.” Ma te bi ru uwuhrẹ omobọ mai je kpohọ ewuhrẹ, ma sae ‘kọ ẹme’ uzẹme na fihọ iroro gbe udu mai, yọ ma ti wo isiuru kẹ eware akpọ na dede he. Jemis olele na o kere nọ: “Kọ wha gbẹ riẹ nọ usu kugbe akpọ na yọ egrẹ kugbe Ọghẹnẹ? Fikiere, ohwo kpobi nọ ọ gwọlọ jọ ogbẹnyusu akpọ na o bi ru omariẹ họ ọwegrẹ Ọghẹnẹ.” (Jem. 4:4) Fikiere, Ebaibol na ọ hrẹ omai gaga inọ ma nya lele izi ikiẹrẹe Jihova ẹsikpobi je siomano akpọ na.

⁷ Ẹme Ọghẹnẹ ọ vẹvẹ omai unu inọ ma wobọ evaọ uruemu omovuọ gbe ọfariẹ-ogbe he. O ta kẹ omai nọ: “Jọ a tubẹ fodẹ ọfariẹ-ogbe gbe oghẹrẹ egbegbe ọvuọvo hayo uvou-uthei evaọ udevie rai hi, wọhọ epanọ u fo kẹ ahwo ọrẹri.” (Ẹf. 5:3) Fikiere ma rẹ kuvẹ re udu mai u roro kpahe eware etọtọ hayo eware omovuọ họ, yọ ma rẹ kuvẹ vievie he re eware itieye na e jọ usu eware nọ ma be ta ẹme kpahe. Enẹ ma re ro dhesẹ nọ ma gwọlọ lele izi ikiẹrẹe Jihova kpahe uruemu ofuafo.

ẸFUỌ UGBOMA GBE EKWAKWA MAI

⁸ U te no ẹfuọ evaọ egagọ gbe uruemu no, Ileleikristi a riẹ nọ u wuzou re a ru ugboma, ekwakwa, gbe ighẹ rai fuafo. Evaọ Izrẹl oke anwae, Ọghẹnẹ ọrẹri na o jie uzi nọ a ru evuẹ na fuafo. O gba omai họ re nọ ma rẹ jọ fuafo re Jihova “ọ gbẹ ruẹ oware onyenye ovuovo” evaọ oma mai hi.​—Izie. 23:14.

⁹ Ebaibol na i dhesẹ nọ re ohwo ọ jọ ọrẹri ọ rẹ jọ fuafo evaọ ugboma gbe ekwakwa riẹ re. Wọhọ oriruo, Pọl o kere nọ: “Iyoyou, . . . wha joma ru omamai fo no eware kpobi nọ i re zue oma gbe ẹzi, re ma jọ ọrẹri ziezi nọ ma be dhozọ Ọghẹnẹ na.” (2 Kọr. 7:1) Fikiere, te ezae te eyae nọ e rrọ Ileleikristi a rẹ daoma ru ugboma rai fo ẹkwoma ẹhọ nọ a rẹ họ ẹsikpobi gbe iwu rai nọ a rẹ fọrọ. Dede nọ uyero u re wo ohẹriẹ no orẹwho ruọ orẹwho, ma sae ruẹ umutho odha gbe ame nọ ma rẹ rọ họ jẹ rọ họ emọ mai re.

¹⁰ Ahwo a rẹ riẹ omai gaga evaọ ẹwho nọ ma be rria fiki iruo usi uwoma ota mai. Ma te bi ru obeva gbe otafe uwou mai fihọ fuafo jẹ ruẹrẹ eware họ kpatiẹ u re sisẹri kẹ ahwo okegbe mai. Onana yọ oware nọ uviuwou na soso o rẹ jọ wobọ. U fo re inievo-emezae a daoma ruẹ nọ uwou gbe ighẹ rai e rrọ fuafo, keme uwou gbe ighẹ nọ e rrọ fuafo kpatiẹ o rẹ lẹliẹ amọfa ta ẹme ezi mai. Enọ i wuzou uviuwou a te bi ru onana jẹ be karo evaọ iruẹru egagọ Ọghẹnẹ, u dhesẹ nọ a be sẹro uviuwou rai ziezi. (1 Tim. 3:4, 12) Inievo-emetẹ a wo owha-iruo nọ a rẹ rọ rẹrote eware re, maero evaọ obeva uwou na. (Tait. 2:4, 5) Emọ nọ a riẹ yọrọ ziezi a re ru ẹkẹ-abọ rai evaọ oma rai gbe ubrukpẹ rai nọ a rẹ ruẹrẹhọ je ru fihọ fuafo. Enẹ uviuwou u re ro ruiruo kugbe wo uruemu ẹfuọ nọ o te reriae obọ ruọ akpọ ọkpokpọ na evaọ otọ Uvie Ọghẹnẹ.

¹¹ Idibo Jihova buobu nẹnẹ a rẹ dhẹ imoto kpohọ iwuhrẹ. Evaọ eria jọ, ababọ omoto a rẹ sai kpohọ usi uwoma ota ha. U fo nọ a rẹ wozẹ omoto na ẹsikpobi jẹ ruẹrẹ iẹe ziezi. U fo re iwou gbe imoto mai e kẹ imuẹro nọ ma rrọ usu ahwo Jihova nọ e fo jẹ rrọ ọrẹri. Ma rẹ jẹ ruẹ nọ ẹkpa usi uwoma ota mai gbe Ebaibol mai e fo.

¹² U fo nọ ẹgọ gbe osẹ mai u re dhesẹ nọ ma bi lele izi Ọghẹnẹ. Ma rẹ sae gọ ẹgọ jẹvu jẹvu hayo ku ewu ugbotọ họ nyabru okpohwo egọmeti hi. O tubẹ mae gwọlọ nọ ma re roro kpahe ẹgọ gbe osẹ mai nọ ma te bi ru iruo Jihova, wọhọ okenọ ma bi kpohọ usi uwoma ota hayo nọ ma te wo ẹme nọ ma ti ru evaọ eplatfọmo. Osẹ gbe ẹgọ mai o sai kpomahọ oghẹrẹ nọ amọfa a re rri egagọ Jihova. U kiehọ vievie he re ma gọ ẹgọ nọ ọ rrọ kpatiẹ hẹ hayo nọ o dhesẹ ororokẹ rọkẹ amọfa ha. (Mae. 6:8; 1 Kọr. 10:31-33; 1 Tim. 2:9, 10) Fikiere, ma tẹ be ruẹrẹ oma kpahe re ma kpohọ usi uwoma ota hayo iwuhrẹ ukoko, ikokohọ okogho hayo ikokohọ ilogbo, ma re roro kpahe oware nọ Ikereakere na e ta kpahe ẹfuọ ugboma avọ ekwakwa mai gbe ẹgọ nọ ọ rrọ owowa. Ma gwọlọ nọ ma rẹ wha orro gbe ajiri se Jihova ẹsikpobi.

¹³ Epọvo na o rẹ jọ re nọ ma te bi kpohọ obọ ehri ukoko hayo uwou ogha Isẹri Jihova jọ kpobi. Kareghẹhọ nọ otofa Ebẹtẹle họ “Uwou Ọghẹnẹ.” Fikiere, ma rẹ gọ ẹgọ je dhesẹ oghẹrẹ uruemu nọ ma re dhesẹ nọ ma te kpohọ iwuhrẹ evaọ obọ Ọgwa Uvie.

¹⁴ Makọ okenọ ma te bi ru eware efa gheghe, ma rẹ daoma gọ ẹgọ jẹ sẹ osẹ nọ u kiehọ. Ma sae nọ omamai nọ, ‘Kọ oma o te vuọ omẹ re mẹ ta usi uwoma evaọ oke gheghe fiki oghẹrẹ nọ mẹ gọ ẹgọ?’

EMAMỌ AROZAHA GBE EWARE ẸKERIOTỌ OMAWEROMẸ

¹⁵ Eriosehọ gbe arozaha e rẹ lẹliẹ ohwo wo omokpokpọ. Oke jọ o jariẹ nọ Jesu o zizie ilele riẹ inọ a lele iei kpohọ oria nọ u siomano re a “serihọ omojọ.” (Mak 6:31) Eriosehọ gbe emamọ arozaha e sae lẹliẹ oma mai sasa. O rẹ sai ru omai wariẹ wo ẹgba nọ ma re ro ru iruo mai.

¹⁶ Nọ orọnọ oghẹrẹ erozaha buobu e riẹ nẹnẹ na, u fo nọ Ileleikristi e rẹ salọ jẹ rehọ areghẹ nọ o no obọ Ọghẹnẹ ze ru oware nọ a bi ru. Dede nọ arozaha o re fiobọhọ na, oye o mai wuzou evaọ uzuazọ họ. A vẹvẹ omai unu inọ evaọ “edẹ urere na,” ahwo a ti “you omaweromẹ viukpenọ a re you Ọghẹnẹ.” (2 Tim. 3:1, 4) Eware buobu nọ a bi se arozaha gbe eware ẹkeriotọ omaweromẹ nẹnẹ na i fo kẹ ahwo nọ a gwọlọ lele izi ikiẹrẹe Jihova ha.

¹⁷ Ileleikristi ikpe-udhusoi ọsosuọ a kẹnoma kẹ eware iyoma nọ ahwo oke rai nọ a romakẹ omaweromẹ a je ru. Ahwo a jẹ hai rri ughe ahwo nọ a bi gboja kẹ evaọ afe-ughe ahwo Rom. A jẹ hae jọ afe-ughe na dhesẹ eware ozighi, azẹ-okpe, gbe ọfariẹ-ogbe ro fou ogbotu na họ ehwẹ, rekọ Ileleikristi ikpe-udhusoi ọsosuọ na a je kuomagbe ai hi. A be jọ eware ẹkeriotọ omaweromẹ akpọ na buobu nẹnẹ dhesẹ eware itieye na keme a riẹ nọ ikpehre eware yena e rẹ mae were ohwo-akpọ. U fo re ma “fiẹrohotọ ziezi” evaọ oghẹrẹ nọ ma bi yeri, ma rẹ kẹnoma kẹ eware ẹkeriotọ nọ e rẹ raha iroro ohwo. (Ẹf. 5:15, 16; Ol. 11:5) O tẹ make rọnọ oware ẹkeriotọ na o nwani yoma ga hrọ họ, o sae jọ nọ ahwo nọ a rrọ etẹe hayo oria na u kiehọ họ.​—1 Pita 4:1-4.

¹⁸ Emamọ erozaha gbe eware ẹkeriotọ e riẹ nọ Ileleikristi a sae reawere rai. Ahwo buobu a wo erere no fikinọ a bi lele ohrẹ Ikereakere na gbe emamọ ehrẹ nọ e rrọ ebe mai.

¹⁹ Ẹsejọ, oniọvo ọ rẹ sai zizie iviuwou Ileleikristi sa-sa ziọ uwou riẹ re a wo omaweromẹ kugbe. Hayo a rẹ sai zizie inievo-emezae avọ erọ emetẹ kpohọ ehaa-orọo hayo oghẹrẹ ehaa itieye na. (Jọn 2:2) Enọ i se ehaa na a rẹ daoma kpọ oware nọ a be jọ etẹe ru. O rrọ vevẹ inọ o gwọlọ ẹromuhotọ nọ ogbotu ahwo a te kokohọ. Omaweromẹ nọ o rẹ jọ omakugbe itieye na u ru nọ ahwo jọ a rọ nyavrẹ umuo nọ u fo kẹ Ileleikristi no, a re emu vrẹ oma jẹ da idi vrẹ oma jẹ tubẹ raha izi ilogbo efa dede. Fiki onana, Ileleikristi nọ i wo orimuo a ruẹ no inọ o rrọ oware areghẹ re a zizie umutho ahwo jẹ ruẹ nọ ẹkeriotọ hayo ehaa itieye na i kri ga hrọ họ. Otẹrọnọ a fi idi nọ i re mu họ otọ, u fo nọ a rẹ da umutho. (Fil. 4:5) A tẹ daoma kpobi ruẹrẹ ẹkeriotọ omakugbe họ oghẹrẹ nọ a re ro wuhrẹ emamọ oware jọ noi ze jẹ tuduhọ ahwo awọ evaọ egagọ Jihova, emuore gbe idi e te mae jọ ahwo oja ha.

²⁰ Oware ezi o rrọ re ma dede ohwohwo rehọ jẹ ghọ ae. (1 Pita 4:9) Ma te bi zizie ibe Ileleikristi mai ziọ uwou mai kẹ emuọriọ, umudi nọ a rẹ da kugbe, amarozaha, gbe omakugbe, ma rẹ kareghẹhọ iyogbe gbe amọfa nọ a wo oghẹrẹ ẹbẹbẹ jọ. (Luk 14:12-14) Otẹrọnọ a zizie omai kpohọ oria utioye na, ma re dhesẹ uruemu nọ o rọwokugbe ohrẹ nọ o rrọ obe Mak 12:31. U re woma ẹsikpobi re ma dhesẹ nọ ọghọ nọ amọfa a ru omai o da omai ẹro fia.

²¹ Ileleikristi a rẹ ghọghọ fiki ekẹ buobu nọ i no obọ Ọghẹnẹ ze gbe fikinọ a riẹ nọ a rẹ sae “re jẹ da jẹ re omaweromẹ iruo egaga [rai] kpobi.” (Ọtausi. 3:12, 13) Ma te “ru eware kpobi rọ kẹ Ọghẹnẹ oruaro,” enọ i zizie ahwo gbe enọ a zizie na a rẹ sae gbẹ kareghẹhọ ọbọga nọ a wo no omakugbe na ze.

IRUẸRU ISUKULU

²² Emọ Isẹri Jihova a re wo erere nọ a te kpohọ isukulu epramare gbe esekọndri. Nọ a bi kpohọ isukulu na a rẹ daoma wuhrẹ epanọ a re ro se je kere ziezi. Eware efa nọ a be hai wuhrẹ evaọ isukulu e sai fiobọhọ kẹ emaha nọ i bi le itee evaọ egagọ Ọghẹnẹ. Evaọ ikpe nọ a bi ro kpohọ isukulu na, a rẹ daoma gaga re a ‘kareghẹhọ Ọmemama Oride nọ ọ ma rai’ ẹkwoma egagọ Jihova nọ a rẹ rọ karo.​—Ọtausi. 12:1.

²³ Whọ tẹ rrọ uzoge Oleleikristi nọ o bi kpohọ isukulu, whọ rẹ yọroma re who gbe mu kuomagbe izoge obọ akpọ na ha. (2 Tim. 3:1, 2) Jihova ọ ruẹrẹ eware sa-sa họ nọ e rẹ thọ omai, fikiere eware buobu e riẹ nọ whọ sai ru rọ kpọ isiuru akpọ na kufiẹ. (Ol. 23:4; 91:1, 2) Re whọ sae sẹro omara, rehọ eware nọ Jihova ọ ruẹrẹhọ na ruiruo.​—Ol. 23:5.

²⁴ Re a sai siomano akpọ na evaọ okenọ a rrọ isukulu, izoge Isẹri Jihova buobu a salọ nọ a re wobọ họ evaọ eware efa isukulu na nọ e rrọ abọjọ ewuhrẹ isukulu na dẹẹ hẹ. O sae jọ bẹbẹ kẹ emọ-eklase ra gbe iticha ra re a wo otoriẹ oware nọ who bi ro ru ere. Rekọ, oware nọ o mai wuzou họ re who ru Ọghẹnẹ eva were. Onana o gwọlọ nọ whọ rẹ gaviezọ kẹ obruoziẹ-iroro ra nọ whọ rehọ Ebaibol wuhrẹ no jẹ gbaemu nọ who re dhomahọ omuhrowo akpọ na hayo iruẹru orẹwho na ha. (Gal. 5:19, 26) Wha tẹ be gaviezọ kẹ ehrẹ Ikereakere na nọ esẹgbini rai nọ e rrọ eg’Ọghẹnẹ a be kẹ owhai jẹ be nya usu kugbe inievo ukoko na nọ e rẹ bọ owhai ga, whai emaha na wha te sai koko izi ikiẹrẹe Jihova.

IRUO GBE EGBẸNYUSU

²⁵ Ikereakere na e ta nọ enọ i wuzou uviuwou a rẹ rẹrote uviuwou rai. (1 Tim. 5:8) O make rrọ ere na, wọhọ egbodibo Ọghẹnẹ, a riẹ nọ iruo rai yọ oware avọ ivẹ, rekọ iruẹru Uvie na họ oware nọ a rẹ rọ karo. (Mat. 6:33; Rom 11:13) A te bi dhesẹ uruemu omarọkẹ Ọghẹnẹ je wo edẹro nọ a te wo emuore gbe iwu, a rẹ whaha awaọruọ gbe egbefẹ uzuazọ efe-ole.​—1 Tim. 6:6-10.

²⁶ Ileleikristi kpobi nọ e roma mudhe no nọ i bi ru iruo a rẹ kareghẹhọ ehri-izi Ikereakere na. Re ma sae rọ oruọzewọ ru iruo mai, ma rẹ whaha iruẹru nọ e wọso izi Ọghẹnẹ hayo izi orẹwho mai. (Rom 13:1, 2; 1 Kọr. 6:9, 10) Ma rẹ kareghẹhọ enwoma ekpehre usu. Wọhọ isoja Kristi, ma rẹ whaha omaduhọ iruẹru ekiọthuọ nọ e wọso izi Ọghẹnẹ, nọ i re fi omai họ abọjọ akpọ na, hayo ru omai kie no ẹrọwọ mai. (Aiz. 2:4; 2 Tim. 2:4) Yọ ma re wo obọ kugbe ọwegrẹ Ọghẹnẹ hẹ, “Babilọn Ologbo na,” koyehọ, egagọ erue.​—Evia. 18:2, 4; 2 Kọr. 6:14-17.

²⁷ Izi ikiẹrẹe Ọghẹnẹ nọ ma re lele u re ru nọ ma gbẹ wọ eki mai, ẹme iruo mai hayo ilale omobọ mai efa kpohọ iwuhrẹ hayo ikokohọ mai hi. Ẹjiroro nọ ma bi ro kuomagbe amọfa evaọ iwuhrẹ Ileleikristi mai, ikokohọ esese gbe ilogbo họ re ma gọ Jihova. Ma re kpohọ etẹe re ma re emu evaọ emẹjẹ riẹ jẹ “tuduhọ ohwohwo awọ.” (Rom 1:11, 12; Hib. 10:24, 25) Egagọ Jihova nọ ma rọ fiki riẹ kuomagbe na ma rẹ tẹrovi.

EPANỌ MA RẸ RỌ SẸRO OKUGBE ILELEIKRISTI

²⁸ Jihova ọ tẹ jẹ gwọlọ nọ ahwo riẹ a “yọrọ okugbe ọvo nọ ẹzi na ọ be wha ze evaọ udhedhẹ nọ o be gba [ae] kugbe na.” (Ẹf. 4:1-3) Ukpenọ omomọvo ọ rẹ gwọlọ epanọ o re ro ru omobọ riẹ eva were, ohwo kpobi ọ rẹ gwọlọ oware nọ u woma kẹ ọrivẹ riẹ. (1 Tẹs. 5:15) Ababọ avro, whọ be ruẹ ẹzi nana evaọ ukoko nọ whọ rrọ. Izi ikiẹrẹe evona e be kpọ omai kpobi ghelọ uyẹ nọ ma no ze, ovioma mai, orẹwho mai, epanọ ma wo ugho te je kpohọ isukulu te kẹhẹ. Makọ ahwo obọ otafe dede a muẹrohọ obọdẹ okugbe nana nọ o rrọ udevie ahwo Jihova na no.​—1 Pita 2:12.

²⁹ Nọ o gbe je fiẹgba họ oware nọ o lẹliẹ omai wo okugbe, Pọl ukọ na o kere nọ: “Ugboma ọvo ọ riẹ, gbe ẹzi ọvo, nwane wọhọ epanọ a se owhai ziọ ẹruore ọvo na; Olori ọvo, ẹrọwọ ọvo, ame-ọhọ ọvo; Ọghẹnẹ ọvo nọ ọ rrọ Ọsẹ ahwo kpobi, ọnọ o wuzou ahwo kpobi jẹ be rehọ ẹkwoma ahwo kpobi ruiruo je bi ruiruo evaọ oma ahwo kpobi.” (Ẹf. 4:4-6) Onana o gwọlọ nọ ma re wo otoriẹ ovona evaọ igogo iwuhrẹ Ebaibol na gbe iwuhrẹ ikokodo efa nọ e rrọ Ebaibol na, rọ ere dhesẹ nọ ma vuhumu nọ Jihova họ osu nọ ọ mai kpehru. Evaọ uzẹme, Jihova ọ kẹ ahwo riẹ ẹvẹrẹ ọgbagba ọrọ uzẹme na no, onọ u bi fiobọhọ kẹ ae gọ no ẹkoko te ẹkoko.​—Zẹf. 3:9.

³⁰ Okugbe gbe udhedhẹ nọ o rrọ ukoko Ileleikristi na o be kẹ ahwo kpobi nọ a be gọ Jihova omosasọ. Ma ruẹ orugba eyaa Jihova na no inọ: “Me ti ru ae jọ okugbe ọvo wọhọ igodẹ nọ e rrọ eva ogba.” (Mae. 2:12) Ma rẹ gbẹ reawere okugbe gbe udhedhẹ yena nọ ma tẹ ruabọhọ bi koko izi ikiẹrẹe Jihova.

³¹ Eva e rẹ were ahwo nọ a dede rehọ ziọ ukoko ofuafo Jihova no! Odẹ Jihova nọ a bi ro se omai u te oware nọ ma rẹ rọ fiki riẹ siobọno oware ofa jọ kpobi. Nọ ma bi ru re usu oghaghae nọ ma wo kugbe Jihova o tọ na, ma rẹ daoma gaga koko izi ikiẹrẹe riẹ jẹ vuẹ amọfa kpahe ae.​—2 Kọr. 3:18.