Uzou Avọ 8

Ọghẹnẹ O You Ahwo nọ A rẹ Fuafo

“Enọ efo eye who re dhesẹ ẹfuọ ra kẹ.”—OLEZI 18:26.

1-3. (a) Fikieme oni ọ rẹ rọ ruẹ nọ ọmọ riẹ ọ rrọ fuafo jẹ rrọ kpatiẹ? (b) Fikieme Jihova ọ jẹ gwọlọ nọ enọ e be gọe a jọ fuafo, kọ eme o rẹ lẹliẹ omai gwọlọ jọ fuafo?

ONI jọ ọ be ruẹrẹ ọmọzae ọsese riẹ oma họ re o kpohọ oria jọ. Ọ họ ọmọ na no o te ku iwu nọ e fo ziezi jẹ rọ kpatiẹ họ iẹe oma. Ọ riẹ nọ ọmọ na ọ tẹ rrọ fuafo, o ti wo omokpokpọ. Ọ tẹ jẹ riẹ inọ, o te lẹliẹ amọfa jiri ọsẹgboni riẹ.

² Jihova, Ọsẹ obọ odhiwu mai, ọ gwọlọ nọ idibo riẹ a jọ fuafo. Ebaibol e ta nọ: “Enọ efo eye who re dhesẹ ẹfuọ ra kẹ.”a (Olezi 18:26) Jihova o you omai; ọ riẹ inọ ma tẹ rrọ fuafo o te wha erere se omai. Ọ tẹ jẹ gwọlọ mi omai Isẹri riẹ inọ ma ru re amọfa a rọ fiki mai jiri ei. Evaọ uzẹme, ma tẹ rrọ fuafo je wo emamọ uruemu o rẹ wha orro se Jihova gbe odẹ ofuafo riẹ, orọnikọ afuẹwẹ hẹ.—Izikiẹl 36:22; 1 Pita 2:12.

³ Nọ ma riẹ inọ Ọghẹnẹ o you ahwo nọ a rrọ fuafo na o rẹ lẹliẹ omai daoma jọ fuafo. Ma gwọlọ re uzuazọ mai o wha ọghọ sei keme ma you rie. Ma tẹ jẹ gwọlọ daji uyoyou riẹ. Fikiere, joma t’ẹme kpahe oware nọ u je fo re ma jọ fuafo, oware nọ o gwọlọ re ma jọ fuafo, gbe epanọ ma sai ro ru oma mai fuafo. Ọkiẹriwo otiọye na o sai fi obọ họ kẹ omai ruẹ sọ eria jọ e riẹ nọ ma jọ gwọlọ ẹnyaharo.

FIKIEME U JE FO RE MA JỌ FUAFO?

4, 5. (a) Eme họ ugogo ẹjiroro nọ u je fo nọ ma rẹ jọ fuafo? (b) Ẹvẹ ẹfuọ Jihova u ro dhesẹ oma via evaọ emama riẹ?

⁴ Edhere jọ nọ Jihova o bi ro su omai họ ẹkwoma oriruo. Fikiere, Ebaibol na e tuduhọ omai awọ inọ ma “jọ ahwo nọ a [be raro kele] Ọghẹnẹ.” (Ahwo Ẹfẹsọs 5:1) Ugogo ẹjiroro nọ u je fo inọ ma jọ fuafo ọna: Jihova, Ọghẹnẹ nọ ma be gọ na, ọ rrọ ọrẹri jẹ rrọ fuafo evaọ kabọ kabọ.—Iruo-Izerẹ 11:44, 45.

⁵ Wọhọ epanọ idhere gbe ekwakwa-aghae Jihova i dhesẹ oma via evaọ emama riẹ na, ere ẹfuọ riẹ o dhesẹ oma via re. (Ahwo Rom 1:20) Ọ ma otọakpọ na re o jọ oria ofuafo kẹ ahwo-akpọ. Jihova ọ ma eware nọ i re ru ofou gbe ame fihọ fuafo. Emerae esese jọ e riẹ nọ i re ru orufuọ, nọ e rẹ rẹriẹ eware nọ e hae wha enwoma se omai kpohọ oghẹrẹ nọ e gbẹ rọ wha enwoma ze he. Evaọ eria nọ ewhri-oyibo i je hwẹ fihọ ame hayo otọ gbe eria nọ enua efa e jọ roma via fiki oriobọ gbe uvo-uthe ohwo-akpọ, egbaeriariẹ a rehọ emerae esese nana jọ ro si enua itieye na no. Avro ọ riẹ hẹ, ọnọ “ọ rehọ ogaga riẹ ma akpọ na” o se ẹfuọ gboja gaga. (Jerimaya 10:12) U fo re ma se ẹfuọ gboja re.

6, 7. Ẹvẹ Uzi Mosis u ro dhesẹ vevẹ nnọ a gwọlọ ẹfuọ mi enọ e be gọ Jihova?

⁶ Ẹjiroro ọfa nọ u je fo nọ ma jọ fuafo họ, Jihova, Osu nọ Ọ Mai Kpehru na, ọ gwọlọ nọ enọ e be gọe a jọ fuafo. Evaọ otọ Uzi nọ Jihova ọ rọ kẹ emọ Izrẹl, oria nọ a jọ ta ẹme te egagọ, a rẹ ta ẹme te ẹfuọ re. Uzi na o ta inọ evaọ Ẹdẹ Omavoro na, o gba ozerẹ okpehru na họ inọ ọ rẹ họ isiava. (Iruo-Izerẹ 16:4, 23, 24) Izerẹ nọ i bi ruiruo evaọ uwou-udhu hayo etẹmpol na a rẹ wozẹ abọ gbe awọ rai re a te ti dheidhe kẹ Jihova. (Ọnyano 30:17-21; 2 Iruẹru-Ivie 4:6) Uzi na o fodẹ eware 70 nọ i re ru ohwo gbegbe evaọ abọ-iwo gbe abọ-ẹzi. Ohwo Izrẹl nọ ọ rrọ gbegbe o re kuomagbe ahwo evaọ egagọ họ—o te ru ere a rẹ sai bruoziẹ uwhu kpei. (Iruo-Izerẹ 15:31) Ohwo kpobi nọ ọ rọwo lele izi nọ a fihọ kpahe ẹfuọ họ, onọ o kẹre te ẹhọ nọ ọ rẹ họ, ọ vẹ jẹ fọrọ iwu riẹ, a rẹ “hẹriẹ ohwo ọyena no ukokohọ na.”—Ikelakele 19:17-20.

⁷ Dede nọ ma rrọ otọ Uzi Mosis na ha, u fi obọ họ kẹ omai riẹ oghẹrẹ nọ Ọghẹnẹ o rri ẹfuọ. Avro ọ riẹ hẹ, uzi na u dhesẹ vevẹ inọ a gwọlọ ẹfuọ mi enọ e be gọ Ọghẹnẹ. Jihova o ri nwene he. (Malakae 3:6) Ọghẹnẹ ọ rẹ jẹ egagọ mai rehọ họ ajokpanọ egagọ na e rrọ ‘fuafo jẹ kare oma uzue.’ (Jemis 1:27) Fikiere, u fo re ma riẹ oware nọ ọ gwọlọ mi omai evaọ ẹme ẹfuọ.

OWARE NỌ O GWỌLỌ RE MA JỌ FUAFO EVAỌ ARO ỌGHẸNẸ

8. Abọ sa-sa vẹ Jihova ọ jọ gwọlọ nọ ma jọ fuafo?

⁸ Evaọ Ebaibol na, re a jọ fuafo o kẹre vi ẹfuọ ugboma na ọvo. Re ohwo ọ jọ fuafo evaọ aro Ọghẹnẹ o kẹre te kabọ kabọ uzuazọ mai. Jihova ọ gwọlọ nọ ma jọ fuafo evaọ ugogo abọ ene nana: abọ-ẹzi, uruemu, iroro, gbe abọ-iwo. Joma ta ẹme kpahe idhere nana ọvuọvo.

9, 10. Eme u dhesẹ re a jọ fuafo evaọ abọ-ẹzi, kọ eme uvi Ileleikristi a rẹ whaha?

⁹ Ẹfuọ abọ-ẹzi. Re a jọ fuafo evaọ abọ-ẹzi u dhesẹ inọ a rẹ rehọ egagọ erue rọ gua egagọ efuafo ho. Okenọ emọ Izrẹl a je no Babilọn zihe kpobọ Jerusalẹm, o gwọlọ mi ai nọ a re koko ujaje nana nọ Ọghẹnẹ ọ kẹ rai na: “Nya no etẹe no, whọ rehọ obọ te oware onyenye ovo ho. . . . Wha ru oma rai fo.” (Aizaya 52:11) Ugogo ẹjiroro nọ emọ Izrẹl a je ro zihe kpo họ re a wariẹ to egagọ Jihova họ. Egagọ na e rẹ jọ fuafo—a rẹ rehọ iwuhrẹ hayo iruemu egagọ Babilọn nọ Ọghẹnẹ o mukpahe na ro gbei ku hu.

¹⁰ Nẹnẹ, mai Ileleikristi uzẹme ma rẹ yọroma re egagọ erue e siọ egagọ mai ba egbeku. (1 Ahwo Kọrint 10:21) Ma rẹ yọroma gaga keme egagọ erue e da oria kpobi fia. Evaọ erẹwho buobu, ehaa gbe iruemu buobu e riẹ nọ i wobọ kugbe iwuhrẹ egagọ erue, wọhọ uwuhrẹ na inọ oware jọ o rrọ oma mai nọ u re whu hu nọ ma tẹ maki whu no. (Ọtausiuwoma Na 9:5, 6, 10) Uvi Ileleikristi a rẹ whaha iruẹru nọ i wobọ kpahe egagọ erue.b Ma rẹ kuvẹ hẹ re amọfa a ru omai zue izi Ebaibol nọ i kiekpahe egagọ efuafo.—Iruẹru Ikọ Na 5:29.

11. Eme o gwọlọ re ma jọ fuafo evaọ uruemu, kọ fikieme o jẹ roja re ma jọ fuafo evaọ abọ nana?

¹¹ Ẹfuọ uruemu. Re ma jọ fuafo evaọ uruemu o gwọlọ nnọ ma rẹ whaha oghẹrẹ ọfariẹ-ogbe kpobi. (Ahwo Ẹfẹsọs 5:5) U wuzou re ma jọ fuafo evaọ uruemu. Wọhọ epanọ ma te ruẹ evaọ uzoẹme nọ ma bi ti te na, re ma sae daji uyoyou Ọghẹnẹ, ma re ‘si oma no igberedha.’ Igberedha nọ i kurẹriẹ hẹ “e rẹ sae reuku uvie Ọghẹnẹ hẹ.” (1 Ahwo Kọrint 6:9, 10, 18) Evaọ aro Ọghẹnẹ, ahwo otiọye na a rrọ usu ahwo nọ a rrọ nyenyenye. A gbe ru oma rai fo ho, a ti wo “ẹkẹ osa rai eva . . . uwhu avọ ivẹ.”—Eviavia 21:8.

12, 13. Usu vẹ iroro gbe owojẹ i wo kugbe, kọ ẹvẹ ma sae rọ jọ fuafo evaọ iroro?

¹² Ẹfuọ iroro. Iroro i re su ohwo kpohọ owojẹ. Ma tẹ kuvẹ re ekpehre iroro e daruọ omai udu, o maki kri kẹhẹ ma ti ru oware uyoma. (Matiu 5:28; 15:18-20) Rekọ ma tẹ rehọ eware efuafo vọ udu mai, onana u ti fi obọ họ kẹ omai jọ fuafo evaọ uruemu. (Ahwo Filipai 4:8) Ẹvẹ ma rẹ rọ jọ fuafo evaọ iroro? Ma rẹ whaha eware-ẹkeriotọ kpobi nọ e rẹ sai gbe iroro mai ku.c Fibae, ma rẹ sae rehọ eware efuafo vọ udu mai ẹkwoma Ẹme Ọghẹnẹ nọ ma re wuhrẹ ẹsikpobi.—Olezi 19:8, 9.

¹³ Re ma daji uyoyou Ọghẹnẹ, o roja re ma jọ fuafo evaọ abọ-ẹzi, uruemu, gbe iroro. Ma jọ izou efa erọ obe nana ta ẹme ziezi kpahe abọ ẹfuọ enana. Joma ta ẹme kpahe abọ avene na—ẹfuọ abọ-iwo.

ẸVẸ MA SAE RỌ JỌ FUAFO EVAỌ ABỌ-IWO?

14. Fikieme ẹfuọ abọ-iwo o gbẹ rọ rrọ ẹme omobọ mai ọvo ho?

¹⁴ Ẹfuọ abọ-iwo o kẹre te ugboma gbe ighẹ mai nọ ma re ru fuafo. Evaọ ẹme ẹfuọ abọ-iwo, kọ onọ u je omai ma re ru? O rrọ ere vievie he rọkẹ idibo Jihova. Wọhọ epanọ ma ta no vẹre na, Jihova o se ẹfuọ abọ-iwo mai gboja orọnikọ fikinọ o te wha erere se omai ọvo ho rekọ fikinọ u ti kpomahọ oghẹrẹ nọ amọfa a re rri ọye omariẹ. Roro kpahe oriruo nọ ma fodẹ evaọ obọ emuhọ na. Otẹrọnọ ẹsikpobi nọ whọ ruẹ ọmọ jọ, ọ rẹ jọ gbegbe lahiẹ lahiẹ, eme who re roro kpahe ọsẹgboni riẹ? Ma gwọlọ re amọfa a poviẹ Ọsẹ obọ odhiwu mai hi, hayo re a siọ usiuwoma nọ ma be ta ha fikinọ ma rrọ gbegbe hayo fiki oghẹrẹ uzuazọ nọ ma bi yeri. Ebaibol e ta nọ: “Ma ru ohwo ọvo zoruẹ eva oware ovo ho, re a siọ iruo mai ba ẹfuọ. Rekọ eva eware kpobi ma dhesẹ oma mai, wọhọ iruiruo Ọghẹnẹ.” (2 Ahwo Kọrint 6:3, 4) Nọ o rrọ ere na, ẹvẹ ma rẹ rọ jọ fuafo evaọ abọ-iwo?

15, 16. Eme emamọ ẹfuọ o gwọlọ, kọ ẹvẹ u fo nnọ ẹgọ mai ọ rẹ jọ?

¹⁵ Ẹfuọ ugboma mai. Dede nnọ oghẹrẹ nọ ahwo a bi yere uzuazọ u wo ohẹriẹ no orẹwho ruọ orẹwho, enwenọ oria kpobi ma jẹ sae ruẹ odha gbe ame nọ ma rẹ rọ họ ẹsikpobi, jẹ ruẹ inọ mai gbe emọ mai a rrọ fuafo. Ẹfuọ o gwọlọ inọ ma rẹ rehọ odha gbe ame rọ wozẹ abọ mai taure ma tẹ te re emu hayo dhobọte emuore, nọ ma te ne hayo vẹ no, gbe nọ ma tẹ họ ọmọ hayo nwene emehọ otọ eku riẹ no. Ma tẹ be hae rehọ ame gbe odha wozẹ abọ, ma rẹ sae whaha ẹyao, jẹ tubẹ rehọ ere siwi uzuazọ. O sae whaha evo ekpehre emerae nọ e rẹ wha ẹyao ze, jẹ rọ ere fi obọ họ kẹ ahwo whaha ẹyao eva-ikuo. Evaọ iwou nọ a jo wo elatrini hi, a rẹ sae tọ isọ h’otọ, wọhọ epanọ a je ru evaọ Izrẹl anwae.—Iziewariẹ 23:12, 13.

¹⁶ O tẹ jẹ gwọlọ inọ ma fọrọ iwu mai kẹse kẹse re e jọ fuafo je siuru. O nwane gwọlọ nọ ẹgọ Oleleikristi ọ rẹ jọ ghaghae hayo enọ i kie ze he, rekọ e rẹ jọ fuafo jẹ jọ kpatiẹ. (1 Timoti 2:9, 10) Makọ oria nọ ma rrọ kpobi kẹhẹ, ma gwọlọ re ẹgọ mai o “rehọ eru kẹ uwuhrẹ Ọghẹnẹ Osiwi mai.”—Taitọs 2:10.

17. Fikieme u je fo re uwou gbe ighẹ mai e jọ fuafo je siuru?

¹⁷ Uwou gbe ighẹ mai. Uwou mai o gbẹ make rrọ ọrọ okpohwo ho, u fo re o jọ fuafo. Epọvo na re, ma te wo omoto nọ ma rẹ dhẹ kpohọ ewuhrẹ hayo usiuwoma, ma rẹ daoma ru ei fihọ fuafo, te uke te eva riẹ. Jọ o thọrọ omai ẹro ho inọ uwou gbe ighẹ mai nọ e rrọ fuafo e rẹ sae ta usiuwoma kẹ amọfa. Binọ mai ma be hae ta kẹ ahwo inọ Jihova yọ Ọghẹnẹ ọfuafo, inọ ọ te “raha [enọ e be] raha akpọ na,” gbe nnọ kẹle na Uvie riẹ u ti zihe otọakpọ nana ruọ aparadase! (Eviavia 11:18; Luk 23:43) Ma gwọlọ re uwou gbe ekwakwa mai i dhesẹ kẹ amọfa inọ makọ enẹna ma be daoma yeri oghẹrẹ uzuazọ nọ o te jọ akpọ ọkpokpọ na.

18. Ẹvẹ ma re ro dhesẹ inọ ma rri Ọgwa Uvie mai ghaghae?

¹⁸ Oria egagọ mai. Uyoyou mai kẹ Jihova o rẹ wọ omai rri Ọgwa Uvie mai ghaghae, oria egagọ uzẹme evaọ okegbe na. Nọ ahwo ọkpokpọ a tẹ ziọ Ọgwa Uvie na, ma gwọlọ re a ta ẹme ezi kpahe oria egagọ mai. U fo inọ ma rẹ rẹrote ọgwa na je ru ei fo re o hai siuru ẹsikpobi. Nọ ma tẹ be dawo ẹgba mai kpobi ru Ọgwa Uvie mai fihọ fuafo, yọ ma bi dhesẹ inọ ma rri rie ghaghae. O rrọ uvẹ-ọghọ re ma rọ oke mai ro fi obọ họ “ruẹrẹ jẹ rọ ẹro te” oria egagọ mai. (2 Iruẹru-Ivie 34:10) Epọvo na ma re ru Ọgwa Okokohọ mai gbe eria efa nọ ma re jo ru ikokohọ kpobi.

WHAHA IRUEMU KPOBI NỌ I RE ZUE OMA NA

19. Re ma sae jọ fuafo evaọ ugboma, eme u fo nọ ma rẹ whaha, kọ ẹvẹ Ebaibol na i re ro fi obọ họ kẹ omai evaọ ẹme nana?

¹⁹ Re ma ruẹse jọ fuafo, u fo re ma whaha iruemu kpobi nọ i re gbe oma na ku, wọhọ ivovavovo, idieda thomawa, gbe ẹlọ imu egaga nọ i re mu. Orọnikọ iruemu etọtọ kpobi nọ i bi wowẹ nẹnẹ na Ebaibol e nwane fodẹ hẹ, rekọ u wo ehri-izi nọ i re fi obọ họ kẹ omai riẹ oghẹrẹ nọ Jihova o rri eware itieye na. Fikinọ ma riẹ oghẹrẹ nọ Jihova o re rri eware, uyoyou nọ ma wo kẹe o rẹ wọ omai ru eware nọ e rẹ were iẹe. Joma ta ẹme te ehri-izi isoi jọ nọ e rrọ Ikereakere na.

20, 21. Iruemu vẹ Jihova ọ gwọlọ inọ ma si oma no, kọ uvi ẹjiroro vẹ o rẹ lẹliẹ omai ru ere?

²⁰ “Imoni iyoyou, fiki epanọ ma wo eya enana no na, wha jọ oma ru oma mai fo uno eware nọ i re zue oma gbe ẹzi, re ma ru oma mai, [ọrẹri] kiete eva ozodhẹ Ọghẹnẹ.” (2 Ahwo Kọrint 7:1) Jihova ọ gwọlọ inọ ma kẹnoma no iruemu nọ i re gbe oma mai ku jẹ raha iroro mai. Fikiere, ma rẹ whaha eware nọ e rẹ reria ohwo obọ, enọ e rẹ wha enwoma se omai evaọ ugboma gbe iroro.

²¹ Ebaibol e kẹ omai uvi ẹjiroro jọ nọ ma re ro ru “oma mai fo uno eware nọ i re zue oma” na. Muẹrohọ inọ 2 Ahwo Kọrint 7:1 o ta nnọ: “Fiki epanọ ma wo eya enana no na.” Eyaa vẹ? Taure Pọl o te ti kere eme yena, ọ ta no vẹre inọ Jihova ọ ya eyaa nọ: “Me ve ti dede owhai rehọ. Mẹ vẹ te jọ Ọsẹ rai.” (2 Ahwo Kọrint 6:17, 18) Dai roro iei: Jihova ọ ya eyaa inọ ọ rẹ te sẹro ra je you owhẹ wọhọ epanọ ọsẹ o re you ọmọzae hayo ọmọtẹ riẹ. Rekọ re Jihova o te ru eyaa nana gba kẹ owhẹ, who re ru oma ra fo no eware nọ i re zue “oma gbe ẹzi.” Fikiere o rẹ jọ oware ugheghẹ gaga re whọ kuvẹ kẹ uruemu ugbegbe jọ re o raha usu oghaghae okpekpe nọ who wo kugbe Jihova.

22-25. Ehri-izi Ikereakere vẹ e rẹ sai fi obọ họ kẹ omai whaha iruemu igbegbe?

²² “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:37) Jesu ọ ta inọ uzi nana họ onọ o mae rro kpobi. (Matiu 22:38) Jihova o te ohwo nọ ma re you ere. Re ma rehọ udu, ẹwẹ, gbe iroro mai kpobi you rie, ma rẹ whaha iruemu nọ i re bru uzuazọ mai kpẹre hayo nọ i re kpomahọ ẹgba iroro mai.

²³ “[Jihova ọ] kẹ ahwo kpobi uzuazọ, gbe ẹwẹ, jegbe eware kpobi.” (Iruẹru Ikọ Na 17:24, 25) Uzuazọ yọ okẹ nọ u no obọ Ọghẹnẹ ze. Ma you Ọnọ ọ kẹ omai uzuazọ na, fikiere ma re rri uzuazọ mai ghaghae. Ma rẹ whaha uruemu kpobi nọ u re fi uzuazọ mai họ ọza, keme ma riẹ inọ iruemu itieye na e rrọ orivo kẹ okẹ uzuazọ.—Olezi 36:9.

²⁴ “You omọfa epanọ who you oma ra.” (Matiu 22:39) Ohwo nọ o wo uruemu ugbegbe orọnikọ ọye omariẹ ọvo uruemu na u re kpomahọ họ rekọ te ahwo nọ a kẹle riẹ. Wọhọ oriruo, ohwo ọ gbẹ be maki vovo isigareti hi rekọ o te bi se iwiri na rehọ, o rẹ sae wha ẹyao sei. Ohwo nọ ọ be wha enwoma se amọfa ọ be raha uzi Ọghẹnẹ nọ o ta inọ ma you erivẹ mai. Ohwo otiọye na ọ tẹ ta nnọ o you Ọghẹnẹ, yọ ọrue ọ ta.—1 Jọn 4:20, 21.

²⁵ ‘Romakpotọ kẹ isuisuẹsu gbe enọ a rọ udu kẹ, jẹ hai yoẹme kẹ ai.’ (Taitọs 3:1) Evaọ erẹwho buobu, ohwo nọ ọ dẹ oghẹrẹ imu jọ hayo lọ ai yọ ọ raha uzi. Uvi Ileleikristi a rẹ dẹ hayo lọ oghẹrẹ imu nọ uzi egọmeti o kẹ uvẹ rai hi hi.—Ahwo Rom 13:1.

26. (a) Re ma daji uyoyou Ọghẹnẹ, eme o gwọlọ inọ ma re ru? (b) Fikieme oma mai nọ ma re ru fuafo evaọ aro Ọghẹnẹ o jẹ rrọ uzuazọ nọ o mai fo eyeri?

²⁶ Re ma daji uyoyou Ọghẹnẹ, u fo inọ ma jọ fuafo, orọnikọ evaọ umutho eware jọ ọvo ho rekọ evaọ kabọ kabọ. O sae jọ bẹbẹ re ma si obọ no iruemu igbegbe nọ e reria omai obọ no, rekọ ma rẹ sai ru ei.d Onana họ uzuazọ nọ o mai fo eyeri, keme Jihova o bi wuhrẹ omai ẹsikpobi re ma wo erere kẹ oma mai. (Aizaya 48:17) Maero, ma te bi ru oma mai fuafo, ma ti wo evawere keme ma riẹ inọ ma be rọ ere wha ajiri se Ọghẹnẹ nọ ma you, ma vẹ te rọ ere daji uyoyou riẹ.

[Oruvẹ-obotọ]

[Etehe/Uwoho nọ e rrọ ẹwẹ-obe avọ 94]

KỌ MẸ BE DAWO ẸGBA MẸ KPOBI RE ME RU OWARE UWOMA?

Ehri-Uzi: “Mẹ rẹ nyẹ-oma mẹ, mẹ vẹ ta hiẹ obọ, [ogbẹrọ] ere he, mẹ nọ mẹ vuẹ amọfa no na mẹ vẹ te jọ ọnọ a rẹ sia.”—1 Ahwo Kọrint 9:27.

Enọ jọ nọ whọ rẹ nọ oma ra

▪ Nọ isiuru nọ me re ro ru oware uyoma e tẹ ziọ omẹ udu, kọ mẹ te lẹ kẹ ẹzi Ọghẹnẹ re o fi obọ họ kẹ omẹ whaha ekpehre isiuru na?—Matiu 6:13.

▪ Ẹvẹ ahwo nọ mẹ be nya usu kugbe, ighe ividio nọ me bi rri, gbe ile nọ mẹ be gaviezọ kẹ i bi kpomahọ ọtamuo mẹ nọ mẹ rọ gwọlọ whaha oware uyoma uruo?—1 Pita 4:3, 4.

▪ Fikieme eware iwoma nọ ohwo o bi ru o gbẹ rọ kẹe udu nọ ọ rẹ rọ raha izi jọ họ? —Matiu 23:25-28.

▪ Fikieme u je no omẹ eva ze re mẹ ruẹ uye wọhọ epanọ Jesu ọ ruẹ uye fiki oreva Ọghẹnẹ uruo? —1 Pita 2:21; 4:1.

▪ Kọ mẹ sae ta oware nọ me bi ro vovo isigareti hi kẹ omọfa?—Ahwo Rom 12:1, 2.

▪ Nọ uruemu nọ mẹ be gwọlọ si obọ no o tẹ va omẹ abọ ẹsejọ, kọ onana o nwani dhesẹ nọ mẹ sai ti si obọ noi vievie he?—Ahwo Rom 7:21-25.

[Etehe nọ e rrọ ẹwẹ-obe avọ 96]

“EWARE KPOBI E RẸ LỌLỌHỌ EVA OBỌ ỌGHẸNẸ”

Ọmọtẹ nọ a re se Helene ọ ta nọ: “Okenọ mẹ jọ ikpe 15, me je vovo isigareti kẹdẹ kẹdẹ, je lele egbẹnyusu mẹ da idi evaọ urere ẹkpoka. Uwhremu na, dede nọ mẹ rrọ uwou ọzae he avọ emọ esa, me te mu oghẹrẹ isigareti jọ nọ i re mu gaga họ evovo kẹse kẹse. Akpọ mẹ ọ tẹ raha no. Rekọ nọ me ti mu Ebaibol họ ewuhrẹ, avọ obufihọ Jihova, me te ti nwene je si obọ no ivovavovo na. O jọ bẹbẹ gaga, maero re me si obọ no oghẹrẹ isigareti nọ me je vovo na. O gbẹ rrọ obufihọ Jihova ha, mẹ hẹ sai nwene he. Rekọ enẹna mẹ rẹ sae ta inọ mẹ jọ uzuazọ mẹ ruẹ ẹgbagba eme ọ Jesu na no, inọ: ‘Eware kpobi e rẹ lọlọhọ eva obọ Ọghẹnẹ.’”—Matiu 19:26.

[Oruvẹ-obotọ]

[Iwoho nọ e rrọ ẹwẹ-obe avọ 91]

Ẹfuọ abọ-iwo o gwọlọ inọ ma re ru ugboma gbe ighẹ mai fihọ fuafo