Ahwo Nọ A Ru Fo Kẹ Iruo Iwoma
“Jọ oma ru oma mai fo uno eware nọ i re zue oma gbe ẹzi, re ma ru oma mai, ọrẹri kiete eva ozodhẹ Ọghẹnẹ.”—2 AHWO KỌRINT 7:1.
1. Eme Jihova ọ gwọlọ mi enọ e be gọe?
“ONO ọ sae gadiẹ ugbehru ỌNOWO na? Hayo ono ọ sae mudhe eva oria ẹri riẹ?” Devidi Ovie Izrẹl anwae na ọye ọ n’onọ urirẹ oyena kpahe egagọ nọ Jihova ọ rẹ jẹrehọ. Ọ tẹ kẹ uyo na: “Whaọ ọnọ o wo eva efuafo gbe eva ọvowa, ọnọ ọ rẹ kpare ẹzi riẹ ru oware ufofe he, ọ rẹ rehọ ẹghẹ duwuiyei gbe he.” (Olezi 24:3, 4) Re Jihova, ọnọ ọ rrọ oviede ẹfuọ na, ọ jẹ ohwo rehọ, ohwo na ọ rẹ jọ fuafo jẹ jọ ọrẹri. Vẹre, Jihova ọ kareghẹhọ ukoko Izrẹl nọ: “Wha ru oma rai fo re wha jọ ọrẹri, keme mẹ rọ ọrẹri.”—Iruo-Izerẹ 11:44, 45; 19:2.
2. Ẹvẹ Pọl gbe Jemis a ro fiẹgba họ epanọ ẹfuọ o w’uzou te evaọ egagọ uzẹme?
2 Ikpe-udhusoi buobu nọ e vrẹ, Pọl ukọ na o kere se ibe Ileleikristi nọ e jọ okpẹwho ogbekuo ọrọ Kọrint nọ: “Fiki epanọ ma wo eya enana no na, wha jọ oma ru oma mai fo uno eware nọ i re zue oma gbe ẹzi, re ma ru oma mai, ọrẹri kiete eva ozodhẹ Ọghẹnẹ.” (2 Ahwo Kọrint 7:1) Onana o wariẹ ru ẹme na vẹ inọ re ma wo usu kugbe Ọghẹnẹ je wo eghale nọ ọ yeyaa rai, ohwo ọ rẹ jọ fuafo hrọ jẹ kẹnoma kẹ egbegbe gbe ogbekuo ọrọ ugboma gbe ọrọ abọ-ẹzi. Epọvo na re, nọ o je kere kpahe egagọ nọ Ọghẹnẹ ọ rẹ jẹrehọ, Jemis olele na ọ ta nọ: “Egagọ efuafo nọ a rẹ jọ zue-oma obaro Ọghẹnẹ gbe Ọsẹ na ha, ena: nnọ, a re riwẹ imiwhrori avọ eyaukuotọ nọ uye o rẹbẹ, je riwi oma-obọriẹ kare epe eva akpọ na.”—Jemis 1:27.
3. Re Ọghẹnẹ ọ jẹ egagọ mai rehọ, eme ma re se gboja gaga?
3 Nọ ẹfuọ, ọrẹri, gbe ababọ epe i wuzou tere evaọ egagọ uzẹme na, ohwo kpobi nọ ọ gwọlọ wo ọjẹrehọ Ọghẹnẹ o re roro gaga kpahe ẹnyate ekwakwa nana. Rekọ, fikinọ ahwo nẹnẹ a wo itee gbe eriwo sa-sa kpahe ẹfuọ, u fo re ma wo otoriẹ je ru lele oware nọ Jihova o rri fihọ fuafo nọ ọ jẹrehọ. U fo re ma kiẹ oware nọ Ọghẹnẹ ọ gwọlọ mi egegagọ riẹ evaọ abọ nana via gbe oware nọ o ru no ro fiobọhọ kẹ ae re a jọ fuafo je wo ọjẹrehọ riẹ.—Olezi 119:9; Daniẹl 12:10.
Jọ Fuafo kẹ Egagọ Uzẹme
4. Dhesẹ oghẹrẹ otofa nọ Ebaibol na o wo kẹ ẹfuọ.
4 Rọ kẹ ahwo buobu, re a jọ fuafo u dhesẹ ọvo nọ ohwo na ọ rẹ kare uluhu hayo ogbekuo. Rekọ, evaọ Ebaibol na, ma wo ibiẹme Hibru gbe erọ Griki buobu nọ a ro dhesẹ otofa ẹfuọ orọnikọ evaọ abọ uwo ọvo ho rekọ maero evaọ abọ uruemu gbe abọ-ẹzi. Fikiere, obe-ofeme Ebaibol jọ o ta nọ: “Eme na ‘fuafo’ gbe ‘gbegbe’ e nwane rrọ eme nọ i re kiekpahe ẹme ọ orufuọ ọvo ho, rekọ e rẹ mai kiekpahe eme ọ egagọ. Fikiere, ẹme ‘ẹfuọ’ o kpomahọ enwenọ k’abọ k’abọ uzuazọ.”
5. Ẹvẹ Uzi Mosis na o kpọ ẹfuọ evaọ uzuazọ emọ Izrẹl te?
5 Evaọ uzẹme, Uzi Mosis na u wo izi gbe ijaje nọ i duobọte enwenọ abọ kpobi ọrọ uzuazọ emọ Izrẹl, dhesẹ oware nọ u fo gbe onọ a rẹ jẹrehọ gbe onọ o thọ. Wọhọ oriruo, evaọ Iruo-Izerẹ uzou avọ 11 rite 15, ma ruẹ ithubro nọ i kie kpahe ẹfuọ gbe egbegbe nọ a r’obọ k’otọ kele. A rri erao jọ gbegbe, yọ emọ Izrẹl e rẹ re ae he. Eyẹ o re ru aye fihọ gbegbe evaọ unuoke jọ. Eyao ovioma jọ, maero kọ oti, gbe ame nọ o bi hwẹ no oma ọzae avọ aye ze e sai ru ohwo fihọ gbegbe re. Uzi na u te je dhesẹ oware nọ a re ru evaọ iyero nọ i kpomahọ egbegbe. Wọhọ oriruo, eva Ikelakele 5:2, ma se nọ: “Je uzi kẹ ahwo Izrẹl re a si emoti no evuẹ rai no, gbe ohwo kpobi nọ o bi hwẹ, gbe ohwo kpobi nọ ọ rọ [oma] te ori o je zuoma.”
6. Fiki ẹjiroro vẹ a rọ rehọ izi ẹfuọ kẹ?
6 Ababọ avro, enana gbe izi efa nọ i no obọ Jihova ze i dhesẹ eriariẹ abọ imu gbe oma na nọ a riẹ evaọ oke oyena ha, yọ ahwo na a wo erere okenọ a te lele ai. Ghele na, orọnikọ a kẹ izi nana wọhọ izi omokpokpọ hayo ekpọvio kpahe eriariẹ imu ọvo ho. E jọ abọjọ egagọ uzẹme. Uzẹme na nnọ i duobọte uzuazọ ekẹdẹ kẹdẹ ahwo na—emuọriọ, eyẹ, usu orọo, gbe efa—u dhesẹ nnọ wọhọ Ọghẹnẹ rai, Jihova o wo udu nọ ọ rẹ rọ fodẹ oware nọ u kiehọ kẹ ae gbe onọ u fo ho evaọ abọ kpobi uzuazọ rai, onọ a ro mudhe no riẹriẹriẹ kẹ Jihova na.—Iziewariẹ 7:6; Olezi 135:4.
7. Ẹkwoma ekoko Uzi na, didi oghale u re te orẹwho Izrẹl?
7 Ọvọ Uzi na ọ thọ emọ Izrẹl na no iruemu ogbekuo ọ erẹwho nọ e wariẹ e rae họ na re. Ẹkwoma oma nọ a re ro totọ lele Uzi na, kugbe ẹgwọlọ kpobi nọ a rẹ rọ jọ fuafo evaọ ibiaro Jihova, emọ Izrẹl na a rẹ sae jọ fuafo kẹ egagọ Ọghẹnẹ rai je wo eghale riẹ. Evaọ abọ nana, Jihova ọ ta kẹ orẹwho na nọ: “Otẹrọnọ wha re ghine yo uru mẹ je koko ọvọ mẹ, wha rẹ te jọ efe-agheghọ rọ kẹ omẹ eva udevie erẹwho na kpobi; keme akpọ na kpobi ọ mẹ, wha rẹ te jọ rọ kẹ omẹ wọhọ uvie izerẹ gbe orẹwho Ọrẹri.”—Ọnyano 19:5, 6; Iziewariẹ 26:19.
8. Fikieme Ileleikristi nẹnẹ a jẹ gaviezọ kẹ oware nọ Uzi na o ta kpahe ẹfuọ?
8 Nọ Jihova o kere eme eyena kpobi fihọ Uzi na re a ro wuhrẹ emọ Izrẹl kpahe epanọ a rẹ rọ jọ fuafo, ọrẹri, je wo ọjẹrehọ riẹ na, kọ u gbe fo re Ileleikristi nẹnẹ a roma totọ roro epanọ a bi ru te evaọ abọ ọnana? Dedenọ Uzi na o gba Ileleikristi họ ha, a rẹ kareghẹhọ nnọ, wọhọ epanọ Pọl o ru rie vevẹ na, eware nọ a kere fihọ Uzi na kpobi yọ “uwoho eware nọ e be tha; o rọ Kristi họ uzedhe uvi eware na.” (Ahwo Kọlọsi 2:17; Ahwo Hibru 10:1) Otẹrọnọ Jihova Ọghẹnẹ, ọnọ ọ ta nọ “mẹ rẹ rẹriẹ hẹ,” o rri ẹfuọ gbe ababọ-ogbekuo evaọ egagọ uzẹme rro tere evaọ oke oyena, mai nẹnẹ ma re wo osegboja gaga kpahe ẹfuọ ugboma, uruemu, gbe abọ-ẹzi ma tẹ gwọlọ ọjẹrehọ gbe oghale riẹ.—Malakae 3:6; Ahwo Rom 15:4; 1 Ahwo Kọrint 10:11, 31.
Ẹfuọ Ugboma O rẹ Ta Ẹme Ezi Mai
9, 10. (a) Fikieme ẹfuọ ugboma ọ jẹ r’oja kẹ Oleleikristi? (b) Didi eme ahwo a be ta kpahe ikokohọ Isẹri Jihova?
9 Kọ ẹfuọ ugboma o gbe w’uzou evaọ egagọ uzẹme? Dedenọ ẹfuọ ugboma ọvo ọ sai ru ohwo fihọ uvi ọg’Ọghẹnẹ hẹ, u fo inọ uvi ọgegagọ ọ rẹ jọ fuafo evaọ ugboma te epanọ uyero riẹ o kuvẹ te. Maero nẹnẹ, nọ ahwo buobu a be daezọ ẹfuọ oma rai, ẹgọ rai, hayo okegbe rai hi na, ahwo a re muẹrohọ enọ i se ẹfuọ gboja. Onana o sae wha emamọ iyẹrẹ ze, wọhọ epanọ Pọl ọ ta kẹ Ileleikristi ahwo Kọrint na: “Ma ru ohwo ọvo zoruẹ eva oware ovo ho, re a siọ iruo mai ba ẹfuọ. Rekọ eva eware kpobi ma dhesẹ oma mai, wọhọ iruiruo Ọghẹnẹ.”—2 Ahwo Kọrint 6:3, 4.
10 Unuẹse buobu, ahwo egọmeti a jiri Isẹri Jihova no fiki ẹfuọ rai, ẹkpatiẹ rai, gbe uruemu adhẹẹ rai, onọ a rẹ mae ruẹ evaọ ikokohọ rai. Wọhọ oriruo, kpahe okokohọ jọ nọ a ru evaọ ubrotọ Savona, Itali, obe-usi na La Stampa o ta nọ: “Oware nọ whọ rẹ kaki muẹrohọ okenọ whọ tẹ be nya ogege na wariẹ họ ẹfuọ gbe ẹkpatiẹ ahwo nọ a be jọ etẹe ru okokohọ na.” Nọ Isẹri na a ru okokohọ no evaọ afe-aroza jọ evaọ São Paulo, Brazil, ọsẹro ogege na ọ tẹ ta kẹ ọnọ ọ be sẹro otu orufuọ riẹ nọ: “No umuo inẹnẹ vrẹ, ma gwọlọ re a ru ogege na fo epanọ Isẹri Jihova a ru rie na.” Omọfa nọ ọ rrọ iruo eva ogege ọvona ọ ta nọ: “Okenọ Isẹri Jihova a tẹ gwọlọ yare ogege na, oware ovo nọ ma re riwi họ edẹ na. Oware ofa o rrọ ẹbẹbẹ mai hi.”
11, 12. (a) Didi ehri-uzi Ebaibol ma re wo họ iroro a tẹ t’ẹme kpahe ẹfuọ ugboma? (b) Didi enọ a rẹ sae nọ kpahe uruemu gbe edhere uzuazọ mai?
11 Otẹrọnọ ẹfuọ gbe ẹkpatiẹ evaọ oria egagọ mai o sae wha ajiri se Ọghẹnẹ nọ ma be gọ, koyehọ ẹfuọ evaọ uzuazọ obọ mai u ghine wuzou re. Ghele na, evaọ obeva uwou mai, ma sai roro nọ u du fiẹme he ma re ru epanọ u j’omai. Yọ kpahe ẹgọ gbe osẹ, ma wo ufuoma nọ ma rẹ rọ salọ oware nọ ma roro nọ u kiehọ omai oma je siuru! Ghele na, evaọ abọ ologbo, ufuoma nana u wo umuo. Kareghẹhọ inọ evaọ ẹme kpahe ẹsalọ emu nọ ohwo ọ gwọlọ re, Pọl ọ vẹvẹ ibe Ileleikristi riẹ unu nọ: “Thakpọ wha yọrọ oma kẹ uvẹ onana, o gbẹrọ ere he u ve ti ru eyẹlẹ zoruẹ.” Kẹsena ọ tẹ fodẹ ehri-uzi jọ nọ u wuzou gaga: “Eware kpobi e rọ uzi, rekọ eware kpobi i wo obufihọ họ. Eware kpobi e rọ uzi, rekọ orọnọ eware kpobi e gbunu hu.” (1 Ahwo Kọrint 8:9; 10:23) Ẹvẹ ohrẹ Pọl na u ro kie kpahe omai evaọ ẹme ẹfuọ?
12 O rrọ oware iroro re ahwo a rẹro nọ ọgbodibo Ọghẹnẹ ọ rẹ jọ fuafo jẹ jọ kpatiẹ evaọ edhere uzuazọ riẹ. Fikiere u re mu omai ẹro inọ uwou gbe okegbe mai o bi si adhẹẹ no odẹ mai hi, wọhọ, egbodibo Ẹme Ọghẹnẹ. Didi isẹri uwou mai u bi se kpahe omai gbe ẹrọwọ mai? Kọ u dhesẹ nnọ ma ghine bi siuru ẹria evaọ akpọ ọkpokpọ ẹrẹreokie nọ ọ rrọ fuafo kpatiẹ, ọnọ ma be rọ ọwhọ ta usiuwoma riẹ kẹ ahwo na? (2 Pita 3:13) Epọvo na re, ẹgọ mai—makọ evaọ etoke eriosehọ obọmai hayo evaọ odibọgba na—ọ sae tua hayo si adhẹẹ no ovuẹ nọ ma bi whowho na. Wọhọ oriruo, muẹrohọ ẹme nana nọ ọniyẹrẹ obe-usi jọ evaọ Mexico ọ ta na: “Evaọ uzẹme, ibuobu nọ i ru ahwo Isẹri Jihova via họ emoha, yọ oware nọ a re muẹrohọ họ ebru eto rai, ẹfuọ rai, gbe emamọ ẹgọ rai.” Ẹvẹ oghọghọ riẹ o rro te nọ ma ro wo emoha itieye na evaọ udevie rai!
13. Eme ma rẹ sai ru re ma ruẹ nọ k’abọ k’abọ ọrọ uzuazọ ekẹdẹ kẹdẹ mai ọ rrọ fuafo kpatiẹ?
13 Ghinọ uzẹme, re ma ruẹ nọ oma mai, ekwakwa, gbe uwou mai e rrọ fuafo kpatiẹ ẹsikpobi o lọhọ họ. Oware nọ ma gwọlọ họ, orọnikọ ekwakwa ona eghaghae jọ họ, rekọ emamọ omaa gbe uvi omodawọ. Ma re fi oke họ hrọ kẹ erufuọ oma mai, iwu mai, uwou mai, omoto mai, gbe eware efa. Obọ nọ ma re kru ga evaọ odibọgba na, ekpohọ iwuhrẹ, gbe uwuhrẹ omobọ mai—fiba owha-iruo mai evaọ uzuazọ ekẹdẹ kẹdẹ—e rrọ udu nọ ma re ro gbabọkẹ ẹfuọ gbe ewo ọjẹrehọ evaọ aro Ọghẹnẹ gbe ahwo ho. Ehri-uzi nọ a riẹ ziezi na inọ “koware koware kpobi eva otọ akpọ na ọvuọ oke riẹ” u kie kpahe abọ uzuazọ mai nana re.—Ọtausiwoma Na 3:1.
Udu nọ U Gbeku Hu
14. Fikieme a jẹ sae ta nnọ ẹfuọ uruemu gbe abọ-ẹzi o mai wuzou vi ẹfuọ ugboma?
14 Epanọ u wuzou te re ma muẹrohọ ẹfuọ ugboma mai na, u wuzou viere re ma wo osegboja ọrọ ẹfuọ uruemu gbe abọ-ẹzi. Ma sae ta enẹ keme Jihova ọ se orẹwho Izrẹl, orọnikọ fikinọ a jọ gbegbe evaọ ugboma ha, rekọ fikinọ a gbeku evaọ uruemu gbe abọ-ẹzi. Ẹkwoma Aizaya ọruẹaro na, Jihova ọ ta kẹ ae nnọ fikinọ a rrọ “orẹwho umuomu, ahwo nọ egbegbe ọ vọ eva,” oye jabọ nọ idheidhe rai, ekoko ọvẹre ọkpokpọ gbe ẹdijala rai, ẹhẹ, makọ elẹ rai dede i ro zihe ruọ owha ogbẹgbẹdẹ kẹe. Eme a re ru a tẹ gwọlọ wariẹ wo aruoriwo Ọghẹnẹ? Jihova ọ ta nọ: “Wha họ oma rai, wha ru oma rai fo, wha siọ ugberuo rai no eva aro mẹ no. Wha se umuomu ba eruo.”—Aizaya 1:4, 11-16.
15, 16. Eme Jesu ọ ta nọ o re gbe ohwo ku, kọ ẹvẹ ma sai ro wo erere no eme ọ Jesu na ze?
15 Re ma riẹ epanọ ẹfuọ uruemu gbe abọ-ẹzi o wuzou te viere, roro kpahe ẹme nọ Jesu ọ ta evaọ okenọ otu Farisi gbe ikere-ebe na a ta nọ ilele riẹ a rrọ gbegbe fikinọ a wozẹ abọ rai re a tẹ te re emu hu. Jesu ọ kpọ rae họ inọ: “Orọnọ oware nọ o ruọ eva unu oye o rẹ lẹliẹ ohwo zue oma ha, rekọ oware nọ u no unu via, oye o rẹ lẹliẹ ohwo zue oma.” Jesu o te ru ẹme na vẹ nọ: “Eware nọ i re no unu via eva i re no tha, e ye e rẹ lẹliẹ ohwo zue oma. Keme eva iroro iyoma i re no tha, ijihẹ, ẹnwae-obro, uji, isẹierue, igberedha, ugbeguo. Enana họ eware nọ i re zue ohwo oma; rekọ emuọriọ avọ abọ nọ a wozẹ hẹ o re zue ohwo oma ha.”—Matiu 15:11, 18-20.
16 Eme ma rẹ sai wuhrẹ no eme ọ Jesu na ze? Jesu o je dhesẹ nnọ uruemu emuemu, ọfariẹ-ogbe, gbe uruemu ugbegbe i re no iroro imuomu erọ ọfariẹ-ogbe gbe iroro igbegbe nọ e rrọ udu ze. Wọhọ epanọ Jemis olele na o fi rie họ, “kohwo kohwo o re kie ruọ odawọ okenọ urusio avọ eguọlọ-aguọlọ riẹ e gba riẹ họ.” (Jemis 1:14, 15) Fikiere, ma gbẹ gwọlọ kie ruọ izieraha ilogbo nọ Jesu o dhesẹ na ha, ma re si iroro itieye na kpobi no udu mai. Oyena u dhesẹ nọ ma rẹ yọroma kpahe oware nọ ma bi se, rri, jẹ gaviezọ kẹ. Nẹnẹ, evaọ odẹ ọ ufuoma ẹmeọta jegbe re a riẹ ae odẹ, enọ i re kporo ile jẹ zaro a bi siobọno ile gbe ughe sa-sa nọ i re si oma-iwo uzioraha na urru. Ma rẹ yọroma re iroro itieye na e siọ owọ ba ewo evaọ udu mai. Ifue na họ, re ma ru oware nọ o rẹ were Ọghẹnẹ gbe onọ ọ rẹ jẹrehọ, ma rẹ yọroma ẹsikpobi re ma yọrọ udu nọ o fo jẹ kare egbegbe.—Itẹ 4:23.
Jọ Fuafo kẹ Iruo Iwoma
17. Fikieme Jihova ọ jẹ rehọ ahwo riẹ ziọ uyero ofuafo?
17 O ghinẹ rrọ oghale gbe uketha inọ, avọ obufihọ Jihova, ma rẹ sae reawere edikihẹ ọfuafo kugbei. (2 Ahwo Kọrint 6:14-18) Ghele na, ma re vuhumu inọ Jihova ọ rehọ ahwo riẹ ziọ uyero ofuafo rọkẹ ugogo ẹjiroro jọ. Pọl ọ ta kẹ Taitọs nnọ Kristi Jesu “ọ rehọ omariẹ kẹ omai re ọ ta omai no eyoma kpobi je ru ahwo riẹ fo kẹ oma riẹ enọ e rehọ oma rai kẹ iruo iwoma iruo.” (Taitọs 2:14) Wọhọ ahwo nọ a ru fo no, didi iruo ma re wo ọwhọ kẹ?
18. Ẹvẹ ma sai ro dhesẹ nnọ ma wo ọwhọ kẹ iruo iwoma?
18 Orọ ọsosuọ nọ o mai w’uzou, ma rẹ ya evaọ ewhowho emamọ usi Uvie Ọghẹnẹ. (Matiu 24:14) Evaọ ere oruo, ma rẹ rehọ ẹruore ẹria bẹdẹ bẹdẹ evaọ otọakpọ nọ o te kare ogbekuo kpobi bru ahwo evaọ oria kpobi. (2 Pita 3:13) Iruo iwoma mai i te je kugbe edhesẹ ubi ẹzi Ọghẹnẹ evaọ uzuazọ ekẹdẹ kẹdẹ mai, rọ ere jiri Ọsẹ obọ odhiwu mai. (Ahwo Galesha 5:22, 23; 1 Pita 2:12) Yọ enọ e rrọ ukoko na ha nọ eware okpẹtu e be via kẹ a rẹ thọrọ omai ẹro ho. Ma rẹ kareghẹhọ uthubro Pọl na: “Fikiere re, nọ uvẹ o gbẹrọ na, joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.” (Ahwo Galesha 6:10) Iruo itieye na kpobi, enọ ma re ru no udu ofuafo ze avọ emamọ iroro, e rẹ were Ọghẹnẹ.—1 Timoti 1:5.
19. Didi eghale e be hẹrẹ omai ma tẹ ruabọhọ ekru ute ukpehru orọ ẹfuọ—evaọ ugboma, uruemu, gbe abọ-ẹzi?
19 Wọhọ idibo Ọnọ Ọ Mae Rro na, ma rẹ kareghẹhọ eme ọ Pọl na: “Imoni, mẹ rehọ epa ehrọ Ọghẹnẹ lẹ owhai re wha ru oma rai rọ iwẹ e kpokpọ gbe ọrẹri o nọ Ọghẹnẹ ọ rẹ jẹrehọ, nọ e rọ egagọ Ẹzi rai.” (Ahwo Rom 12:1) Ajọ ma gbe wo ovuhumuo kẹ uvẹ-ọghọ nọ Jihova o bi ro ru omai fo na jẹ dawo uthoma mai yọrọ ute ukpehru orọ ẹfuọ ugboma, uruemu gbe orọ abọ-ẹzi. Ere oruo orọnikọ o te wha adhẹẹ gbe evevọwẹ s’omai ọvo ho rekọ te ẹruore ẹruẹ “eware anwae” na—uyerakpọ omuomu ogbekuo nana—nọ o te vrẹ no nọ Ọghẹnẹ ‘o ti ru eware kpobi fihọ ekpokpọ.’—Eviavia 21:4, 5.
Kọ Whọ Kareghẹhọ?
• Fikieme a jẹ kẹ emọ Izrẹl izi buobu kpahe ẹfuọ?
• Ẹvẹ ẹfuọ ugboma o rẹ rọ lẹliẹ ovuẹ nọ ma bi whowho na siuru viere?
• Fikieme ẹfuọ uruemu gbe ọrọ abọ-ẹzi o jẹ mai wuzou vi ẹfuọ ugboma?
• Ẹvẹ ma sai ro dhesẹ nnọ mai yọ ahwo nọ a “rehọ oma rai kẹ iruo iwoma iruo”?
[Iwoho nọ e rrọ ẹwẹ-obe avọ 29]
Ẹfuọ ugboma o rẹ lẹliẹ ovuẹ nọ ma bi whowho na siuru viere
[Uwoho nọ o rrọ ẹwẹ-obe avọ 30]
Jesu ọ vẹvẹ unu nnọ iroro iyoma i re su kpohọ uruemu uyoma
[Iwoho nọ e rrọ ẹwẹ-obe avọ 31]
Wọhọ ahwo nọ a ru fo no, Isẹri Jihova a wo ọwhọ kẹ iruo iwoma