Rẹro Da Uvẹ Kpobi nọ Whọ Sae rọ To Uwuhrẹ Ebaibol Họ
1. Eme o gwọlọ re ma ru iruo nọ Jesu ọ k’omai evaọ Matiu 28:19, 20 na gba?
1 Jesu o vi omai inọ ma ‘ru ilele je wuhrẹ ai.’ (Mat. 28:19, 20) Fikiere, o rẹ jọ omai oja re ma to uwuhrẹ Ebaibol họ kugbe ahwo ẹsikpobi orọnikọ evaọ ẹdẹ nọ ukoko mai u fihọ na ọvo ho. Eware nọ ma be te t’ẹme te na e sai fi obọ họ.
2. Amono ma rẹ sae t’ẹme kẹ kpahe uwuhrẹ Ebaibol?
2 Tẹme Kpahe Uwuhrẹ Ebaibol: Epanọ ma t’ẹme kpahe uwuhrẹ Ebaibol kẹ ahwo te, ere uvẹ nọ ma re ro wo ọjọ o rẹ lọhọ te. (Ọtausi. 11:6) Kọ whọ dawo obe-uwuhrẹ nọ a re muhọ ovavo no? Ere ukoko jọ evaọ obọ United States a ru evaọ amara ọsoso. Eva e were rai gaga nọ a rọ to ebe-iwuhrẹ Ebaibol 42 ekpokpọ họ. Who du roro ho inọ ahwo nọ whọ be ta usiuwoma kẹ a riẹ nọ who re wuhrẹ Ebaibol kugbe ahwo. Nọ whọ tẹ wariẹ zihe bru ai, t’ẹme kpahe uwuhrẹ Ebaibol kẹ ae. A gbẹ jẹ uwuhrẹ rehọ họ, jọ o k’owhẹ uye he. Whọ rẹ sae gbẹ bọ isiuru ohwo na ga. Kọ whọ nọ ahwo nọ wha gbẹ rrọ okegbe, imoni, ibe-iruiruo, gbe ibe emọ-isukulu ra no sọ whọ rẹ sai wuhrẹ Ebaibol kugbe ae? Whọ sae jẹ nọ emọ-uwuhrẹ Ebaibol ra sọ a wo egbẹnyusu hayo imoni nọ e te jẹ uwuhrẹ Ebaibol rehọ.
3. Omobe-ovẹvẹ vẹ ma sae rọ to ebe-iwuhrẹ họ, kọ okevẹ ma sae rọ rehọ iẹe ruiruo?
3 Omobe-Ovẹvẹ nọ U re Fi Obọ Họ: Omobe-ovẹvẹ na Kọ Whọ Gwọlọ Riẹ Uzẹme Na? u re fi obọ họ evaọ ẹtohọ ebe-iwuhrẹ Ebaibol. Whọ rẹ sae rehọ omobe-ovẹvẹ nana kẹ ahwo o tẹ make rọnọ a rehọ obe ofa hayo a rehọ họ. Whọ rẹ sae rehọ iẹe kẹ ahwo nọ whọ tẹ be ta usiuwoma evaọ ẹkwotọ ekiọthuọ, evaọ iyẹrẹ, nọ who te bi vi ileta, gbe okenọ who te bi ru izihebro. A rẹ sae jẹ nyase iẹe ba iwou nọ a di ahwo họ họ. Nọ who te bi kpohọ erẹ, obọ eki, gbe oria iruo ra, kọ whọ gbẹ whae lele oma? A jọ obọ uke riẹ ta kpahe uwuhrẹ Ebaibol nọ ma re ru kugbe ahwo, jẹ fodẹ obe ọ Ebaibol Wuhrẹ na.
4. Ẹvẹ ma sae rọ rehọ omobe-ovẹvẹ na Kọ Whọ Gwọlọ Riẹ Uzẹme Na? to uwuhrẹ họ?
4 Nọ whọ tẹ rehọ omobe-ovẹvẹ na kẹ ohwo no, who ve dhesẹ enọ nọ e rrọ ẹwẹ-obe ọsosuọ na kẹe, whọ vẹ nọe nọ, “Evaọ usu enọ nana, ovẹ whọ gwọlọ riẹ uyo riẹ?” Kẹsena wha ve se uyo na no omobe-ovẹvẹ na ze, je se hayo t’ẹme kpẹkpẹe kpahe ọruẹrẹfihotọ uwuhrẹ Ebaibol nọ o rrọ uke omobe na. Kẹsena whọ vẹ jọ obe ọ Ebaibol Wuhrẹ na dhesẹ uzoẹme nọ ọ rẹ sae jọ ruẹ evuẹ efa kpahe ẹme na, rehọ obe na kẹe, wha ve je fi oke họ nọ who ti ro zihe.
5. Fikieme ma jẹ rẹro da uvẹ kpobi nọ ma sae rọ to uwuhrẹ Ebaibol họ?
5 Ahwo nọ a gwọlọ riẹ oware nọ Ebaibol u gine wuhrẹ a gbẹ rrọ ẹkwotọ mai. Ma tẹ be rẹro da uvẹ kpobi nọ ma sae rọ to uwuhrẹ Ebaibol họ kugbe ahwo, ma ti wo oghọghọ ziezi nọ ma bi fi obọ họ kẹ amọfa re a ziọ edhere uzuazọ na.—Mat. 7:13, 14.