Tẹrovi Ewuhrẹ Ahwo re A Zihe Ruọ Ilele
1. Eme o gwọlọ nọ ma re ru re ahwo a ruẹse zọ?
1 Iyẹrẹ iruo ukpe 2014 i dhesẹ nọ idibo Ọghẹnẹ a mugba nọ a re whowho emamọ usi Uvie na avọ ajọwha. (Mat. 24:14) Ma bi whowho ovuẹ Uvie na vi epaọ ọsosuọ ẹkwoma usiuwoma n’uwou ruọ uwou, emebe-evẹvẹ avọ ebe-uzizie nọ ma rẹ ghale, gbe usiuwoma ẹgbede na. Rekọ re ahwo a ruẹse zọ, o gwọlọ nọ ma re wuhrẹ Ebaibol na kugbe ai re a zihe ruọ ilele Jesu.—1 Tim. 2:4.
2. Enọ vẹ ma rẹ nọ omamai nọ i re fiobọhọ kẹ omai rọ uvẹ kpobi mu uwuhrẹ Ebaibol họ?
2 Ruẹrẹ Oma Kpahe re Who Mu Uwuhrẹ Ebaibol Họ: Whọ tẹ ruẹ ohwo nọ o dhesẹ isiuru, kọ whọ be daoma mi ei inọmba ifonu riẹ hayo adrẹse oria nọ ọ be rria jẹ daoma zihe ẹruoke re who mu obe-uwuhrẹ Ebaibol họ kugbei? Ẹdẹ vẹ kẹle who mu obe-uwuhrẹ Ebaibol họ ovavo kugbe ahwo nọ whọ nyaku? Ẹdẹ vẹ kẹle whọ vuẹ ahwo nọ whọ rẹ kẹ emagazini kamara kamara nọ ma re wuhrẹ Ebaibol kugbe ahwo? Kọ who dhesẹ ividio Fikieme Who re ro Wuhrẹ Ebaibol Na? avọ Ẹvẹ A re Ru Obe-Uwuhrẹ Ebaibol? kẹ ahwo nọ wha gbe bi ru iruo no, ibe emọ-isukulu ra, egbẹrioma, imoni ra, gbe amọfa nọ whọ riẹ no? Whọ tẹ be rọ emẹjẹ hayo oware nọ a re fi ebe họ ghelie ta usiuwoma, kọ whọ be hae vuẹ ahwo nọ a rehọ obe nọ ma re wuhrẹ kugbe ahwo inọ ma rẹ rehọ obe na wuhrẹ Ebaibol kugbe ahwo ọvọvẹ?
3. Re ma wuhrẹ ahwo uzẹme na ziezi, eme o gwọlọ?
3 Jihova avọ Jesu A ti Fiobọhọ kẹ Owhẹ: Taure Jesu ọ tẹ te ta nọ a fiobọhọ kẹ ahwo “re a zihe ruọ ilele,” ọ kake ta nọ “wha nyai wuhrẹ,” onọ u dhesẹ nọ ma rẹ j’owọ jẹ rọ ẹgba mai kpobi ru ei. Ghele na, ọ ya eyaa nọ ọ te jọ kugbe omai. (Mat. 28:19, 20) Ofariẹ, Jihova ọ kẹ omai ẹzi ọfuafo riẹ gbe eware nọ ma rẹ rọ ta usiuwoma je bi wuhrẹ omai epanọ ma re ro wuhrẹ ahwo uzẹme na. (Zek. 4:6; 2 Kọr. 4:7) Ma rẹ sae lẹ nọ ọ kẹ omai “isiuru na gbe ogaga” nọ ma re ro ru iruo nana nọ i wuzou gaga na.—Fil. 2:13.
4. Fikieme ma rẹ rọ tẹrovi ahwo nọ ma re wuhrẹ re a zihe ruọ ilele?
4 Usiuwoma nọ ma be ta o be wha evawere se omai gaga. Rekọ, ma rẹ mai wo evawere nọ ma te bi wuhrẹ ohwo jọ uzẹme na je fiobọhọ kẹe kuomagbe omai evaọ “edhere nọ o bi su kpohọ uzuazọ.” (Mat. 7:14; 1 Tẹs. 2:19, 20) Maero, ma tẹ tẹrovi ewuhrẹ ahwo re a zihe ruọ ilele, yọ ma bi ru oreva Jihova ọnọ “ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.”—2 Pita 3:9.