Izihebro I Re Su Kpohọ Ebe-Iwuhrẹ Ebaibol
1 Jesu ọ kẹ ilele riẹ ujaje orọnikọ re a ta usiuwoma ọvo ho rekọ re a ‘ru ilele . . . , je wuhrẹ ai.’ (Mat. 28:19, 20) Ọtausiwoma o re whowho ovuẹ, rekọ owuhrẹ o re ru vi ere. Owuhrẹ o re wuhrẹ, ru ẹme vẹ, jẹ kẹ imuẹro. Edhere jọ nọ ma re ro wuhrẹ amọfa họ ẹkwoma ezihebru enọ i dhesẹ isiuru avọ ẹjiroro ọ ebe-iwuhrẹ Ebaibol nọ ma re muhọ kugbe ai.
2 Ono who re zihe bru? Ruẹ nnọ who zihe bru ohwo nọ who fi obe họ ada kẹ hayo ohwo nọ o dhesẹ makọ isiuru ekakao kẹ emamọ usi na. Otẹrọnọ whọ ruẹ isiuru evaọ oke isẹri-ise ẹgbede, dao oma wo adrẹse ohwo na hayo inọmba ifonu riẹ te obọ re whọ sae bọ isiuru na haro. Wo irẹro kpahe emuhọ ebe-iwuhrẹ Ebaibol. Ruẹ abọ họ ẹgwọlọ ahwo nọ a te jẹ uwuhrẹ Ebaibol rehọ, yọ whọ te rue rae.—Mat. 10:11.
3 Dhesẹ Isiuru Omobọ Ohwo: Omaruẹrẹhọ kẹ emamọ ozihebro u re muhọ evaọ iweze ọsosuọ. Etausiuwoma obokparọ a re mu ẹro họ oware nọ u si ohwo nọ o wo uwou na urru, jẹ rehọ oyena ru iruo wọhọ otọhotọ rọkẹ ẹmeọta ọfa rai. Ahwo jọ a rehọ e riẹ nnọ o rẹ kẹ erere re a nọ onọ fihọ otọ eva ekuhọ iweze rai nọ o rẹ kpare isiuru ọnọ o wo uwou na kẹ iweze n’etha. Uvi isiuru nọ ma re wo kpahe ahwo o rẹ lẹliẹ omai roro kpahe ae makọ okenọ ma te no unuẹthẹ rai no, yọ o rẹ wọ omai wariẹ zihe ababọ oke oraha. O tẹ lọhọ, dao oma zihe nọ isiuru na e gbẹ riẹ na—ẹsejọ o sae jọ ẹdẹ-ọvo hayo edẹ-ivẹ.
4 Nọ who te bi ru ozihebro, dao oma kpọ iroro rri ẹme nọ wha ta evaọ iweze ra nukpo. Ru ei fihọ ute ra re, o tẹ kawo, who se oria ikere ọbọga ọvo jọ eva oke kpobi nọ whọ nya, jọ u no owhẹ eva ze re whọ hae gaviezọ. Dao oma riẹ ọnọ o wo uwou na ziezi. Kẹsena eva iweze nọ i lele i rie, rehọ uzẹme Ẹme Ọghẹnẹ nọ o mai kie kpahe isiuru riẹ ro lele iei ta ẹme.
5 Fi Ẹro Họ Otọ kẹ Obe-Uwuhrẹ Ebaibol: Ru izihebro avọ ẹjiroro emuhọ obe-uwuhrẹ Ebaibol. Ẹvẹ a sai ro ru onana? Ta kẹ ohwo na nnọ whọ gwọlọ ta ẹme isiuru jọ kugbei, who ve rovie kpohọ edhe-ẹme jọ evaọ obe Eriariẹ na hayo ibroshọ Gwọlọ na nọ who roro nọ u ti si ohwo na urru. Se edhe-ẹme na, nọ onọ na, je se oria ikere ọvo hayo ivẹ nọ a fodẹ na. A rẹ sai ru onana eva unuẹthẹ na evaọ iminiti isoi rite ikpe. Kuhọ avọ onọ nọ o kẹle riẹ nọ whọ rẹ nọ, je ru ọruẹrẹfihotọ nọ wha ti ro mu ẹmeọta na họ no etẹe vrẹ evaọ okeofa.
6 Ẹbọ isiuru kpobi nọ ma nya ku evaọ odibọgba mai o rrọ oja. Fikiere, ruẹrẹ oke fihọ eva omaa ẹkpoka ra nọ who re ro ru izihebro. Ere oruo o te lẹliẹ odibọgba ra wo ẹgba vi ere jẹ wha uvi oghọghọ ze.
[Study Questions]
1. Fikieme iruo ozihebro i je wuzou te ere?
2. Ono ma re zihe bru?
3, 4. Eme o gwọlọ re a ru obọdẹ izihebro?
5. Edhere ọlọlọhọ vẹ a sai ro mu ebe-iwuhrẹ Ebaibol họ?
6. Ẹvẹ ma sai ro dhesẹ nnọ ma wo ovuhumuo epanọ izihebro nọ a re ru i wuzou te?