Fi Obọ họ kẹ Enọ ‘I Wo Eva Ezi’
1. Amono Jihova o bi koko họ bru oma riẹ evaọ edẹ mai na?
1 Duohwo duọ ẹkẹ uruemu nọ o wo evaọ udu riẹ. (Mat. 12:35) Ebaibol e ta kpahe ohwo nọ “ẹmo ọ vọ eva riẹ.” (Ol. 55:21) Ahwo jọ a rrọ “ọgbaofuomuo.” (Itẹ 29:22) Rekọ ahwo jọ a riẹ re nọ a ‘wo eva ezi kẹ uzuazọ ebẹdẹ bẹdẹ.’ (Iruẹru 13:48) Evaọ edẹ mai na, Jihova o bi koko ahwo eva ezi itieye na họ bru oma riẹ. (Hag. 2:7) Ẹvẹ ma sai ro fi obọ họ kẹ ae zihe ruọ egegagọ Jihova?
2. Eme o gwọlọ re ma sai ru iruo ilele-iruo nọ a kẹ omai na gba?
2 Se Ozihebro Gboja: Re ma sai ru iruo ilele-iruo nọ a kẹ omai na gba, emamọ eriwo nọ ma re wo kpahe eruo izihebro o r’oja. (Mat. 28:19, 20) Kọ ma be rọ osegboja nya lele isiuru nọ ma ruẹ? Kọ ma be wariẹ zihe bru ahwo kpobi nọ a rehọ obe mi omai hayo enọ i dhesẹ isiuru kpahe emamọ usi na? Kọ ma be ruabọhọ omodawọ nọ ma re ro fi obọ họ kẹ ae rro haro evaọ abọ-ẹzi? Nọ o rrọ ẹme uzuazọ na, ma rẹ daoma bọ isiuru kpobi nọ ma ruẹ.
3. Eme ma re ru nọ ma te lele ohwo tẹme no evaọ odibọgba na?
3 Nọ whọ gbẹ be kareghẹhọ ẹme nọ who lele ohwo nọ o dhesẹ isiuru ta na, daoma kere odẹ gbe adrẹse riẹ fihọ otọ. Kere ẹme nọ wha ta kpahe na fihọ otọ, ikereakere nọ wha se, gbe obe nọ who fihọ ada kẹe. Nọ who te ru ere no, whọ vẹ daoma zihe vẹrẹ vẹrẹ.
4. Ẹvẹ ma sai ro ru emamọ izihebro?
4 Eruo Ozihebro: Nọ who te bi ru ozihebro, oma nọ who re ru sasasa, jẹ jọ whẹtiẹ whẹtiẹ, gbe emamọ isiuru omobọ-ohwo nọ who re dhesẹ kẹ ohwo nọ o wo uwou na u re fi obọ họ. Tọ ẹme ra vi Ikereakere na je ru ei lọlọhọ. Ruẹrẹ oria Ebaibol jọ nọ u siuru fihọ nọ whọ te ta ẹme kpahe, yọ evaọ ekuhọ iweze na, nọ onọ jọ fihọ otọ nọ whọ te kuyo riẹ evaọ iweze n’etha. O rẹ mai woma re whọ whaha ikẹ-isio kpahe ẹmẹme kpobi nọ ohwo na ọ ta nọ ọ rọwo kugbe ikereakere na ha. Daoma ta ẹro vi eware nọ whai imava wha jọ rọwo kugbe.—Kọl. 4:6.
5. Omodawọ vẹ ọkobaro jọ o ru, kọ eme o no riẹ ze?
5 Eruo izihebro o gwọlọ omodawọ, rekọ irere nọ i re no i ze e rẹ kẹ evevọwẹ. Ọkobaro jọ evaọ Japan o fi ute họ re ọ hai fiba izihebro riẹ kamara kamara. O te mu edẹ ahwo kpobi nọ ọ nyaku evaọ usiuwoma ota n’uwou-ruọ-uwou họ ekere fihotọ, kẹsena o ve zihe bru ahwo na eva oware wọhọ edẹ ihrẹ. Ọ rẹ nabe rọ oma totọ ruẹrẹ ẹme nọ ọ te ta họ, jẹ wha iruo riẹ haro avọ udu nọ o fihọ ovuẹ nọ ọ be wha na vọvọ. Evaọ iweze riẹ jọ, ọ sai mu uwuhrẹ họ kugbe ohwo jọ nọ ọ ta nọ: “Mẹ be hai le owhai anwẹdẹ. Onana họ orọ ọsosuọ nọ mẹ rọ gaviezọ.” Ithihakọ ọkobaro na e wha emamọ iyẹrẹ ze. Evaọ urere amara ọsosuọ na, ọ nẹ iyẹrẹ ebe-iwuhrẹ Ebaibol ikpe.
6. Fikieme o jẹ r’oja re ma ruabọhọ eruo izihebro?
6 Iyero ahwo i bi dhe enwenwene ẹsikpobi. (1 Kọr. 7:31) O gwọlọ nọ a re zihe ẹsibuobu re a tẹ wariẹ di ohwo nọ o dhesẹ isiuru họ uwou. Ẹkwoma osegboja nọ ma re ro ru izihebro, ma rẹ sai fi obọ họ kẹ ahwo nọ a wo eva ezi nya ruọ edhere nọ o bi kpohọ uzuazọ ibẹdẹ bẹdẹ na.—Mat. 7:13, 14.