Ma Gwọlọ—Iwuhrẹ Ebaibol Efa

¹ Jihova Ọghẹnẹ ọ be rehọ ẹvi nọ o bi serihọ họ ghale ukoko otọakpọ riẹ. Evaọ ukpe iruo ọ 1997 na, ahwo 375,923 e họ-ame evaọ akpọ-soso—nọ a tẹ ghale iẹ o rẹ jọ ilele ekpokpọ nọ i bu vi 1,000 evaọ kẹdẹ kẹdẹ, hayo ole ahwo 43 evaọ auwa kpobi! Ghelọ ikpe ọbẹwẹ buobu nọ inievo mai a rẹriẹ ovao dhe no evaọ abọ sa-sa akpọ na, iruo Uvie na e be nyaharo yọ ẹvi ologbo ọ be roma via. Ẹvẹ o sasa oma te re ma se kpahe ẹnyaharo nọ ọ rrọ ẹvaha ọ emamọ usi na!

² Evaọ Nigeria eva etoke ukpe iruo ọ 1997 na, ma wo ẹvi buobu evaọ unu iwhowho-uvie gbe ekobaro ubroke, evaọ euwa nọ ma rọ ta usiuwoma, jegbe unu emebe, ibroshọ, gbe emagazini nọ ma fihọ ada. Ẹvi ọ jọ unu ahwo nọ a họ-ame gbe unu nọ o mai bu kpaobọ evaọ ahwo nọ a kpohọ Ekareghẹhọ na. K’ẹvẹ kpahe izihebro gbe iruo iwuhrẹ Ebaibol? Ẹvi ọ jọ unu izihebro gbe ẹvi ọ 5 evaọ udhusoi evaọ iwuhrẹ Ebaibol. Nọ eva e be were omai fiki ẹvi ọnana, ẹghale iwuhrẹ Ebaibol kẹ omomọvo ọrọ 0.9 evaọ ukpe iruo oyena u dhesẹ nọ orọnikọ ahwo kpobi a bi ru iwuhrẹ Ebaibol k’amara k’amara ha. Whaọ yọ, abọ odibọgba enana họ enọ e r’oja evaọ iruo aru-ilele na. Kọ eme mai omomọvo ma re ru re ma ruẹsi ru iwuhrẹ Ebaibol kẹse kẹse?

³ Bọ Ẹgwọlọ ọ Obe Uwuhrẹ Gaga: U fo nọ ma rẹ tẹrovi epanọ ma rẹ rọ jọ gaga jẹ jọ jajaja evaọ abọ-ẹzi. Ilele uzẹme ọ Kristi a “rehọ oma rai kẹ iruo iwoma iruo.” (Tait. 2:14) Nọ ma tẹ kiẹ odibọgba mai riwi, kọ ma sae ta nọ o r’omai oja gaga re ma zihe bru ahwo nọ ma fi ebe họ ada kẹ kpobi evaọ usiuwoma ota? Kọ ma bi dhesẹ ọwhọ kpahe obe uwuhrẹ Ebaibol nọ ma rẹ kẹ ahwo nọ a wo isiuru? (Rom 12:11) Hayo kọ o gwọlọ re ma bọ ẹgwọlọ kẹ ozihebro gbe emuhọ iwuhrẹ Ebaibol mai rro viere?

⁴ Isase Ebaibol omobọ ohwo, ewuhrẹ ọnya kẹse kẹse, gbe ewuhrẹ ọ ebe ukoko na i re ru omai kpokpọ evaọ abọ-ẹzi jẹ k’omai ẹgba ẹkwoma ẹzi Ọghẹnẹ. (Ẹf. 3:16-19) Onana o rẹ bọ ẹrọwọ gbe evaifihọ Jihova mai avọ uyoyou mai kẹ ọrivẹ mai gaga. O te w’omai re ma wuhrẹ omọfa jọ kpahe uzẹme na, rehọ ere ru odibọgba mai siuru, kparobọ, jẹ kpakpa ahwo. Ẹhẹ, u fo re ma gwọlọ iwuhrẹ Ebaibol viere!

⁵ Kaki Wuhrẹ Kugbe Uviuwou Ra: Eyewọ Ileleikristi nọ emọ rai e be rria kugbe a re wo isiuru kpahe omaa ọ uwuhrẹ Ebaibol uviuwou kẹse kẹse rai. (Izie. 31:12; Ol. 148:12, 13; Itẹ 22:6) O te kẹ erere gaga otẹrọnọ eyewọ i wuhrẹ ibrọshọ Gwọlọ na kẹsena a ve je wuhrẹ obe ọ Eriariẹ na kugbe emọ rai re a ruẹrẹ ae họ kẹ ete-kẹ iwhowho-uvie nọ e te họ-ame he jegbe omarọkẹ gbe ame-ọhọ. Uzẹme, a rẹ sai wuhrẹ obe ofa, wọhọ epanọ ẹgwọlọ gbe ikpe ọmọ na e rrọ. Ọyewọ nọ o bi wuhrẹ ọmọ nọ ọ te họ-ame he ọ rẹ sai kele uwuhrẹ na, oke, gbe ozihebro, wọhọ epanọ a dhesẹ fihọ Ẹkpẹti Onọ evaọ Odibọgba Uvie Mai ọrọ June 1987 na (ọrọ Oyibo).

⁶ Nyaharo Evaọ Oma-Okprẹhọ: Nọ a te roro unu emagazini, ibroshọ, gbe ebe nọ a fihọ ada no, avro ọ riẹ hẹ inọ ma be kọ ibi buobu. Ibi uzẹme enana nọ a kọ na i dhesẹ irẹro ilogbo rọkẹ ilele ekpokpọ. Rekọ kọ ọwhẹrẹ hayo ọruẹrẹ-ọgbọ ọ rẹ sai ghine wo evevọwẹ otẹrọnọ ọ kọ buobu, jẹ lahiẹ oma yena no, o gbe wo oke nọ o re ro vu hu? Ijo. Epọvo na, ozihebro evaọ odibọgba ọ r’oja.

⁷ Kọ whọ rẹ ruẹrẹ oke họ ẹsikpobi re who ru ozihebro? Zihe bru ahwo nọ a wo isiuru kpobi evaọ ẹruoke. Ru ozihebro avọ ẹjiroro ọ emuhọ uwuhrẹ Ebaibol. Kọ who bi kere iyẹrẹ izihebro ra fuafo, gbagba, jẹ jọ kpatiẹ? Jọ u mu owhẹ ẹro nọ who kere ẹdẹ nọ who tu nya na, ebe nọ who fihọ ada kpobi, edhesẹ ọkpẹkpẹ ọrọ eme nọ whọ ta, gbe oria nọ whọ te jọ muhọ evaọ okiofa, kugbe odẹ avọ adrẹse ọnọ o wo uwou na. Nya siọ oria ba evaọ iyẹrẹ ra na rọ kẹ evuẹ efa nọ who re fibae kẹse kẹse nọ who zihe nya.

⁸ Kiẹ Epanọ A re ru Ozihebro: Eme họ eware jọ nọ a re wo fihọ iroro evaọ okenọ a te zihebru ohwo nọ o wo isiuru? (1) Jọ jajaja, whẹtiẹwhẹtiẹ, sasasa, je wo oma ọ iweze gheghe. (2) Ta kpahe izoẹme hayo enọ nọ i re si ei urru. (3) Ru ẹmeọta na lọlọhọ je si ei no Ikereakere ze. (4) Evaọ ozihebro kpobi, daoma wuhrẹ ọnọ o wo uwou na oware jọ nọ o re vuhumu nọ u wo erere kẹe. (5) Bọ irẹro ọ uzoẹme nọ wha te ta kpahe evaọ iweze efa na fihọ iẹ. (6) Whọ rria kri hrọ họ. (7) Whọ nọ enọ nọ e rẹ dha ọnọ o wo uwou na eva ha hayo enọ i re bru ei udu. (8) Dhesẹ orimuo re whọ siọ eriwo ọthọthọ hayo iruemu iyoma ọnọ o wo uwou na ba ebrukpe taure whọ tẹ te kọ ovuhumuo abọ-ẹzi fihọ iẹ.—Rri uko obeva ọ Odibọgba Uvie Mai ọrọ March 1997 rọkẹ obufihọ ofa kpahe epanọ a sae rọ kparobọ evaọ izihebro gbe emuhọ iwuhrẹ Ebaibol.

⁹ Kiẹ Uvẹ Kpobi Via: Evaọ ukoko jọ, o jọ lọlọhọ re a wo edẹ gbe inọmba ọ ahwo nọ a be rria uwou jọ nọ a be jọ rro-irro egaga. A te kere ileta se ahwo kpobi nọ e be rria etẹ, yọ a fi emebe-evẹvẹ ivẹ họ ileta na. Eva ekuhọ ileta na, a tẹ fodẹ uwuhrẹ Ebaibol kẹ ae je fiọ inọmba ifonu jọ kugbe ei re ahwo na a sae za ẹme ze. Evaọ umutho edẹ jọ ọvo, ọmoha jọ o te fonu be yare obe uwuhrẹ. A te zihebru ei evaọ okiokiọ riẹ, a te mu uwuhrẹ họ evaọ obe ọ Eriariẹ na. Evaọ aso ọyena ọmoha na o kpohọ Uwuhrẹ Obe Ukoko, je muọ iwuhrẹ kpobi họ ẹnya. Enwene okiovo na, o ro mu Ebaibol na họ ese kẹdẹ kẹdẹ je wo ẹnyaharo kpohọ ame-ọhọ.

¹⁰ Iwhowho-uvie jọ nọ e jọ utu ovo a ru ọruẹrẹfihọ re a kpohọ ozihebro kugbe. Evaọ okenọ oniọvo-ọmọtẹ jọ ọ nyabru ohwo riẹ jọ, ohwo nọ ọ nyabru na ọ jọ uwou hu, rekọ uvovo aye ọfa jọ ọ tẹ kp’unu, anọ: “Mẹ be hẹrẹ owhẹ vẹre.” Ọnọ o wo uwou na o wo obe Eriariẹ na mi ohwo jọ nọ ọ riẹ vẹre no. Evaọ okenọ oniọvo-ọmọtẹ na o ro te unuẹthẹ riẹ na, yọ aye na o se obe na reno isiava yọ evuẹ nọ e riẹ i si rie urru gaga. Aye na ọ ta nọ u gbe rie unu hu nọ ọ rọ ruẹ Isẹri na nọ e nya bru ei ze evaọ ẹdẹ ọyena keme na ọ be hae lẹ vẹre inọ a nyaze re a wuhrẹ Ebaibol na kugbe ei. A te muọ uwuhrẹ họ, aye na o te muọ iwuhrẹ ukoko họ ẹnya, je ru ẹnyaharo kpata kpata.

¹¹ Kẹle na oniọvo-ọmọtẹ jọ nọ ọ họ-ame kẹle ikpe 25 no, ọ rehọ obe ọ Eriariẹ na kẹ oni riẹ. Oni riẹ, nọ ọ rọ okpichọche, o te mu obe na họ ese. Nọ o se izoẹme ivẹ reno, o te se ọmọtẹ riẹ, avọ igbunu kẹ ọmọtẹ riẹ, ọ tẹ ta nọ: “Mẹ gwọlọ jọ omọvo ọ Isẹri Jihova!” Oni na o te mu obe uwuhrẹ họ yọ enẹna ọ họ-ame no.

¹² Dao Idhere Enana: Kọ whọ sae dao edhere ọ ovavo nọ a re ro mu iwuhrẹ họ na no? Whọ sae ta ọvo nọ: “Whọ tẹ gwọlọ obe uwuhrẹ Ebaibol ọvọvẹ, mẹ sai dhesẹ epanọ a re ru ei k’owhẹ evaọ umutho iminiti kakao. O tẹ were owhẹ, ma ve wuhrẹ haro.” Ahwo buobu a rẹ siọ okẹ utioye na ha, yọ a re muẹrohọ odhesẹvia ọ uwuhrẹ Ebaibol na n’evaze.

¹³ Evaọ emuhọ uwuhrẹ na, dhesẹ epanọ a rẹ ruẹrẹ oma kpahe kẹ uwuhrẹ na ẹkwoma ese ọ ikereakere nọ a fodẹ na gbe oka ukpehọ eme nọ i w’uzou nọ e kẹ uyo enọ nọ e rọ obe na. Tẹrovi ugogo eme na. Dede nọ o gwọlọ re ma lọhọ obọ evaọ emuhọ ewuhrẹ na, u w’uzou re a ru ewuhrẹ Ebaibol ẹsikpobi. Wo epanọ who ti ro fi olẹ họ ewuhrẹ na họ iroro wọhọ abọ jọ nọ o w’uzou evaọ ewuhrẹ na gbe epanọ whọ te rọ rehọ Ikereakere na ruẹrẹ ọmọ-uwuhrẹ na họ kẹ ọwọsuọ. Evaọ edhere kpobi, ru uwuhrẹ na jajaja!

¹⁴ Uzẹme, orọnikọ emọ-uwuhrẹ Ebaibol kpobi i re ru ẹnyaharo kpata kpata ha. Ejọ i wo isiuru abọ-ẹzi ga te amọfa ha yọ a re wo otoriẹ eware nọ a bi wuhrẹ ai oghẹrẹ ovona ha. Amọfa a be rria uzuazọ ababọ uvẹ fikiere a rẹ sae raha oke nọ o gwọlọ re a wuhrẹ uzoẹme ovo re evaọ oka kpobi hi. Fikiere, evaọ ẹsejọ o rẹ sai fo re a wuhrẹ izoẹme jọ vrẹ ẹkeriotọ ọvo jẹ rehọ emerae efa jọ re obe na u te ti re. Evaọ ẹsejọ ma rẹ sae kaki wuhrẹ ibroshọ Gwọlọ na tao kẹsena ma vẹ nyaharo kpohọ obe ọ Eriariẹ na. Onana, kugbe ekpohọ iwuhrẹ ukoko na, u ti fiobọhọ kẹ ọmọ-uwuhrẹ kpobi wo owọ gaga fihọ uzẹme na.

¹⁵ Maero, lẹ re who wo uwuhrẹ Ebaibol jọ! (1 Jọn 3:22) Oware jọ nọ o rẹ mae were Oleleikristi họ re Jihova ọ rehọ iẹ ruiruo ro fiobọhọ kẹ ohwo jọ zihe ruọ olele Jesu Kristi. (Iruẹru 20:35; 1 Kọr. 3:6-9; 1 Tẹs. 2:8) Enẹna họ oke nọ a re ro dhesẹ ọwhọ ologbo evaọ iruo uwuhrẹ Ebaibol na, avọ imuẹro ọ eghale ilogbo Jihova kẹ omodawọ mai re ma mu iwuhrẹ họ viere!

[Box on page 3]

Kọ whọ be lẹ re who mu uwuhrẹ Ebaibol ọkpokpọ họ?