Le Udhedhẹ Ọghẹnẹ Evaọ Uzuazọ Uviuwou
“[Wha] rehọ oruaro gbe ogaga kẹ ỌNOWO, whai uyẹ akpọ kpobi wha rehọ oruaro kẹ ỌNOWO.”—OLEZI 96:7.
1. Didi oghẹrẹ emuhọ Jihova ọ rọ kẹ uzuazọ uviuwou?
JIHOVA o mu uzuazọ uviuwou họ avọ udhedhẹ gbe evawere okenọ o ku ọzae gbe aye ọsosuọ na gbe evaọ orọo. Evaọ uzẹme, eva e were Adamu te epanọ o ro dhesẹ oghọghọ riẹ evaọ eme ọ urirẹ ọsosuọ nọ a kere: “Enẹna, ọnana họ onwa enwa mẹ, gbe uwo uwo-oma mẹ, a re ti se i aye, keme a si ie no oma ọzae na ze.”—Emuhọ 2:23.
2. Eme Ọghẹnẹ o wo họ iroro kẹ orọo u te no evawere nọ ọ rẹ wha te emọ otọakpọ riẹ no?
2 Okenọ Ọghẹnẹ ọ tuọ orọo jẹ ruẹrẹ uviuwou na họ, oware nọ o wo họ iroro o vrẹ evawere nọ o rẹ wha se emọ ahwo-akpọ riẹ ọvo. Ọ gwọlọ nọ a ru oreva riẹ. Ọghẹnẹ ọ ta kẹ imava ọsosuọ na nọ: “Wha yẹ, wha vi, re wha vọ evaọ akpọ na re wha wo i; re wha wuzou iyei obọ abade gbe evra obọ ehru gbe eware kpobi nọ i wo uzuazọ nọ e be nya evaọ akpọ na.” (Emuhọ 1:28) Ghinọ iruo erere. Ẹvẹ Adamu, Ivi, gbe emọ obaro rai a hae ghọghọ te otẹrọnọ imava-orọo ọsosuọ na a rehọ ẹmeoyo ru oreva Jihova!
3. Eme o gwọlọ re iviuwou a rria avọ omarọkẹ Ọghẹnẹ?
3 Makọ nẹnẹ dede, okenọ iviuwou a te bi ru oreva Ọghẹnẹ kugbe oye a jẹ mai wo evawere. Yọ ẹvẹ ẹruore iviuwou ẹmeoyo itieye na o woma te! Pọl ukọ na o kere nọ: “Oreva Ọghẹnẹ uruo u wo erere evaọ kabọ kabọ, keme epanọ, o yọrọ eya rọ kẹ uzuazọ onana jegbe rọ kẹ uzuazọ no tha.” (1 Timoti 4:8) Iviuwou nọ e be rehọ omarọkẹ Ọghẹnẹ rria a re lele izi Ẹme Jihova je ru oreva riẹ. A re le udhedhẹ Ọghẹnẹ jẹ ruẹ evawere evaọ ‘uzuazọ enẹna.’
A Raha Uzuazọ Uviuwou No
4, 5. Fikieme a jẹ sae ta nọ uzuazọ uviuwou o raha no evaọ akpọ soso?
4 Vevẹ, uviuwou kpobi ma be jọ ruẹ udhedhẹ gbe evawere he. Nọ o jẹ ta kpahe iyẹrẹ ọkiẹriwo nọ ukoko ọ Population Council a ru, The New York Times o tẹ ta nọ: “Evaọ erẹwho nọ i fe gbe enọ i yogbe, ọruẹrẹfihotọ uviuwou u bi nwene gaga.” A niyẹrẹ nọ ọnọ o w’uzou ọkiẹriwo nana ọ ta nọ: “Ẹjiroro nnọ uviuwou na yọ oria nọ o kpomamu jẹ rọwo nọ ọsẹ họ ọnọ ẹkuọ uwou na o rẹ j’obọ, oni ọ vẹ rẹro te eyero uwou na yọ iku-esia. Imuẹro na họ eware nọ e be via wọhọ ini nọ e rọo ho, orọo-ofa nọ i bi vihọ, [gbe] iviuwou esese . . . e be roma via evaọ akpọ-soso.” Fiki eware itieye na nọ e be via, ima iviuwou buobu e tẹ rọ deghedeghe, kare udhedhẹ, gbe evawere jẹ tahaku no. Evaọ Spain orọo-ofa u vihọ te 1 evaọ udevie erọo 8 evaọ emuhọ ikpe udhusoi avọ 20 na—ohẹriẹ ulogbo no 1 evaọ udevie 100 evaọ ikpe 25 nọ e vrẹ. Orọo-ofa England oye o mai bu evaọ Europe—4 evaọ udevie erọo 10 e be fa. Orẹwho yena o tẹ jẹ ruẹ eviharo unu iviuwou ọyewọ-ọvo no.
5 O wọhọ nọ ahwo jọ a rẹ raha oke re a tẹ fa-orọo ho. Whaọ, ahwo buobu a bi zurie kpohọ “Aruẹri nọ A rẹ jọ Bru-Ufi Ọgbakugbe” no nọ o kẹle Tokyo, Japan. Etẹmpol Shinto ọnana ọ rẹ jẹ obe orọo-ofa rehọ gbe ẹhẹriẹ usu ofa nọ a gwọlọ họ. Ohwo egagọ riẹ kpobi o re kere ayare riẹ fihọ ẹwẹ urre okpakpala, ọ vẹ rehiẹe hwa abọ aruẹri na, ọ vẹ lẹ kẹ uyo. Obe-usi Tokyo jọ o ta nọ okenọ a rehọ aruẹri na vi ole ikpe udhusoi nọ e vrẹ no, “eyae ihreki edafe a je he kere elẹ be yare inọ ezae rai a nyase ezọ rai ba re a zihe bru ai.” Rekọ, nẹnẹ, ayare buobu e rọ kẹ orọo-ofa, orọnikọ kẹ ẹruẹrẹhọ họ. Ababọ avro, uzuazọ uviuwou o rọ awa evaọ akpọ na soso. Kọ onana u re gbe Ileleikristi unu? Ijo, keme Ebaibol na ọ j’omai riẹ kpahe ozighi uviuwou inẹnẹ.
Fikieme Ozighi Ọ jẹ Rọ Uviuwou?
6. Didi obọ 1 Jọn 5:19 u wo kpahe ozighi uviuwou inẹnẹ?
6 Oware jọ nọ o be wha ozighi uviuwou inẹnẹ na ze ona: “Akpọ na ọsoso ọ rọ obọ ogaga oyoma na.” (1 Jọn 5:19) Kọ eme ma re rẹro riẹ n’obọ oyoma na ze, Setan Ẹdhọ na? Ọ rọ ọtọrue oyoma, ọrọ ogbekuo. (Jọn 8:44) Agbẹta nọ akpọ riẹ o je bi gbudie oma evaọ eviẹhọ gbe ọfariẹ-ogbe na, nọ e be raha uzuazọ uviuwou! Evaọ otafe ukoko Ọghẹnẹ, okpomahọ Setan o be gwọlọ raha ọruẹrẹfihotọ Jihova kpahe orọo no re ọ jẹ rehọ udhedhẹ uzuazọ uviuwou te oba.
7. Ẹvẹ iruemu ahwo buobu evaọ edẹ urere enana e sai ro kpomahọ iviuwou?
7 Oware ofa nọ o wha evihọ ebẹbẹ uviuwou nọ i bi kpokpo ohwo-akpọ ze a dhesẹ i rie evaọ 2 Timoti 3:1-5. Eme ọ eruaruẹ Pọl nọ a kere fihọ etẹe i dhesẹ nọ ma be rria “edẹ urere” na. Iviuwou e rẹ sai wo udhedhẹ gbe evawere he otẹrọnọ ahwo rai a ‘you oma-obọrai, je you igho, heri-oheri avọ oma-ovia gbe ekaela, bi yo ẹme enọ i yẹ rai hi, rọ ababọ uyere-ọghọ gbe ababọ ẹfuọ, wo eva egaga, koko eya ha, raha odẹ ahwo, wo oma-onyẹ hẹ, avọ ofu-ọkpoo, mukpahe ahwo ezi, otu ovivie, avọ uzou-uveghe, otu okpiro, yowọ enu-awere siọ Ọghẹnẹ ba, yọrọ oghẹrẹ egagọ a vẹ vro ogaga nọ o rọ eva riẹ.’ Uviuwou o sai wo evawere vọvọ họ o tẹ make rọnọ omọvo riẹ ọvo họ ọnọ o wo eva egaga hayo ababọ ẹfuọ. Kọ ẹvẹ udhedhẹ o sae rọ jọ uzuazọ uviuwou otẹrọnọ ohwo jọ evaọ uwou na o wo ofu-ọkpoo yọ o re koko eyaa ha? Mai yoma dede, ẹvẹ udhedhẹ avọ evawere e sae rọ jariẹ okenọ ahwo uviuwou na a te yowọ enu-awere siọ Ọghẹnẹ ba? Enana họ iruemu ahwo akpọ nana nọ Setan o bi su na. Agbẹta nọ evawere uviuwou o gbẹ riẹ hẹ na evaọ edẹ urere enana!
8, 9. Didi okpomahọ uruemu emọ o rẹ sai wo kpahe evawere uviuwou?
8 Oware ofa nọ iviuwou buobu e rọ kare udhedhẹ gbe evawere họ ekpehre uruemu emọ na. Okenọ Pọl ọ jẹ t’ẹme kpahe eyero edẹ urere na, ọ tẹ ruẹaro nọ emọ buobu a ti yo ẹme enọ i yẹ rai hi. Whọ tẹ rọ ọmoha, kọ uruemu ra u bi fiobọhọ kẹ uviuwou ra wo udhedhẹ gbe evawere?
9 Uruemu emọ jọ u fo onọ a rẹ raro kele he. Wọhọ oriruo, ọmoha jọ o kere ileta ọtọtọ ọnana se ọsẹ riẹ: “Whọ gbẹ rehọ omẹ kpohọ Alexandria ha me gbe ti kere ileta s’owhẹ hẹ, hayo t’ẹme kugbe owhẹ hẹ, hayo yere owhẹ hẹ, yọ who te kpohọ Alexandria se omẹ ba me gbe ti kru owhẹ obọ họ hayo me gbe ti yere owhẹ vievie he. Onana họ oware nọ o te via otẹrọnọ whọ gbẹ wha omẹ lele oma ha . . . Rekọ vi [akpata] s’omẹ, mẹ l’owhẹ. Who gbe ru ere he, mẹ te gbẹ re emu hu yọ mẹ te gbẹ da ame gbe he. Omẹ mẹ ta no na!” Oyena u gbe do wọhọ ekere oke mai nana? Whaọ, ileta yena nọ ọmọzae jọ o kere se ọsẹ riẹ na a kere i rie evaọ obọ Ijipti anwae bu viọ ikpe 2,000 nọ e vrẹ no.
10. Ẹvẹ emaha a sai ro fiobọhọ kẹ iviuwou rai le udhedhẹ Ọghẹnẹ?
10 Uruemu ọmoha Ijipti ọyena o wha udhedhẹ uviuwou ze he. Whaọ, eware nọ i yoma viere e be jọ iviuwou via evaọ edẹ urere enana. Ghele na, whai emoha na a rẹ sai fiobọhọ kẹ uviuwou le udhedhẹ Ọghẹnẹ. Eva edhere vẹ? Ẹkwoma ẹmeoyo kẹ ohrẹ Ebaibol ọnana: “Whai emọ, wha yo ẹme enọ iyẹ owhai eva eware kpobi, keme onana họ onọ o rẹ were Ọnowo na.”—Ahwo Kọlọsi 3:20.
11. Ẹvẹ esẹ gbe ini a sai ro fiobọhọ kẹ emọ rai jọ idibo ẹrọwọ Jihova?
11 Kọ ẹvẹ whai esẹ gbe ini? Wha rehọ uyoyou fiobọhọ kẹ emọ rai re a jọ idibo ẹrọwọ Jihova. Itẹ 22:6 o ta nọ: “Wuhrẹ ọmọ edhere nọ ọ rẹ nya nọ ọ jẹ kpako no ọ gbẹ thọriẹ ẹro ho.” Avọ emamọ ewuhrẹ Ikereakere na gbe emamọ oriruo esẹ gbe ini, emezae gbe emetẹ buobu a rẹ rẹriẹ no emamọ edhere na ha okenọ a tẹ kpako no. Rekọ onana o roma hwa epanọ ewuhrẹ Ebaibol na o woma te jẹ kẹre te gbe oghẹrẹ udu ọmaha na.
12. Fikieme uwou Oleleikristi u je wo udhedhẹ?
12 Otẹrọnọ ahwo uviuwou mai kpobi a be daoma ru oreva Jihova, ma rẹ reawere udhedhẹ Ọghẹnẹ. U fo re uwou Oleleikristi o vọ avọ ‘egbẹnyusu udhedhẹ.’ Luk 10:1-6 o dhesẹ nọ Jesu o wo ahwo itieye na họ iroro okenọ o ro vi ilele 70 riẹ vrẹ wọhọ egbodibo nọ ọ jẹ ta kẹ ai nọ: “Kuwou kuwou nọ wha ruọ eva, wha kake ta nọ, ‘Udhedhẹ u te uwou onana!’ Otẹrọnọ ogbẹnyusu udhedhẹ ọ rọ etẹe, udhedhẹ rai u ve te i.” Nọ idibo Jihova a be rọ udhedhẹ nya no uwou ruọ uwou avọ “usiuwoma udhedhẹ” na, a rẹ gwọlọ egbẹnyusu udhedhẹ. (Iruẹru 10:34-36; Ahwo Ẹfẹsọs 2:13-18) Evaọ imuẹro, uwou Oleleikristi nọ egbẹnyusu udhedhẹ e rọ o rẹ vọ avọ udhedhẹ.
13, 14. (a) Eme Naomi ọ lẹ kẹ Rut avọ Ọpa? (b) Didi oghẹrẹ oria eriosehọ uwou Oleleikristi o rẹ jọ?
13 U fo re uwou o jọ oria udhedhẹ gbe eriosehọ. Naomi ayeuku ọkpako na o rẹro nọ Ọghẹnẹ ọ te kẹ eyauku emetẹ eboba riẹ, Rut avọ Ọpa, eriosehọ gbe ọbọga nọ u re no ewo emamọ ọzae gbe uviuwou ze. Naomi ọ ta nọ: “[Jọ] ỌNOWO na o ru re wha wo iwou obọ rai, re wha [wo oria eriosehọ evaọ] ọvuọ uwou ọzae riẹ!” (Rut 1:9) Rọ kpahe ayare Naomi yena, ọmọ-uwuhrẹ jọ o kere nọ evaọ iwou itieye na Rut avọ Ọpa “a re duku ufuoma no ozighi gbe awaruọ. A rẹ ruẹ eriosehọ. O rẹ jọ oria nọ a rẹ sae rria, nọ iroro rai gbe emamọ isiuru rai e rẹ jọ ruẹ evevọwẹ je serihọ. Uzedhe ẹgba ẹme Hibru na . . . a dhesi rie ziezi evaọ oghẹrẹ eme nọ i tho rie evaọ [Aizaya 32:17, 18].”
14 Iviena muẹrohọ edhesẹ ọnana evaọ Aizaya 32:17, 18. Ma se evaọ etẹe nọ: “Ẹrẹreokie ọ vẹte rehọ udhedhẹ ze, erere ẹrẹreokie kọ omofọwẹ, gbe eva ifihọ bẹdẹ bẹdẹ. Ahwo mẹ a vẹte ria oria udhedhẹ, oria omofọwẹ gbe oria eriosehọ udhedhẹ.” U fo re uwou Oleleikristi o jọ oria eriosehọ ẹrẹreokie, edhedhẹ, omofọwẹ, gbe udhedhẹ Ọghẹnẹ. Kọ ẹvẹ otẹrọnọ edawọ, ẹwhọ, hayo ebẹbẹ efa jọ e roma via? Koyehọ u fo re ma riẹ edidi evawere uviuwou.
Ehri-Izi Ene nọ I Wuzou
15. Ẹvẹ whọ sai dhesẹ edidi evawere uviuwou?
15 Uviuwou kpobi evaọ otọakpọ o wo odẹ riẹ no obọ Jihova Ọghẹnẹ ze, Ọnọma iviuwou na. (Ahwo Ẹfẹsọs 3:14, 15) Fikiere ahwo nọ a gwọlọ evawere uviuwou a rẹ gwọlọ ọkpọvio riẹ je jiri iei, wọhọ epanọ ọnọ ọ so ilezi na o ru: “[Wha] rehọ oruaro gbe ogaga kẹ ỌNOWO, whai uyẹ akpọ kpobi wha rehọ oruaro kẹ ỌNOWO.” (Olezi 96:7) Edidi evawere uviuwou u dhere ẹwẹ-ebe Ẹme Ọghẹnẹ, Ebaibol na, gbe efihiruo izi riẹ. Uviuwou nọ o bi fi izi enana h’iruo ọ rẹ wereva jẹ reawere udhedhẹ Ọghẹnẹ. Fikiere joma jọ usu izi enana nọ i wuzou na kiẹ ene riwi.
16. Didi abọ oma-oyọrọ u re wo evaọ uzuazọ uviuwou?
16 Ọvo jọ evaọ izi enana o roma hwa onana: Oma-oyọrọ o r’oja kẹ udhedhẹ Ọghẹnẹ evaọ uzuazọ uviuwou. Solomọn Ovie na ọ ta nọ: “Ohwo nọ ọ sae yọrọ oma riẹ hẹ, ọ wọhọ okpẹwho nọ a kporo no, nọ a nya seba ababọ [ugbẹhẹ].” (Itẹ 25:28) Re ma kru oma mai—edhesẹ oma-oyọrọ—o r’oja otẹrọnọ ma gwọlọ wo uviuwou udhedhẹ gbe evawere. Dede nọ ma gba ha, u fo re ma dhesẹ oma-oyọrọ, onọ o rọ ubi ẹzi ọfuafo Ọghẹnẹ. (Ahwo Rom 7:21, 22; Ahwo Galesha 5:22, 23) Ẹzi na ọ rẹ kọ ubi oma-oyọrọ họ omai otẹrọnọ ma lẹ kẹ okwakwa onana, bi fi ohrẹ Ebaibol kpahiẹe họ iruo, jẹ nyusu kugbe amọfa nọ a bi dhesiẹe. Edhere ọnana o re fiobọhọ k’omai ‘dhẹ no ẹnwae-obro.’ (1 Ahwo Kọrint 6:18) Oma-oyọrọ u re je fiobọhọ k’omai siọ ozighi, whaha hayo siobọno idieda-thomawa, jẹ rehọ ẹwolẹ yeri kugbe eyero ọbẹbẹ.
17, 18. (a) Ẹvẹ 1 Ahwo Kọrint 11:3 o ro w’iruo kẹ uzuazọ uviuwou Oleleikristi? (b) Ẹvẹ evuhumuo uzou-uwo o rẹ rọ wha udhedhẹ Ọghẹnẹ ze evaọ uviuwou?
17 A rẹ sai dhesẹ uzi ofa nọ u w’uzou evaọ edhere ọnana: Evuhumu uzou-uwo u re fiobọhọ k’omai le udhedhẹ Ọghẹnẹ evaọ iviuwou mai. Pọl o kere nọ: “Mẹ guọlọ re wha riẹ nọ Kristi họ ọ nọ o wo uzou ohwo kpobi, ọzae ọye o wo uzou aye riẹ, Ọghẹnẹ kọ ọye o wo uzou Kristi.” (1 Ahwo Kọrint 11:3) Onana u dhesẹ nọ ọzae ọ rẹ k’obaro evaọ uviuwou na, aye riẹ ọ vẹ romakpotọ thae uke, emọ na a ve yoẹme kẹ esẹ gbe ini rai. (Ahwo Ẹfẹsọs 5:22-25, 28-33; 6:1-4) Uruemu utioye na o rẹ wha udhedhẹ Ọghẹnẹ haro evaọ uzuazọ uviuwou.
18 U fo re ọzae Oleleikristi ọ kareghẹhọ nọ uzou-uwo Ikereakere na orọnikọ esuo-evega ha. Ọ rẹ raro kele Jesu, ọnọ o wo Uzou riẹ. Dede nọ o “wo uzou eware kpobi,” Jesu ọ “ze re a gba odibo kẹ e he, rekọ ọ rẹ gba odibo.” (Ahwo Ẹfẹsọs 1:22; Matiu 20:28) Evaọ edhere ọvo yena, ọzae Oleleikristi o re dhesẹ uzou-uwo evaọ uruemu uyoyou nọ o rẹ lẹliẹe rẹro te isiuru iviuwou riẹ ziezi. U re woma otẹrọnọ aye Oleleikristi ọ rẹ tha ọzae riẹ uke. Wọhọ “ofiobọhọ” gbe ‘orugba’ riẹ, ọ rẹ kẹ ekwakwa nọ e kare ọzae riẹ ọ vẹ kẹe uke-otha nọ ọ gwọlọ. (Emuhọ 2:20; Itẹ 31:10-31) Emamọ edhesẹ uzou-uwo u re fiobọhọ kẹ ezae gbe eyae re a kẹ ohwohwo adhẹẹ jẹ wọ emọ re a yoẹme. Ẹhẹ, evuhumu uzou-uwo o rẹ wha udhedhẹ Ọghẹnẹ haro evaọ uzuazọ uviuwou.
19. Fikieme emamọ ẹmeọta-kugbe u je wuzou kẹ udhedhẹ gbe evawere uviuwou?
19 A rẹ sai dhesẹ uzi avesa nọ u w’uzou evaọ eme enana: Emamọ ẹmeọta-kugbe u w’uzou kẹ udhedhẹ gbe evawere uviuwou. Jemis 1:19 ọ vuẹ omai nọ: “Kohwo kohwo o he yo vẹrẹ, ọ vẹ rọ ẹrera ruọ ẹme-ota, je muofu ẹrera.” U fo re ahwo uviuwou a gaviezọ jẹ t’ẹme kugbe ohwohwo keme ẹmeọta-kugbe uviuwou o gwọlọ erovie-eva gbe ezọgaviẹ. O tẹ make rọnọ oware nọ ma be ta uzẹme, o rẹ sae wha eyoma ze viukpe ọ ewoma otẹrọnọ ma ta riẹ evaọ edhere evedha, omoya, hayo ababọ iroro. Ẹme-unu mai ọ rẹ jọ wowoma, “mere wọhọ uwhei.” (Ahwo Kọlọsi 4:6) Iviuwou nọ i bi lele izi Ikereakere na jẹ be t’ẹme kugbe ziezi a bi le udhedhẹ Ọghẹnẹ.
20. Fikieme whọ jẹ sae ta nọ uyoyou u wuzou kẹ udhedhẹ uviuwou?
20 Uzi avene ona: Uyoyou o r’oja kẹ uviuwou udhedhẹ gbe evawere. Uyoyou obẹlẹ u wo abọ logbo evaọ orọo, ọdawẹ odidi o rẹ sae rro haro evaọ udevie ahwo uviuwou na. Rekọ onọ o mai w’uzou họ uyoyou nọ a rehọ ẹme Grik a·gaʹpe dhesẹ na. Onana họ uyoyou nọ ma re wo kẹ Jihova, Jesu, gbe ọrivẹ mai. (Matiu 22:37-39) Ọghẹnẹ ọ kaki dhesẹ uyoyou onana kẹ ohwo-akpọ okenọ ọ rehọ “Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o [ve] wo uzuazọ ebẹdẹ bẹdẹ.” (Jọn 3:16) Ẹvẹ u gbunu te inọ ma rẹ sae dhesẹ oghẹrẹ uyoyou ovona kẹ ahwo uviuwou mai! Uyoyou ukpehru onana yọ “ọwhẹgbe eware kpobi.” (Ahwo Kọlọsi 3:14) O rẹ gba imava-orọo kugbe o vẹ jẹ wọ ae re a ru oware nọ o mai woma kẹ ohwohwo gbe emọ rai. Okenọ ebẹbẹ e tẹ roma via, uyoyou u re fiobọhọ kẹ ai ku eme họ evaọ edhere owowolẹ. Onana o rẹ sae mu omai ẹro keme “uyoyou . . . o rẹ guọlọ orọ obọ riẹ hẹ; . . . u re thiakọ eware kpobi, rọwo eware kpobi; u re rẹro eware kpobi, avọ odiri eva eware kpobi. Uyoyou u re re he.” (1 Ahwo Kọrint 13:4-8) Eva e rẹ ghinẹ were iviuwou nọ uyoyou rai kẹ Jihova o gba uyoyou rai kẹ ohwohwo kugbe!
Hai Gbe Le Udhedhẹ Ọghẹnẹ
21. Eme o rẹ sai fiba udhedhẹ gbe evawere uviuwou?
21 Izi enana kpobi gbe efa nọ i no Ebaibol na ze a fi rai họ ebe nọ Jihova ọ rehọ uyoyou kere no ẹkwoma ‘ọrigbo nọ o wo ẹrọwọ avọ areghẹ na.’ (Matiu 24:45) Wọhọ oriruo, a rẹ ruẹ evuẹ itieye na evaọ obe ewẹ-ebe 192 na, Edidi Evawere Uviuwou, onọ a siobọno eva Okokohọ Ubrotọ “Ewhovuẹ Udhedhẹ Ọghẹnẹ” ọrọ Isẹri Jihova nọ a jọ akpọ na soso ru evaọ 1996/97. Ewuhrẹ Ikereakere na kẹ omobọ ohwo gbe evaọ uviuwou avọ obufihọ obe utioye na o rẹ sae wha irere buobu ze. (Aizaya 48:17, 18) Ẹhẹ, efihiruo ohrẹ Ikereakere na u re fiba udhedhẹ gbe evawere uviuwou ra.
22. Eme ma rẹ bọ uzuazọ uviuwou mai wariẹ họ?
22 Jihova ọ ruẹrẹ eware ezi họ kẹ iviuwou nọ i bi ru oreva riẹ, yọ o fo kẹ ajiri gbe egagọ mai. (Eviavia 21:1-4) Fikiere jọ uviuwou ra o bọ uzuazọ riẹ wariẹ họ egagọ Ọghẹnẹ uzẹme na. Ajọ Ọsẹ oyoyou obọ odhiwu mai, Jihova, ọ rehọ evawere ghale owhẹ nọ who bi le udhedhẹ Ọghẹnẹ evaọ uzuazọ uviuwou ra na!
Ẹvẹ Whọ te k’Uyo?
◻ Eme o gwọlọ re iviuwou a rehọ omarọkẹ Ọghẹnẹ rria?
◻ Fikieme ozighi uviuwou o jẹ riẹ nẹnẹ?
◻ Eme họ edidi evawere uviuwou?
◻ Izi jọ vẹ i re fiobọhọ k’omai wha udhedhẹ gbe evawere uviuwou haro?
[Picture on page 18]
Emamọ ẹmeọta-kugbe o re fiobọhọ k’omai le udhedhẹ Ọghẹnẹ evaọ uzuazọ uviuwou