Wo Erere no Omaa Isukulu Odibọgba Ọghẹnẹ ọrọ 1999 na Ze
1 Jesu ọ jọ Olori Owuhrẹ. ‘Iwuhrẹ riẹ i gbe ahwo enu.’ (Mak 1:22) Dede nọ uvumọ ohwo mai ọ sae t’ẹme je wuhrẹ wọhọ Jesu hu, ma rẹ sae daoma raro kele ei. (Iruẹru 4:13) Re ma sai ru ere, abọ nọ ma re wo evaọ omaa ọ Isukulu Odibọgba Ọghẹnẹ na u ti fiobọhọ k’omai wo ẹnyaharo evaọ ona ọ ẹmeọta gbe ewuhrẹ mai.
2 Evaọ 1999, Ẹme 1 ọ te mai no emagazini ọ Uwou-Eroro Na gbe Awake! erọ 1997 ze. Otoriẹ eme abọ-ẹzi mai o te nyaharo gaga otẹrọnọ ma se evuẹ enana n’obọ uwou ze re ma tẹ te wariẹ yoi evaọ omaa ọ isukulu na. Ahwo nọ a rọ ẹme uthubro na kẹ a re dhesẹ efihiruo ẹme na, ru ei evaọ edhere nọ o re siuru jẹ jọ jajaja. Ẹme avọ 3 o ti no obe ọ Evawere Uviuwou na ze, yọ Ẹme avọ 4, o ti no ohwo Ebaibol jọ ze, dede oria nọ a ti ru eme enana no ze e sai nwene. Ọsẹro isukulu na o re rri eme na ziezi taure ọ tẹ te rehọ ae k’ahwo. Emọ-isukulu kpobi nọ a kẹ eme no obe ọ Evawere Uviuwou na ze a rẹ jọ ahwo oriruo evaọ uzuazọ uviuwou rai.
3 Fi Uthubro h’Iruo, jẹ Ruẹrẹ Oma Kpahe Ziezi: Ohwo kpobi ọ rẹ sai ru ẹnyaharo evaọ ona ẹmeọta gbe ewuhrẹ riẹ. (1 Tim. 4:13) Fikiere, ma rẹ gwọlọ uthubro yọ ma re rri rie wọhọ oware nọ ma rẹ se vievie he. (Itẹ 12:15; 19:20) Edhesẹvia uzẹme na ziezi evaọ iwuhrẹ gbe usiuwoma ota o gwọlọ vi eme-uzẹme nọ a rẹ ta ọvo hayo ikereakere nọ a re se ọvo. O gwọlọ re ma nyate idu jẹ kpare isiuru ahwo nọ a k’ezọ k’omai. Ma rẹ sae ru onana ẹkwoma uzẹme na nọ ma rẹ ta evaọ edhere imuẹro no udu ze. (Wawo Iruẹru 2:37.) Uthubro nọ a te k’omai evaọ isukulu na u ti fiobọhọ k’omai le onana t’obọ.
4 Nọ ẹme ọ tẹ nwani t’owhẹ obọ, roro kpahe okwakwa ẹmeọta nọ a te jọ rri owhẹ na wọhọ epanọ a dhesẹ fihọ School Guidebook na. Roro oware nọ u fo nọ who re ru re who fi uthubro nọ a k’owhẹ evaọ oke nọ o vrẹ na h’iruo. Roro kpahe uzoẹme ra, oghẹrẹ ẹkeria nọ who ti ro ru ei otẹrọnọ o gwọlọ utioye, gbe epanọ who ti fi ikereakere nọ e rọ ẹme ra na họ iruo riwi. Roro oghẹrẹ nọ omai woma nọ whọ rẹ rehọ evuẹ na ro wuhrẹ jẹ kpare isiuru ahwo.—1 Tim. 4:15, 16.
5 Otẹrọnọ whọ be dhozọ re who fi odẹ h’otọ evaọ isukulu na, lẹ kpahe iẹe jẹ ta epanọ o rrọ owhẹ oma kẹ ọsẹro isukulu na. Ohwo kpobi ọ rẹ sai wo erere ẹkwoma efihiruo ọrọ uvẹ ọ omaa nọ a te kẹ evaọ Isukulu Odibọgba Ọghẹnẹ na evaọ 1999.