‘Whọ Se Ae’ ba Ẹvuẹ Hẹ
1 Ma bi dhesẹ ẹdhoguo-okiẹrẹe Ọghẹnẹ evaọ okenọ ma tẹ be rehọ osegboja w’obọ evaọ iruo usiuwoma ota na. “Whọ se ewoma ba e ru kẹ enọ u te he, okenọ who wo ogaga nọ who re ro ru ei,” ere Jihova ọ hrẹ omai. (Itẹ 3:27) Ma re whowho eriariẹ ọ uzuazọ nọ Jihova ọ rọ k’omai na hrọ. Evaọ etoke emerae December gbe January, ma wariẹ wo uvẹ obufihọ kẹ amọfa re a wo eriariẹ ọ uzuazọ ẹkwoma efihọ ada ekru-ebe evaọ unuigho nọ a sikpotọ gaga.
2 Dhesẹ Ovuhumuo kẹ Ebe Na: Ovuẹ oghaghae nọ ahwo a gwọlọ kpata kpata o rọ evaọ ebe na. Ẹgwọlọ rai kẹ ovuẹ na u dhesẹ oma via vevẹ ẹkwoma owojẹ nọ o roma via evaọ okenọ ma fi ebe enana họ ada evaọ udevie ukpe onana. No June rite August ma fi ebe 169,925 họ ada evaọ Nigeria evaọ etoke obọdẹ usi ovravra onana! Ẹvi ọkpokpọ ọrọ ebe 73,375 evaọ August na họ ọnọ ọ mai kpehru kpaobọ n’anwọ 1982 ze. U fo re ovuhumuo ọ w’omai re ma wariẹ rehọ ọwhọ fi ebe enana họ ada.
3 Oriruo ọ Efihọ-Ada Jọ: “Kọ whọ rọwo nnọ emamọ uruemu nọ u bi kiekpo gaga nẹnẹ na gbe ababọ ẹruore nọ ọ rrọ kpahe obaro mai na, ma gwọlọ ọkpọvio nọ a re fievahọ evaọ uzuazọ? [Kuvẹ kẹ uyo.] Dede nọ oye họ obe nọ o mae kpako kpaobọ, Ebaibol na o kẹ obọdẹ ithubro kpahe ẹrria uzuazọ ọgbọna gbe uzuazọ uviuwou.” Who ve rovie kpohọ uzou nọ u fo evaọ obe nọ who bi fihọ ada na, je se edhe-ẹme ọvo hayo ivẹ. Se 2 Timoti 3:16, 17. Fi obe na họ ada kẹe, dhesẹ omaa ọ obe uwuhrẹ Ebaibol ọvọvẹ mai kẹe, je dhesẹ oriruo obe-uwuhrẹ otẹrọnọ uvẹ o riẹ. Who te roro nọ o te mai woma re who muọ uwuhrẹ na họ evaọ ibroshọ Gwọlọ na, whọ sai ru ere. Who ti duku eme emuhọ nọ i kiehọ evaọ ẹwẹ-obe avọ 8 ọrọ ukere ọ Odibọgba Uvie Mai erọ June gbe July na.
4 Umutho ahwo ọvo a bi se Ebaibol na, yọ enọ i wo otoriẹ ehri-izi riẹ kẹ uzuazọ ekẹdẹ kẹdẹ a tulo ho. O gwọlọ re a riẹ epanọ Ẹme Ọghẹnẹ ọ rẹ sai kpomahọ izuazọ rai gbe nnọ elele uthubro riẹ kpahe oruọzewọ, ẹfuọ-uruemu, gbe uzuazọ uviuwou o rẹ sai fiobọhọ kẹ ae thihakọ ebẹbẹ inẹnẹ. Ma gbe sioma kpemu no ewoma oruo kẹ enọ u te he, ma rẹ sai fiobọhọ k’amọfa wuhrẹ izẹme eghaghae enana. Joma dhesẹ ovuhumuo mai kẹ uvẹ ugbunu onana ẹkwoma ebe enana nọ ma rẹ rọ ọwhọ fihọ ada evaọ December.