Esẹro nọ E be k’Obaro—Owuhrẹ ọ Uwuhrẹ Uwou-Eroro Na
1 Uwou-Eroro Na Nọ U Bi Whowho Uvie Jihova họ oviede ọruẹrẹfihọ ọrọ ‘ọrigbo nọ o wo ẹrọwọ avọ areghẹ’ na nọ ọ be rọ rehọ emu abọ-ẹzi k’omai ‘eva ẹruoke.’ (Mat. 24:45) Ọkpako nọ o re wuhrẹ Uwuhrẹ ọ Uwou-Eroro Na o wo owha-iruo ulogbo wọhọ uvi owuhrẹ nọ ọ rẹ jọ uvi oriruo evaọ uzuazọ Oleleikristi.—Rom 12:7; Jem. 3:1.
2 Re o wuhrẹ ziezi, owuhrẹ ọ Uwuhrẹ Uwou-Eroro Na ọ rẹ daoma gaga fihọ oma-oruẹrẹhọ k’oka k’oka. O re ru ei avọ oma-olẹ gbe oma-oyọrọ. Isiuru egaga riẹ kẹ ukoko na u re dhesẹ oma via evaọ uvi omodawọ re ọ rehọ eme uwuhrẹ na nyate idu mai. Ọ rẹ t’ẹrovi ugogo eme ọ uwuhrẹ na je fiobọhọ k’omai re ma ruẹ epanọ e rọ rọwokugbe uzoẹme ọ ewuhrẹ na.
3 Emamọ oma-oruẹrẹhọ riẹ u kugbe ikereakere na nọ ọ rẹ kaki se re ọ riẹ epanọ i ro kiekpahe ẹme na. Ọ rẹ rehọ Ẹme Ọghẹnẹ k’obaro ẹkwoma ukoko na nọ ọ rẹ tuduhọ awọ re a hai rovie Ebaibol rai ziezi evaọ etoke ewuhrẹ na. Okenọ ahwo na a gbẹ ta te ẹme jọ nọ o w’uzou evaọ iyo nọ a kẹ hẹ hayo nọ a gbẹ t’ẹme fodẹ efihiruo ikereakere jọ nọ e r’oja ha, ọ rẹ sae nọ onọ ofiba jọ re a t’ẹme na lahwe. Evaọ edhere ọnana, o re fiobọhọ k’omai re ma kẹ uyo ogbagba jẹ riẹ epanọ ma re ro fi oware nọ ma wuhrẹ họ iruo evaọ izuazọ mai.
4 Owuhrẹ ọ Uwuhrẹ Uwou-Eroro Na ọ rẹ daoma ẹmẹrera re o ru ẹnyaharo evaọ ẹgba ewuhrẹ riẹ. Ọ rẹ kpahe eme buhrọ họ rekọ ọ rẹ tudu h’omai awọ re ma k’uyo—evaọ eme obọmai, kpẹkpẹ, je duobọ te uyo na. Evaọ ẹsejọ ọ sae kareghẹhọ omai inọ jọ ohwo ọsosuọ nọ ọ te kpahe fihọ edhe-ẹme na ọ k’uyo okpẹkpẹ, nọ u duobọte onọ nọ o rrọ obe na gẹi. Iyo ofiba enọ e rọ ogbotu na e sae t’ova vi efihiruo ikereakere, eme nọ e rẹ tha uyo na uke, hayo uzedhe efihiruo eme uwuhrẹ na. Owuhrẹ ọ Uwuhrẹ Uwou-Eroro Na ọ rẹ daoma re ọ kpare isiuru ahwo na re a w’obọ eva ewuhrẹ na ẹkwoma udu-otahawọ orọ oma-oruẹrẹhọ omobọ-ohwo gbe uviuwou.
5 Wọhọ ‘ahwo nọ ỌNOWO na o wuhrẹ no,’ ma wo ovuhumuo kẹ ‘ekẹ ahwo,’ wọhọ iwuhrẹ ọ Uwuhrẹ Uwou-Eroro Na, enọ “e be ruẹ uye . . . wuhrẹ ahwo” na.—Aiz. 54:13; Ẹf. 4:8, 11; 1 Tim. 5:17.