Isukulu Odibọgba Esuo-Ọghẹnẹ Na Rọkẹ 2004
1 Jihova o bi fi obọ họ kẹ ahwo gheghe thoma vẹre re a ru iruo nọ i wuzou evaọ akpọ-soso gba. Edhere jọ nọ o bi ro ru onana họ ẹkwoma ewuhrẹ nọ ọ be kẹ k’oka k’oka eva Isukulu Odibọgba Esuo-Ọghẹnẹ na. Kọ who bi w’obọ vọvọ wọhọ epanọ uyero ra o kuvẹ riẹ? Evaọ January a ti nwene umutho eware jọ avọ ẹjiroro obufihọ kẹ emọ-uwuhrẹ re a wo erere vọvọ no eruẹrẹfihotọ na ze.
2 Enwenwene Ọkohrẹ Obufihọ: Inievo-emezae nọ i bi ru eme uthubro gbe oruvẹ Ebaibol a wo ovuhumuo kẹ ithubro nọ ọkohrẹ obufihọ ọ be hae kẹ kpahe eware nọ o muẹrohọ. Oria nọ ekpako nọ i te ziezi i je re buobu, a rẹ sai nwene ọkohrẹ obufihọ na k’ukpe k’ukpe. Evaọ edhere nana a sae rọ ghale owha-iruo na; rekọ mai wuzou, ekpako gbe idibo iruiruo nọ i te ziezi a ti wo erere no eriariẹ ekpako sa-sa nọ i wo ona-ẹmeọta gbe ona-ewuhrẹ ze.
3 Omaa Ọkiẹkpemu Ọkpahefihọ Unu: Otẹrọnọ ukoko rai u wo okokohọ okogho eva oka ọkiẹkpemu ọkpahefihọ unu, a rẹ kpare ọkiẹkpemu na (gbe omaa oka yena kpobi) kpohọ oka nọ u lele i rie, a vẹ te jọ obọ okokohọ na ru omaa oka obaro na. Dede na, otẹrọnọ iweze ọsẹro okogho i kie fihọ oka ọkiẹkpemu ọkpahefihọ unu na, u du fo re a rehọ omaa oka yena kpobi kpohọ oka obaro re a rehọ omaa obaro ziọ oka oyena ha. Ukpoye, a rẹ so ole, ru ẹme okwakwa ẹmeọta, gbe oruvẹ Ebaibol nọ a maa fihọ oka na. Ẹme uthubro (nọ a re ru lele ẹme okwakwa ẹmeọta na) a rẹ rehọ iẹe no omaa oka obaro na ze. A te ru oruvẹ Ebaibol na no, a ve ru Ewuhrẹ Odibọgba ọrọ iminiti 30, onọ a rẹ sae ghale fihọ eme esa nọ ọvuọvo o re wo iminiti 10 hayo eme ivẹ nọ ọvuọvo ọ rẹ jọ iminiti 15. (A rẹ se ẹme owhowhovia na ba.) Nọ a te ru Ewuhrẹ Odibọgba na no, a vẹ so ole je ru ẹme iminiti 30 nọ ọsẹro okogho na o re ru. Eva Isukulu Odibọgba Esuo-Ọghẹnẹ nọ u lele oka iweze ọsẹro okogho na, a re ru ẹme okwakwa ẹmeọta gbe oruvẹ Ebaibol wọhọ epanọ a ma omaa rai vẹre, a ve ru ọkiẹkpemu ọkpahefihọ unu na lele iei.
4 Rehọ uvẹ kpobi ro ru iruo kẹ ẹnyaharo abọ-ẹzi. Nọ who bi wo erere no ewuhrẹ Isukulu Odibọgba Esuo-Ọghẹnẹ ze na, yọ whọ be ta udu họ ukoko ra awọ, bi w’obọ evaọ erugba eruẹaruẹ Ebaibol, jẹ wha ujiro se Ọnọ o wo ovuẹ igbunu nọ o gb’omai họ nọ ma re whowho na.—Aiz. 32:3, 4; Evia. 9:19.