Rehọ Ebe Mai Ruiruo avọ Areghẹ
1 Edhere ọkpakpatiẹ nọ ma rẹ rọ rehọ ebe ruiruo o muhọ ẹkwoma ẹghale ebe 6,000 ọ emagazini Uwou-Eroro Na orọ ukere ọ July 1, 1879 (ọrọ Oyibo). Anwọ okioye na ze, a kporo jẹ vaha ebe sa-sa gbidigbidi no.
2 Ọruẹrẹfihotọ Azọhọ nọ O Ghine n’Evaze Na: Evaọ December 1999, a ru rie vevẹ inọ emagazini gbe ebe i ti te iwhowho-uvie gbe ahwo ẹgbede na nọ i wo isiuru obọ evaọ edhere ọ azọhọ unevaze, koyehọ, ababọ ayare hayo ẹfodẹ nnọ a hwa ugogo unuigho azọhọ jọ wọhọ osa nọ a re ro wo obe jọ. Nọ a te fi obe họ ada, ma rẹ jẹ azọhọ unevaze rehọ rọ tha iruo akpọ-soso ọrọ ewhowho emamọ usi na uke. Ma wo ẹrọwọ inọ Jihova ọ te ghale ọruẹrẹfihotọ ọnana.—Wawo Matiu 6:33.
3 Ẹkpahefihọ Iyero Evaọ Usiuwoma Ota: Ma te gbẹ rehọ eme emuhọ nọ ma ruẹrẹ kpahe ziezi rọ kpare isiuru. Ohwo o gbe dhesẹ isiuru hu, ma re du fiọ obe họ ada kẹe he. Ma gwọlọ gbolo ebe mai kufiẹ hẹ ẹkwoma ẹrọkẹ ahwo nọ a wo isiuru hu. Evaọ abọdekọ riẹ, oria nọ a jo dhesẹ isiuru yọ ọnọ o wo uwou na ọ tẹ ta nọ o ti se obe na, a rẹ sai fi ei họ ada. Ma gwọlọ rọ ebe mai ruiruo avọ areghẹ.
4 Who te dhesẹ obe na kẹ ohwo na no, whọ rẹ sae ta eme nana: “Otẹrọnọ o were owhẹ re who se obe onana, o te were omẹ eva re mẹ nya siẹe ba k’owhẹ.” Ẹsejọhọ ọnọ o wo uwou na ọ te nọ inọ: “Brigho?” Whọ rẹ sae kuyo nọ: “Orọnikọ eki ma be tho ho. Ma be zẹ obe nana ha. Iruo nọ ma be jọ obonẹ ru nẹnẹ na a bi ru ei avọ unevaze evaọ ekwotọ 234 wariẹ akpọ na họ re u fiobọhọ kẹ ahwo wuhrẹ edhere uzuazọ ebẹdẹ bẹdẹ na. Whọ tẹ gwọlọ ru azọhọ kẹ iruo nana, me ti mi owhẹ avọ evawere.”
5 Who te bi fi emagazini na họ ada, whọ rẹ sae n’enọ kpahe uzoẹme jọ whọ vẹ ta nọ: “Mẹ gwọlọ re who muẹrohọ igogo eme nọ e rọ uzoẹme nana. Whọ tẹ gwọlọ se emagazini ivẹ nana, o te were omẹ re mẹ nya se ae ba kẹ owhẹ.” Ọ tẹ rehọ ae, whọ sai fibae nọ: “O were omẹ eva nọ mẹ be rọ rehọ ovuẹ nana te owhẹ obọ. Me roro nọ uzoẹme na o te were owhẹ. Evaọ uzẹme, mẹ te nyaze oka n’otha re mẹ riẹ iroro ra kpahe iẹe. Who ti muẹrohọ nnọ a bi kporo Uwou-Eroro Na evaọ evẹrẹ 132 yọ a be ghale unu nọ u te 22,000,000 evaọ akpọ na soso. Azọhọ unevaze a be rọ tha iruo nana uke. Whọ tẹ gwọlọ ru unevaze jọ kẹ iruo ewuhrẹ nana, me ti mi owhẹ avọ evawere.”
6 Evaọ eria jọ, ẹta kpahe azọhọ rọkẹ iruo akpọ-soso mai na o rẹ sae jọ kpakre kpakre. Wọhọ oriruo, ọnọ o wo uwou na ọ rẹ sae nọ inọ: “Whọ be rehọ iẹe kẹ omẹ ọvọvẹ?” Ma rẹ sae kuyo nọ: “Whọ tẹ gwọlọ se obe na yọ whọ gwọlọ woi, whọ sae rehọ iẹe. Me ti zihe ze oka n’otha re ma jiroro kpahe ẹme nọ ma ta na jẹ ta kẹ owhẹ viere kpahe iruo akpọ-soso mai.” Evaọ iweze efa, whọ rẹ sae vuẹ ọnọ o wo uwou na kpahe oghẹrẹ nọ ma be rọ ruẹ ugho ro ru iruo mai.
7 Hayo ọnọ o wo uwou na ọ rẹ sai mi owhẹ obe na ọ vẹ ta nọ, “Me yere owhẹ.” Whọ rẹ sae kuyo nọ: “Me yere owhẹ re. Mẹ riẹ nọ obe na o te were owhẹ. U bi gbe ahwo buobu unu epanọ ma be rọ ruẹ ugho ro ru iruo nana, keme akpọ na soso ma bi jo ru ei. Ahwo buobu nọ e rehọ ebe mai no a dhesẹ ovuhumuo kẹ eware nọ a ti wuhrẹ na a te je ru azọhọ ọsese jọ re ma ruẹ ugho ro kporo efa. Ohwo nọ o ru ere kpobi, ma re mi ei ugho na avọ evawere.”
8 Kọ Emamọ Isiuru E Riẹ? O rọ isiuru mai hi re ma hae vaha ebe na vrẹ ọvo. Ma gwọlọ nọ ebe na i ru ẹjiroro rai gba, koyehọ, re i fiobọhọ kẹ ahwo eva efuafo wuhrẹ viere kpahe ẹjiroro igbunu Jihova. O rẹ jọ oware uvrẹvru re ma nyasiọ ebe na ba kẹ ahwo nọ a wo uvumọ ovuhumuo kẹ eware abọ-ẹzi hi. (Hib. 12:16) Emamọ efihọ ada ebe o roma hwa ẹgba ra nọ who re ro vuhu uvi isiuru. Ẹvẹ a sai ro dhesẹ isiuru itieye? Emamọ oka jọ họ uvẹ nọ ọ kẹ owhẹ re wha t’ẹme. Hayo ọ tẹ be kezọ evaọ okenọ whọ be t’ẹme na, be kuyo enọ ra, jẹ be ta ẹkẹ eva riẹ evaọ ẹme na. Ọ tẹ be rehọ unu kpotọ t’ẹme kẹ owhẹ ziezi avọ adhẹẹ u re dhesẹ emamọ uruemu. O te bi rovie Ebaibol riẹ lele owhẹ nọ who bi se na o sai dhesẹ nọ o wo adhẹẹ kẹ Ẹme Ọghẹnẹ. Ẹsibuobu, u re fiobọhọ re a nọ sọ a ti se obe nọ whọ be rọ kẹ ae na. Ofariẹ, whọ rẹ sae ta nọ who ti zihe ze re wha t’ẹme na haro. Emamọ uyo nọ ọ kẹ yọ imuẹro efa kẹ isiuru rai. Who te muẹrohọ isiuru itieye na, o wọhọ nọ ohwo na ọ te rehọ obe nọ o mi na ro ru emamọ iruo.
9 Enwene ọnana evaọ iruo mai na o kẹ imuẹro efa inọ ‘ma be rọ ẹme Ọghẹnẹ thueki hi.’ (2 Kọr. 2:17) U te je dhesẹ nọ ma hẹrioma no akpọ na.—Jọn 17:14.
10 Nọ ọraha Babilọn Ologbo na o bi si kẹle na, otunyẹ ọ rẹriẹ aro dhe egagọ kpobi. Isiuru mai họ re obọdẹ iruo ẹta usiuwoma Uvie na evaọ akpọ-soso o gbẹ nyaharo ababọ ẹwhaha, re o rehọ ahwo buobu ziọ esiwo.—Mat. 24:14; Rom 10:13, 14.