Ọruẹrẹfihotọ Ẹghale Ebe Mai nọ A Ru Lọhọ Na
1 Ọruẹrẹfihotọ nọ a ru lọhọ na ọrọ ẹghale ebe mai ababọ unuigho jọ na o r’otọ bu vi ukpe ovo no. Kọ ọruẹrẹfihotọ ọnana o wo obokparọ no? Iyẹrẹ usiuwoma ota i dhesẹ ẹvi evaọ efihọ ada ebe sa-sa. Evaọ uzẹme a be kẹ ima ahwo buobu uvẹ re a “nyaze . . . mi ame uzuazọ na, ọvọvẹ.”—Evia. 22:17.
2 Ghele na, o rọ ọgbahọ k’omai hi, yọ o rọ isiuru mai hi, re ma rehọ ebe na kẹ ohwo kpobi nọ ọ rẹ rehọ iẹe odode. Nwane wọhọ epanọ ma rẹ rehọ eware ekwakwa iwo mai ro ruiruo avọ areghẹ na, owhowho-uvie ọvuọvo o wo owha-iruo nọ ọ rẹ rọ rehọ ebe nọ ọ rehọ ababọ unuigho jọ mi Society ẹkwoma ukoko riẹ na ro ruiruo avọ areghẹ. Fikinọ Society ọ be rehọ ebe kẹ iwhowho-uvie ababọ unuigho jọ orọnikọ u dhesẹ nọ a be raha igho fihọ ekporo gbe ẹghale rai hi hi. Ohwo kpobi o re dhesẹ ovuhumuo ziezi kẹ aghare ebe mai na evaọ obufihọ kẹ ahwo udu oruọzewọ evaọ ẹgwọlọ rai re a wo eriariẹ egbagba kpahe Jihova Ọghẹnẹ gbe Ọmọ riẹ Jesu Kristi.—Jọn 17:3.
3 Ẹvẹ Society ọ be sae rọ rehọ ebe riẹ kẹ ahwo kpobi ababọ unuigho jọ? Azọhọ unevaze a be hae rọ hwaosa igho nọ a be raha kẹ ekporo gbe ẹghale rai. Idibo Jihova nọ e rehọ oma mudhe no họ ugogo ehri ọ obufihọ onana. Isẹri Jihova a re te yare ahwo otafe na re a fiobọhọ evaọ iruo ewhowho Uvie okpakpata nana ha. Ma ri ti ru ei okeovo ho yọ makọ enẹna ma bi ru iruẹru igho ẹyare mi ahwo otafe na ha. Dede na, ma wo ovuhumuo kẹ azọhọ unevaze ọkakao nọ o re n’obọ ahwo oruọzewọ nọ i wo isiuru gbe ovuhumuo nọ ma nyaku evaọ usiuwoma ota na ze.
4 Oware nọ Azọhọ Unevaze Mai U re Rugba: Fikiere, u fo re ma ruẹrẹ oma kpahe re ma dhesẹ kpẹkpẹe, vevẹ epanọ a be rọ rehọ azọhọ unevaze rọ tha iruo ewuhrẹ Ebaibol akpọ-soso mai uke. A be rehọ azọhọ kpobi nọ o t’omai obọ rọ hwaosa araha-igho ologbo nọ o bi no erugba iruo usiuwoma ota Uvie na ze evaọ ọgbọna. U te no ekporo ebe rọkẹ ẹghale akpọ-soso no, Society ọ be rẹrote iwou ogha, iwou Ebẹtẹle, isukulu ewuhrẹ odibọgba gbe isukulu imishọnare, imishọnare na, esẹro ọnyawariẹ, iwou nọ a rẹ kwa ebe fihọ, gbe iruẹru obufihọ efa buobu nọ erugba iruo kpobi nọ Jesu ọ kẹ ilele riẹ na o gwọlọ.—Mat. 24:14; 28:19, 20.
5 Orro ulogbo nọ o be romavia evaọ udevie ahwo Jihova na o wọ ahwo buobu nọ kpahe oware nọ a rẹ sai ru ro fiobọhọ no. Ibuobu e rẹ sae rehọ ugboma rai dẹẹ fiobọhọ họ evaọ ebabọ iwou ogha ekpokpọ gbe Egwa Uvie hayo kpohọ erẹwho ithabọ re a fiobọhọ evaọ iruo usiuwoma ota na evaọ etẹe. Rekọ re a sai w’amabọ jọ evaọ orro omawere onana te epanọ ẹgba rai o te, iwhowho-uvie buobu gbe iviuwou rai a ru rie fihọ uruemu rai no re a hai fi azọhọ jọ h’otọ ẹsikpobi rọkẹ iruo akpọ-soso na. (Wawọ 1 Ahwo Kọrint 16:1, 2.) Evaọ edhere ọnana, a be tha iruo Society na kpobi uke, kugbe ẹghale ebe na. Uvumọ ohwo o re rri azọhọ unevaze kẹ iruo akpọ-soso na wọhọ ẹsenọ ọ be hwaosa fihọ ebe nọ ọ rehọ gheghe he.
6 Okenọ ma tẹ nyabru ohwo nọ o wo uwou hayo amọfa re ma se isẹri, ma rẹ ruẹrẹ oma kpahe re ma lele ae t’ẹme kpahe uzoẹme Ebaibol jọ. Eme-emuhọ isiuru sa-sa buobu, gbe izoẹme Ebaibol buobu nọ i fo, e rọ evaọ obe ọ Reasoning From the Scriptures na. Hayo ma sae rehọ idhesẹvia nọ a jiroro rai evaọ Odibọgba Uvie Mai na ro ruiruo. Wọhọ epanọ owojẹ ohwo na o rọ kpahe ovuẹ Uvie na, owhowho-uvie na ọ rẹ jiroro sọ ọ rẹ kẹ ohwo na obe. Otẹrọnọ o rọ vevẹ inọ ohwo na o dhesẹ isiuru te epanọ who re ro fi obe họ ada kẹe he, whọ sae jiroro re who ku ẹmeọta na họ avọ areghẹ jẹ nya kpohọ oria ofa. Hayo whọ sae nyasiọ obe-uzizie hayo omobe-ovẹvẹ ba otẹrọnọ ohwo na ọ yeyaa nọ o ti se ovuẹ riẹ. Jọ u mu owhẹ ẹro inọ who muẹrohọ isiuru na re whọ sai ru ozihebro. A rẹ sai ru epọvo na re evaọ etoke nọ oke o gbẹ riẹ tere he nọ who re ro ru uzoẹme jọ vẹ ziezi k’ohwo jọ fikinọ o wo uvẹ hẹ hayo fikinọ whọ nyaze kiehọ ẹruoke uvẹ hẹ.
7 Ọruẹrẹfihotọ ẹghale ebe nọ a ru lọhọ na u fiobọhọ kẹ ahwo kpobi ruẹ no inọ iruo ewuhrẹ Ebaibol mai e rọ ekiọthuọ họ. U re je fiobọhọ k’omai fi ute mai orọ ewhowho emamọ usi Uvie na gbe eruo ilele Jesu Kristi na haro. Wo ohẹriẹ no ikoko nọ i re ru “ayare obufihọ ugho,” eva e be were Isẹri Jihova re a ruẹ nọ ebe i te ahwo kpobi obọ ababọ unuigho jọ. Ma rẹ yare azọhọ mi ahwo nọ a wo uvi isiuru kpahe ovuẹ mai hi kẹ iruo akpọ-soso na. (Rri Uwou-Eroro Na, ọrọ December 1, 1990 [ọrọ Oyibo], ẹwẹ-obe avọ 22 gbe ọrọ avọ 23.) A rẹ rehọ azọhọ unevaze na kpobi rọ tha iruo ewuhrẹ Ebaibol akpọ-soso nana uke, yọ nọ orọnọ iruiruo na kpobi yọ ahwo unevaze na a rẹ hwaosa kẹ ohwo ọvuọvo evaọ ukoko na ha. Ahwo nọ e nọ kpahe iẹe hayo enọ i dhesẹ isiuru kpahe iruo mai ọvo ma re lele t’ẹme azọhọ unevaze kẹ obufihọ iruo akpọ-soso na.
8 Nọ ma be rehọ ọwhọ ru odibọgba mai kẹre na, be rehọ ebe eghaghae Society ro ruiruo avọ areghẹ na, Jihova ọ te gbẹ kẹ ẹvi na. Ahwo emamọ udu evaọ oria kpobi a re dhesẹ ovuhumuo kẹ oruvẹ iroro mai kpahe oghẹrẹ nọ ma bi ro ru odibọgba mai na yọ eva e rẹ were ae re a dhesẹ obufihọ rai ẹkwoma azọhọ unevaze.