Kọ Buobu Rekọ avọ Orimuo
1 Ọwhẹrẹ kpobi ọ riẹ nọ ọ tẹ kọ ibi riẹ buobu, ọ rẹ kọrọ buobu, rekọ ọ tẹ kọ kakao, ọ rẹ te kọrọ kakao. (2 Kọr. 9:6) Ewhẹrẹ e rẹ yọrọ oma re a se ibi ba ẹraha kufiẹ ẹkwoma ẹkọ fihọ otọ nọ ekakọ e rẹ jọ dhẹ hẹ. O gwọlọ orimuo otiọye na re evaọ okenọ ma te bi fi ebe mai họ ada evaọ usiuwoma ota. Isiuru mai họ re ma nyasiọ ebe ba kẹ enọ i wo isiuru kpahe ese rai. Ma gwọlọ kẹ ahwo nọ i te uvẹ na re a wuhrẹ kpahe aruoriwo Jihova gbe ẹruore Uvie na.
2 Kọ who rri mu no nọ emagazini, ibroshọ, gbe ebe efa i bi kokohọ ekọbọdo evaọ obọ uwou viukpenọ a rẹ rehọ ae si enọ i te evaọ ẹkwotọ ra ziọ eriariẹ uzẹme na? (Wawọ Matiu 25:25.) Kọ whọ rẹ d’obọ efihada emagazini hayo ebe efa ji ẹsejọ eva iweze ọsosuọ na fikinọ o rrọ kpakre-kpakre k’owhẹ re whọ fodẹ oghẹrẹ nọ a be rọ tha iruo usiuwoma ota Uvie na uke? Iwhowho-uvie nọ i wo ona a ruẹ no inọ ahwo ovuhumuo nọ i wo uwou na a rẹ j’owọ kpahe ẹme ovevẹ, nọ ọ rrọ liọliọ evaọ okenọ a tẹ ta kẹ ae kpahe oghẹrẹ nọ a be rehọ azọhọ unevaze kẹ iruo Uvie na ro ruiruo.
3 Whọ sae ta nọ:
◼ “Ẹsejọhọ o be hai gb’owhẹ unu kpahe oghẹrẹ nọ ma be sae rọ kẹ ahwo ebe ababọ unuigho jọ. O rrọ abọjọ iruo ewuhrẹ akpọ soso nọ a be tha-uke ẹkwoma azọhọ unevaze. Otẹrọnọ whọ gwọlọ ru azọhọ ọkakao jọ kẹ iruo na, eva e te were omẹ re mẹ rehọ iẹe.”
4 Ibuobu nọ i wo uwou na a te nọ kpahe unuigho ebe na.
Whọ sae kuyo nọ:
◼ “A fi uvumọ unuigho jọ họ kẹ ebe na ha keme azọhọ unevaze a be rọ tha iruo mai uke. Otẹrọnọ whọ gwọlọ ru azọhọ unevaze ọkakao jọ nẹnẹ, o te were omai eva re ma ruẹ nọ a rehọ e riẹ ru iruo usiuwoma ota akpọ soso na.”
Hayo whọ sae ta nọ:
◼ “Ma rẹ rehọ ebe mai kẹ ahwo kpobi nọ a wo isiuru re a riẹ kpahe Ebaibol na viere. Otẹrọnọ whọ gwọlọ ru azọhọ unevaze ọkakao jọ kẹ iruo akpọ soso ọnana, eva e te were omẹ re me vi ugho na k’owhẹ.”
5 Evaọ iruo emagazini, iwhowho uvie jọ a re dhesẹ ẹwẹ-obe obeva ọ emagazini jọ a vẹ jẹ ta nọ:
◼ “Wọhọ epanọ whọ ruẹ eva etenẹ na, azọhọ unevaze a be rọ tha iruo mai na uke. Otẹrọnọ whọ gwọlọ ru azọhọ ọkakao jọ ro fiobọhọ kẹ iruo nana, me re ru ei lọhọ k’owhẹ.”
Edhere ọlọlọhọ ọfa jọ ọna:
◼ “Dede nọ ma rẹ rọ ebe mai kẹ ahwo ababọ unuigho jọ, ma rẹ rehọ umutho azọhọ unevaze kẹ iruo akpọ soso mai na.”
6 Joma d’obọji vievie he evaọ ẹkọ ibi Uvie na fiki ehoo nọ ma rẹ rọ fodẹ epanọ a be rọ ruẹ ugho nọ a be rọ tha iruo na uke. Eva oke ovona, o gwọlọ ovuhumuo re ebe mai e seba ẹraha fihọ ‘otọ itho.’ (Mak 4:5, 6, 16, 17) Enọ i wo ovuhumuo kẹ emamọ usi nọ ma be wha se ai na a rẹ wereva nọ a ro wo uvẹ nọ a rẹ rọ zọhọ fihọ ukeotha abọ-iwo riẹ.—Wawọ Matiu 10:42.