Ẹkpẹti Onọ

◼ Ẹvẹ ma rẹ rọ riẹ sọ u fo re ma fi obe họ ada kẹ ohwo nọ ma nyaku?

Ugogo oware nọ ma re rri họ isiuru ohwo na. Nọ o te dhesẹ uvi isiuru, ma sae rọ emagazini ivẹ, ibroshọ, hayo obe ofa kpobi nọ ma bi fihọ ada kẹe. Nọ ọ gbẹ maki wo ugho nọ o re ro ru unevaze he, ma rẹ kẹe obe na ghele. (Job 34:19; Evia. 22:17) Rekọ ma rẹ rehọ ebe mai kẹ ahwo nọ a wo isiuru kpahe ebe na ha ha.—Mat. 7:6.

Ẹvẹ ma rẹ rọ riẹ sọ ohwo o wo isiuru? Nọ ohwo na ọ tẹ gaviezọ je lele omai t’ẹme ziezi. Otẹrọnọ ọ be kpahe fihọ onọ nọ ma nọ riẹ, jẹ ta oware nọ o riẹe iroro via u re dhesẹ nọ o wo isiuru. Nọ ọ tẹ be gaviezọ kẹ ẹme nọ who bi se no Ebaibol ze u re dhesẹ nọ o wo adhẹẹ kẹ Ẹme Ọghẹnẹ. O rẹ mai woma re whọ nọe sọ o ti se obe nọ whọ be kẹe na. O gwọlọ nọ owhowho-uvie kpobi o re mu ẹro h’otọ re ọ riẹ sọ ohwo na o wo isiuru. Wọhọ oriruo, nọ ma tẹ be ta usiuwoma evaọ iyẹrẹ, u fo ho re ma mu ghale emagazini, ibroshọ, hayo ebe mai kẹ ahwo nọ ma nyaku. Nọ ma gbẹ riẹ sọ ohwo o wo isiuru hu, o rẹ mai woma re ma kẹe omobe-ovẹvẹ.

Fikiere, unu ebe nọ owhowho-uvie ọ rẹ sai fihọ ada ọ rẹ rehọ, orọnikọ epanọ ọ sai ru unevaze te he. Unevaze nọ ma bi ru orọnikọ ebe ọvo a be rehọ iẹe ru hu rekọ yọ onọ ma be rọ tha abọ kpobi orọ iruo usiuwoma ota akpọ-soso mai uke. Ghelọ oghẹrẹ uyero nọ ma rrọ kẹhẹ, ovuhumuo kẹ iruo Uvie na o rẹ wọ omai rọ utho nọ ma wo kpobi rọ tha iruo Uvie na uke. (Mak 12:41-44; 2 Kọr. 9:7) U re je fi obọ họ kẹ omai rehọ umutho ebe nọ ma rẹ sai se kẹ oma mai je fihọ ada, rọ ere whaha igho nọ a ro ru unevaze nọ ma rẹ raha kufiẹ.

[Ẹme nọ a fi ẹgba họ nọ ọ rrọ ẹwẹ-obe avọ 2]

O gwọlọ nọ owhowho-uvie kpobi o re mu ẹro h’otọ re ọ riẹ sọ ohwo na o wo isiuru