Ebabọ Egwa Uvie Akpọ-Soso Evaọ Ekwotọ Europe Jọ
1 Evaọ ikpe buobu jọ nọ e vrẹ, a fi awhaha họ iruo Isẹri Jihova evaọ ekwotọ Europe jọ, te ofẹ Ovatha-Ọre Europe. Evaọ ejọ buobu, awhaha na ọ jọ gaga. Re a ru iwuhrẹ evaọ ẹgbede o lọhọ họ, yọ re a wo Ọgwa Uvie nọ a rẹ jọ ru iwuhrẹ o jọ bẹbẹ gaga. Dede na, evaọ ikpe nọ e vrẹ kẹle na, “[ Jihova] o ru eware ilogbo kẹ omai no; ma tẹ rẹ ghọghọ.”—Ol. 126:3.
2 Muhọ evaọ 1983, obọ okienyẹ nọ a ro kru Isẹri Jihova na u te muhọ eroho. Evaọ 1989 yọ Poland gbe Hungary a kẹ Isẹri Jihova uvẹ no evaọ abọ-uzi. Evaọ 1991, a kẹ Isẹri Jihova uvẹ ọ odẹ-ufihotọ abọ-uzi evaọ Russia. Anwọ oke yena ze, iruo na i wo ẹvi no evaọ Russia gbe eria nọ egọmeti ọ Soviet Union ọ jọ vẹre na. No March 1996 rite October 1998, Ugboma Esuo na u kuenu kẹ ayare ọ ugho-umomo ọ Egwa Uvie 359 rọkẹ iwou-egha nọ e be rẹrote ekwotọ 11 erọ ofẹ Europe.
3 Nọ who bi rri ifoto nọ e rrọ uko-obeva nana, roro kpahe eware igbunu ilogbo nọ Jihova o ru kẹ ahwo riẹ no. (Ol. 136:4) Eva e te were owhẹ re whọ riẹ nnọ a be rehọ azọhọ okugbe-inievo akpọ-soso na ro ru iruo ziezi, bi dhesẹ oware nọ Jesu ọ ta na, wọhọ epanọ a kere fihọ Jọn 13:35: “Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.”
4 Usu erẹwho Europe nọ i bi wo erere no ọruẹrẹfihotọ obufihọ ebabọ Egwa Uvie ze, evaọ ekwotọ nọ i wo igho te ere he họ Romania, oria nọ a jọ bọ Egwa Uvie 36 no anwọ July 2000 ze. Ẹkwoma obọdẹ omaa ovona nọ a be nya lele rọ bọ enwenọ Egwa Uvie rai kpobi, Ukraine ọ bọ 61 evaọ ukpe ọ 2001 gbe 76 efa evaọ 2002. Avọ obufihọ igho nọ a zọhọ kẹ Ẹkpa-Ugho Ọgwa Uvie na, a bọ Egwa Uvie udhusoi buobu no evaọ Bulgaria, Croatia, Macedonia, Moldova, Russia, gbe Serbia avọ Montenegro.
5 Re a bọ Egwa Uvie evaọ ekwotọ jọ o be hae lọhọ họ, yọ o rẹ gwọlọ omodawọ ulogbo taure ebabọ i te ti ghine muhọ dẹẹ. Ẹsebuobu omaruẹrẹhọ na o rẹ rehọ oke gaga. Ofariẹ re, araha ebabọ Ọgwa Uvie evaọ ofẹ Europe yena o kpehru vi orọ abọ ọfa buobu ọ Africa hayo South America. Dede na, fiki ẹvi ologbo evaọ unu ahwo nọ a be gọ Jihova, a gbẹ gwọlọ Egwa Uvie udhusoi buobu evaọ erẹwho ọ Europe nọ i wo igho te ere he!
6 Ẹvẹ u woma te re a ruẹ ẹvi ọkpakpata otiọye evaọ ebabọ Egwa Uvie nana! Egwa Uvie na i se isẹri obọdẹ no evaọ ikegbe nọ a bọ rai fihọ, wọhọ epanọ eware nọ e via no i dhesẹ. Evaọ eria jọ, ẹzi unevaze nọ a dhesẹ evaọ ẹnya lele ekpọvio ebabọ o were udu-esuo na.
7 Aizaya ọ ruẹaro gbagba kpahe ẹvi nọ ọ rẹ te jọ egagọ uzẹme evaọ oke onana. Ọghẹnẹ ọ rehọ ẹkwoma ọruẹaro na ta nọ: “Mẹ họ ỌNOWO na; me re ti ru ei vẹrẹ nọ u te ezi riẹ.” (Aiz. 60:22) Uzẹme, ikpe-ikpe nọ e vrẹ na o jọ oke Jihova rọkẹ ẹvi evaọ ofẹ Ovatha-Ọre Europe. Jọ Jihova o gbe ku obọdẹ eghale riẹ ku omodawọ mai nọ ma bi ro ru ebabọ Egwa Uvie vẹrẹ evaọ ekwotọ buobu na, nọ ma gbẹ be tha Ẹkpa-Ugho Ọgwa Uvie na uke na! Onana u ti ru nọ a te rọ bọ Egwa Uvie efa buobu evaọ ekwotọ nọ i wo igho te ere he. O te zọhọ fihọ ẹvi ọ egagọ efuafo evaọ abọ Europe buobu gbe isẹri-ise ilogbo nọ a bi ro te “eka avọ eka akpọ na.”—Iruẹru 13:47.
[Pictures on page 3]
Ighẹ Ọgwa Uvie Moscow, Russia
[Pictures on pages 4-6]
Egwa Uvie Ekpokpọ Evaọ Ofẹ Ovatha-Ọre Europe
Strumica, Macedonia
Daruvar, Croatia
Bitola, Macedonia
Sokal, Ubrotọ Lviv, Ukraine
Sofia, Bulgaria
Krasnooktyabrskiy, Maykop Area, Russia
Bački Petrovac, Serbia avọ Montenegro
Plovdiv, Bulgaria
Tlumach, Ubrotọ Ivano-Frankivsk, Ukraine
Rava-Ruska, Ubrotọ Lviv, Ukraine
Stara Pazova, Serbia avọ Montenegro
Zenica, Bosnia gbe Herzegovina
Sokal, Ubrotọ Lviv, Ukraine
Zhydachiv, Ubrotọ L’viv, Ukraine