Eme-Emuhọ I Wuzou
1 Kọ whọ be hae fi eme-emuhọ nọ e rọ omobe na Epanọ A ro Muhọ Jẹ Ruabọhọ Ebaibol E rọ Jiroro hayo enọ e be romavia evaọ ukere ekpokpọ Odibọgba Uvie Mai na h’iruo? Iwhowho-uvie buobu a be n’iyẹrẹ obokparọ ulogbo evaọ odibọgba ọ n’uwou ruọ uwou rai ẹkwoma eroruiruo eme emuhọ enana n’ẹme t’ẹme wọhọ epanọ e rọ obe na. Amọfa a ruẹ no inọ ẹkwoma omoke nọ a rẹ raha viere evaọ omaruẹrẹ kpahe kẹ usiuwoma ota, a sae ruẹrẹ eme emuhọ obọrai họ rono eme iroro-ejẹ nọ e rọ obe na ze.
2 Oware jọ u muẹro, oware na họ otẹrọnọ who wo eme emuhọ ra fihọ iroro taure whọ tẹ te rọ ovuẹ Uvie na nyabru ohwo jọ, who re wo udu viere. Eme ra i ti dhesẹ isiuru oruọzewọ ra re whọ ghale emamọ usi na via. Oma nọ whọ rẹ ruẹrẹ kpahe ziezi u re ru odibọgba ra were-oma viere keme who ti wo emamọ iyẹrẹ. Onọ o mai wuzou họ ma re ru re idhe egagọ mai e jọ onọ o mai woma kpobi nọ ma rẹ sae kẹ.—Hib. 13:15; 1 Pita 2:5.
3 Fikiere rehọ oke rọ ruẹrẹ oma kpahe. Roro kpahe eghẹrẹ ahwo nọ whọ rẹ sae nyaku evaọ ẹkwotọ ra. Eme họ ebẹbẹ gbe ọdawẹ rai? Didi eware nọ e be via i bi kpomahọ izuazọ rai? Nọ who te roro kpahe iyo kẹ enọ enana no, who ve rri eme emuhọ nọ e rọ ẹwẹ-obe avọ 2-7 ọrọ omobe na Epanọ A ro Muhọ Jẹ Ruabọhọ Ebaibol E rọ Jiroro hayo salọ eme emuhọ ọvo hayo bu viere no Odibọgba Uvie Mai ze. Whọ rẹ sai ru inwene evaọ uzedhe eme nọ e rọ obe na re e sai kiehọ owhẹ oma. Owojẹ ofa họ ezizie iwhowho-uvie efa re a lele owhẹ rri eme emuhọ ra evaọ etoke omaruẹrẹhọ. Ẹsejọhọ onana o sae tuduhọ amọfa awọ re a ru eme emuhọ rai woma viere re. Epanọ o rọ kpobi, whọ te ghinẹ hae tuduhọ ohwohwo awọ jẹ bọ ohwohwo ga evaọ emamọ iruo.
4 Oke nọ whọ raha gbe omodawọ nọ who ru rọ ruẹrẹ eme-emuhọ usiuwoma ota ra họ u ti wo osaowha. Who ti wo oghale abọ-owo viere avọ erere evaọ iruo ekokohọ ejaja nọ e r’otọ enẹna.