Oma Okake Ruẹrẹhọ O rẹ Wha Oghọghọ Ze
1 Re ma w’obọ evaọ usiuwoma ota o rẹ wha oghọghọ ulogbo s’omai. (Ol. 89:15, 16) Uzẹme, omaruẹrẹhọ yọ oware nọ o r’oja gaga re a sae reawere ọ oghọghọ na vọvọ. Epanọ ma ruẹrẹ oma họ woma te, ere ma re ru bu te, yọ epanọ ma ru bu te, ere oghọghọ mai o rẹ rro te.
2 Rehọ Ekwakwa Nọ A kẹ na ro Ruiruo: Muọ omaruẹrẹhọ ra họ ẹkwoma ese gbe ẹkiẹriwo eme nọ e rrọ Odibọgba Uvie Mai na. Ẹsibuobu o rẹ kẹ ẹmeọta nọ a ruẹrẹ họ ziezi re u fiobọhọ k’owhẹ riẹ ovuẹ Uvie na vuẹ lọlọhọ jegbe evaọ edhere nọ o re ruiruo ziezi. Who ti duku iriruo ọ epanọ a re ro fi awhaha ẹmeọta buobu kparobọ. A rẹ kẹ ugogo ẹjiroro jọ kpahe epanọ a sai ro ru emamọ izihebro, avọ ute ọ emuhọ uwuhrẹ Ebaibol. Who wo ufuoma nọ who re ro nwene iroro-ejẹ enana lele oghẹrẹ nọ o jẹ mae lọhọ owhẹ obọ ro ruiruo. Fiba onana, who wo omobe ọ Epanọ A ro Muhọ Jẹ Ruabọhọ Ebaibol E rọ Jiroro na, onọ o kẹ oghẹrẹ emuhọ ẹme sa-sa jegbe ẹkpahekẹ ahwo nọ a rẹ whaha ẹmeọta, o vẹ rọ ere fiobọhọ kẹ owhẹ riẹ ru viere evaọ iyero buobu nọ whọ rẹ rẹriẹ ovao dhe na.
3 Rri obe nọ who ti fihọ ada na, re whọ salọ owọ-ẹme isiuru ovo hayo ivẹ nọ whọ sai dhesẹ kẹ ọnọ o wo uwou na. Ẹme usi nọ o rẹ kpare iroro nọ who yo hayo se kpahe o rẹ sai rovie edhere k’owhẹ nọ who re ro mu ẹmeọta họ. Rẹro eme awhaha nọ a rẹ nyaku ẹsikpobi nọ whọ sae te rẹriẹ ovao dhe, re who wo umutho iroro jọ fihọ eva kpahe epanọ whọ te kpahe fihọ kẹ ae. Whọ vẹ rehọ umutho iminiti jọ wuhrẹ oware nọ whọ te ta evaọ unuẹthẹ na.
4 Kpohọ Ewuhrẹ Odibọgba Kpobi: Gaviezọ ziezi evaọ oke ọ Ewuhrẹ Odibọgba na okenọ a be ta kpahe, kiẹ, je ru odhesẹvia ọ iroro-ejẹ nọ e rrọ Odibọgba Uvie Mai na. Muẹrohọ ẹjiroro nọ who roro nọ whọ sai kugbe ẹmeọta ra. Kareghẹhọ iyero jọ nọ whọ nyaku ẹsebuobu no evaọ odibọgba na, je roro kpahe idhere nọ whọ sai ro se-isẹri woma viere. Lele iwhowho-uvie efa ta kpahe eware enana taure ewuhrẹ na o te ti muhọ gbe okenọ o te kuhọ no.
5 O sai mu owhẹ ẹro inọ whọ tẹ “ruẹrẹ [oma] kpahe-kẹ-iruo iwoma kpobi,” a te rehọ oghọghọ gbe obokparọ nọ o mae rro ghale owhẹ evaọ obufihọ kẹ amọfa re a duku edhere uzuazọ na.—2 Tim. 2:21.