Oma Oruẹrẹhọ—Usiavẹ kẹ Obọkparọ

¹ Oma nọ a rẹ kake ruẹrẹhọ kẹ odibọgba na u re fiobọhọ k’omai whaha eho nọ ọ rẹ sae jọ ohwo oma kpahe abọ o wo evaọ usiuwoma ota. Nọ whọ be nya kẹle unuẹthẹ na, whọ rẹ riẹ ẹme nọ whọ gwọlọ ta kẹ enọ i wo iwou na. Udu u re gbe bru owhẹ kpahe eghẹrẹ ebẹbẹ nọ whọ te ruẹ hẹ. Nọ who te no usiuwoma ota ze, udu o rẹ jọ owhẹ kothi, keme whọ riẹ nọ whọ dawo ẹgba ra evaọ odibọgba na. Ẹhẹ, oma oruẹrẹhọ ziezi yọ usiavẹ nọ a re ro ru ona fihọ ewhowho gbe ewuhrẹ mai.

² Pọl o fiẹgba họ oma oruẹrẹhọ nọ ọ rọ kpakpa omai re ma “wha eviẹ ọruẹrẹ kpahọ usiuwoma udhedhẹ họ awọ.” (Ẹf. 6:15) Onana u kugbe udu gbe iroro mai nọ ma rẹ ruẹrẹhọ gbe eriwo owoma gbe uruemu unevaze. Okenọ ma tẹ thoma kpahe re ma ghale uzẹme na kugbe amọfa, a rẹ rehọ ubi Uvie na hwosa iruo mai, ru omai evawere.—Iruẹru 20:35.

³ Oghẹrẹ nọ A rọ Ruẹrẹ oma Kpahe kẹ Iruo Awhowho Na: Ma rẹ salọ uzoẹme nọ u kiehọ omai oma, ẹsejọhọ eva udevie enọ a fodẹ evaọ obe ọ Reasoning na hayo enọ a rẹ ruẹ evaọ ẹwẹ-obe urere ọrọ Odibọgba Uvie Mai na. Nabi roro ikereakere nọ whọ ma nọ who ti ro ruiruo, salọ ẹme hayo uye-eme nọ who ti fiẹgba họ nọ who ti ro ru ugogo ẹme ra vevẹ. O gwọlọ re a se ẹme na fihọ uzou hu; ikpoye, o rẹ mai woma re a wo ẹjiroro rai họ eva, fi ei họ eme obọ ra, re whọ ta ae evaọ edhere nọ who roro nọ u ti si ọnọ ọ be gaviezọ k’owhẹ urru.

⁴ Rri obe nọ whọ ma nọ who ti fihọ ada na, jẹ salọ igogo eme isiuru jọ. Salọ eme jọ nọ who roro nọ i ti wo isiuru kẹ ahwo nọ e rọ ẹkuotọ ra. Roro kpahe oghẹrẹ nọ whọ sai ro nwene odhesẹvia ra kẹ oghoghẹrẹ ahwo nọ e rọ uwou—ọzae, aye, ọkpako, hayo uzoge.

⁵ Kọ whọ daoma rehọ ẹme na ro ru odhesẹvia no? Se ahwo uviuwou hayo iwhowho-uvie efa kugbe re wha ta kpahe idhesẹvia nọ e mai wo ẹgba, wha vẹ wariẹ ta ae via re ahwo kpobi a wo ai họ iroro. Daoma ru ei wọhọ ẹsenọ whọ rọ uzedhe oria hayo avro otiọye na nọ a rẹ nyaku evaọ ẹkuotọ na. Ewuhrẹ otiọye u re ru nọ ẹme ra ọ jẹ jọ vevẹ, fi ẹvi họ ẹgba usiuwoma ota ra, jẹ bọ udu ra ga.

⁶ Fiba oma oruẹrẹhọ ra gbe ewuhrẹ odhesẹvia ra, whọ rẹ jẹ nọ omobọ ra nọ, ‘Kọ ewu nọ mẹ gwọlọ kuhọ u kiehọ odibọgba na? Me wo eware nọ mẹ gwọlọ evaọ ẹkpa ebe mẹ, kugbe ebe nọ mẹ ma nọ me re ro ruiruo? Kọ e rọ kpatiẹ? Me wo obe Reasoning, ebe-vẹvẹ, okerefihotọ nuwou-ruwou, gbe ugbẹ mẹ?’ Oma oruẹrẹhọ u re ru owhẹ wo emamọ ẹdẹ evaọ iruo odibọgba na.

⁷ Nọ ma te ru ẹgba mai kpobi re ma ruẹrẹ oma mai họ no, u fo re ma lẹ kẹ ẹzi Jihova re o fiobọhọ k’omai wo obọkparọ. (1 Jọn 5:14, 15) Ma tẹ rehọ oma kpotọ roro kpahe oma oruẹrẹhọ o rẹ wha ai ze nọ ma te rọ ruẹ oghọghọ ulogbo evaọ iruo mai, nọ ma bi ‘ru iruo mai gbunu na.’—2 Tim. 4:5.