“Wha Rehọ Evawere Ru Iruo kẹ ỌNOWO!”
1 Pọl ukọ na o kere nọ: “Wha hẹ ghọghọ eva Ọnowo na kẹse kẹse, whaọ mẹ jẹ ta nọ, Ghọghọ.” (Fil. 4:4) Uvẹ-ọghọ ọrọ usiuwoma ota gbe obufihọ kẹ ahwo nọ e wọhọ igodẹ re a gọ Jihova yọ ehri oghọghọ ulogbo. (Luk 10:17; Iruẹru 15:3; 1 Tẹs. 2:19) Dede na, kọ otẹrọnọ ma be jọ odibọgba mai ruẹ oghọghọ ẹsejọ họ, eme ma rẹ sai ru?
2 Iruo nọ Ọghẹnẹ O ro Mu: Kareghẹhọ inọ Jihova họ ọnọ o vi omai nnọ ma ta usiuwoma. Ẹhẹ, ẹvẹ ọghọ riẹ ọ rro te re ma jọ ‘ibe iruiruo Ọghẹnẹ’ evaọ ewhowho ovuẹ Uvie na gbe ilele-iruo! (1 Kọr. 3:9) Kristi Jesu ọ rrọ kugbe omai evaọ iruo nana nọ a te wariẹ vievie he na. (Mat. 28:18-20) Ijẹle a wo abọ ologbo evaọ iruo na re, be tha omai uke evaọ ivuẹvu abọ-ẹzi ilogbo nọ e r’otọ na. (Iruẹru 8:26; Evia. 14:6) Ikereakere na gbe eware nọ ahwo Ọghẹnẹ a rọ ẹro ruẹ no e kẹ imuẹro vevẹ inọ Jihova ọ be tha iruo nana uke. Fikiere, nọ ma be ta usiuwoma na, ma bi ru iruo wọhọ ‘enọ Ọghẹnẹ ọ kẹ udu, bi dhesẹ oma via evaọ aro Ọghẹnẹ evaọ usu kugbe Kristi.’ (2 Kọr. 2:17) Ẹvẹ onana o rrọ oware oghọghọ ulogbo te!
3 Re ma ruẹse yọrọ oghọghọ mai evaọ iruo Ọghẹnẹ, olẹ o r’oja. (Gal. 5:22) Nọ o rọnọ ẹkwoma ẹgba Ọghẹnẹ ọvo ma sai ro ru iruo riẹ na, u fo re ma yare iẹe kẹ ẹzi riẹ, onọ ọ rẹ rọ kẹ enọ e yare riẹ ọvọvẹ. (Luk 11:13; 2 Kọr. 4:1, 7; Ẹf. 6:18-20) Ẹlẹ kpahe odibọgba mai u ti fi obọ họ k’omai kru udu ga evaọ okenọ ahwo a jẹ ovuẹ na rehọ ziezi hi. U ti fi obọ họ k’omai ruabọhọ usiuwoma ota avọ aruọwha gbe oghọghọ.—Iruẹru 4:29-31; 5:40-42; 13:50-52.
4 Ruẹrẹ Oma Kpahe Ziezi: Uvi edhere jọ nọ ma re ro ru oghọghọ mai rro evaọ usiuwoma ota na họ ẹkwoma oma nọ ma rẹ ruẹrẹ họ ziezi. (1 Pita 3:15) Omaruẹrẹhọ nana o nwane gwọlọ oke uthethei hi. Iminiti kakao ọvo o rẹ rehọ re a kiẹ idhere usiuwoma ota nọ a jiroro rai kẹ emagazini ekpokpọ hayo ẹmeọta nọ o kiehọ obe nọ whọ gwọlọ fihọ ada. Rọ kẹ emamọ-eme emuhọ, whọ rẹ sai rovie kpohọ omobe ọ Ebaibol E rọ Jiroro na hayo ukere Odibọgba Uvie Mai nọ i kpemu no. Iwhowho Uvie jọ a ruẹ nnọ u re fi obọ họ re a kere edhere-ẹmeọta okpẹkpẹe jọ fihọ obe. N’oke ruọ oke, a re rri obe na re a kareghẹhọ edhere-ẹmeọta na. Onana u bi fi obọ họ kẹ ae whaha udubro jẹ kẹ ae udu nọ a be rọ ta usiuwoma avọ aruọwha.
5 Oghọghọ o rẹ wha irere buobu lele oma. Oma oghọghọ nọ ma re wo o rẹ lẹliẹ ovuẹ mai si ahwo urru. Oghọghọ o rẹ k’omai ẹgba nọ ma re ro thihakọ. (Neh. 8:10; Hib. 12:2) Maero, iruo oghọghọ mai e rẹ kẹ Jihova orro. Fikiere, jọ ma “rehọ evawere ru iruo kẹ ỌNOWO” na.—Ol. 100:2.
[Study Questions]
1. Eme ọ rẹ sae jọ ehri oghọghọ ulogbo kẹ idibo Jihova?
2. Ẹvẹ eroro kpahe ọnọ o vi omai uwou na u re ro fiba oghọghọ mai?
3. Didi abọ olẹ u wo evaọ ẹyọrọ oghọghọ mai evaọ iruo Ọghẹnẹ?
4. Ẹvẹ emamọ omaruẹrẹhọ u re ro fi obọ họ ru oghọghọ mai vi haro evaọ usiuwoma ota, kọ uvi idhere jọ vẹ ma sae rọ ruẹrẹ oma kpahe?
5. Oghẹrẹ vẹ oghọghọ o rẹ rọ k’omai gbe amọfa erere?