Lẹ kẹ Obufihọ Jihova
1 Jesu o fi isiuru ọ ẹgwọlọ eghale Jihova evaọ odibogba rai họ ilele riẹ oma. (Mat. 9:37, 38) Elẹ ajiri gbe uyere nọ i re n’udu ze kugbe ayare avọ elẹ-ayare egaga mai i re dhesẹ evaifihọ evọvọ mai kpahe obufihọ Jihova. (Fil. 4:6, 7) Ikereakere na e tuduhọ omai awọ nnọ ma ruabọhọ “olẹ kpobi gbe olẹ-ayare,” yọ onana u re kugbe elẹ mai kpahe odibọgba na.—Ẹf. 6:18.
2 Ma re jiri Jihova evaọ olẹ fiki ekwakwa-oma riẹ gbe eware nọ o ru nọ i wo ibe he. Ma re je jiri ei wọhọ Ọkokẹ emamọ usi nọ ma be vuẹ na. O fo kẹ ujiro mai keme ọye ọvo o re ru odibọgba mai kparobọ.—Ol. 127:1.
3 Elẹ uyere mai i re dhesẹ ovuhumuo mai kẹ otoriẹ nọ Jihova ọ kẹ omai no kpahe oreva gbe ẹjiroro riẹ na. Kọ o gbẹ rrọ uvẹ-ọghọ re ma w’obọ evaọ ẹghale izẹme Uvie na kugbe amọfa? Ma yere Jihova rọkẹ eware kpobi nọ ma sai rugba no evaọ odibọgba na.—Ol. 107:8; Ẹf. 5:20.
4 Nwani fo gaga na, ma rẹ yare Jihova kẹ obufihọ evaọ eduku ahwo nọ a rẹ jẹ obe uwuhrẹ Ebaibol nọ ma be kẹ ae na rehọ, jẹ yare obufihọ evaọ uzẹme na nọ ma rẹ rọ nyate idu rai. Ẹkwoma ayare otiọye na, ma bi dhesẹ nnọ Ọghẹnẹ ọvo ọ rẹ sai ru iruo mai evaọ odibọgba na wo ẹvi.—1 Kọr. 3:5-7.
5 Oniọvo-ọmọtẹ jọ o roro nọ aye jọ nọ ọ rrọ ejẹ emagazini riẹ ọ be hai se Uwou-Eroro Na gbe Awake! na ha. Fikinọ ọ gwọlọ nọ emagazini eghaghae enana e raha kufiẹ hẹ, oniọvo na ọ tẹ yare Jihova nnọ otẹrọnọ aye na o bi se ai hi, jọ ọ se ae ba ẹrehọ. Okenọ oniọvo na ọ wariẹ weze nya, ọzae ọ aye na ọ tẹ ta nnọ: “Uyere u t’owhẹ rọkẹ emagazini enana nọ whọ be hae rọze ẹsikpobi na. Mẹ be hai se ai yọ e were omẹ gaga.”
6 Avọ ayare omurokpotọ gbe osegboja, ma rẹ sae lẹ Jihova re o fiobọhọ k’omai yeri kugbe ababọ-osegboja gbe ẹkoko ahwo je fi ozọ ohwo-akpọ kparobọ re ma ruẹsi se-isẹri aruọwha kẹ amọfa. (Iruẹru 4:31) Otẹrọnọ ma ruabọhọ “olẹ kpobi gbe olẹ-ayare” nọ ma be rehọ ẹmeoyo ru iruo efuafo mai na, ma rẹ sai wo udufihọ obufihọ Jihova.—1 Jọn 3:22.