Ru Epanọ Olẹ Ra U re ro Woma Vi Epaọ Ọsosuọ

1. Eme Jihova ọ gwọlọ nọ ahwo nọ a be gọe a re ru? (Rri uwoho na re.)

ONO ma rẹ sai bo bru re o fiobọhọ kẹ omai riẹ oware nọ ma re ru, hayo re ọ tuduhọ omai awọ? Jihova ma re bo bru. Ọ gwọlọ nọ ma hae lẹ sei. Oyejabọ nọ Ebaibol ọ rọ ta nọ ma “hae lẹ kẹse kẹse.” (1 Tẹs. 5:17) Oke kpobi nọ ma lẹ sei inọ o fiobọhọ kẹ omai evaọ oware kpobi nọ ma gwọlọ ru, o re fiobọhọ kẹ omai. (Itẹ 3:5, 6) Jihova o wou wo umuo ho. Fikiere ọ vuẹ omai hi inọ, ‘Wha tẹ lẹ se omẹ te unuẹse utionana no, wha gbẹ lẹ se omẹ hẹ.’

2. Eme ma te ta kpahe evaọ uzoẹme nana?

² Eva e were omai gaga inọ Jihova ọ kẹ omai uvẹ nọ ma lẹ sei. Rekọ fiki ikpokrokpokro akpọ, ẹsejọ ma re wo uvẹ nọ ma rẹ rọ lẹ hẹ. Yọ ma sai je muẹrohọ nọ ma be hae ruẹ emamọ ẹme ta ha nọ ma tẹ be lẹ. Rekọ ma te rri Ebaibol, ma te ruẹ oware nọ u ti fiobọhọ kẹ omai. Ma te jọ uzoẹme nana ta kpahe epanọ ma sae rọ rehọ aro kele Jesu ru uvẹ fihọ nọ ma rẹ rọ lẹ. Ma te jẹ ta kpahe eware isoi jọ nọ i wuzou gaga nọ ma rẹ sae lẹ kpahe, re elẹ mai i woma vi epaọ ọsosuọ.

JESU Ọ JẸ HAI RU UVẸ FIHỌ NỌ Ọ RẸ RỌ LẸ

3. Eme Jesu ọ riẹ kpahe olẹ?

³ Jesu ọ riẹ nọ eva e rẹ were Jihova gaga nọ ma tẹ be hae lẹ sei. Taure ọ tẹ te ziọ otọakpọ, ọ jẹ hae ruẹ epanọ Ọsẹ riẹ o bi ro yo olẹ idibo riẹ. Wọhọ oriruo, oke nọ Jihova o yo olẹ Hana, Devidi, Elaejah, gbe idibo riẹ efa, Jesu ọ jọ kugbei. (1 Sam. 1:10, 11, 20; 1 Iv. 19:4-6; Ol. 32:5) Oyejabọ nọ Jesu o ro wuhrẹ ilele riẹ nọ jọ a hae lẹ ẹsikpobi, a vẹ jẹ rọwo nọ Ọghẹnẹ o ti yo olẹ rai.—Mat. 7:7-11.

4. Eme o dhesẹ nọ Jesu ọ rọ olẹ zaro ho?

⁴ Jesu ọ jẹ hae lẹ se Jihova ẹsikpobi, yọ ọ gwọlọ nọ ilele riẹ a rẹ rọ aro kele iei. Jesu ọ jẹ hai wo uvẹ tere he, yọ ahwo a jẹ hai no akotọ riẹ hẹ. Ghele na, ọ jẹ hai ru uvẹ fihọ nọ ọ rẹ rọ lẹ. (Mak 6:31, 45, 46) Ọ rẹ kpama ohiohiẹ gaga, o ve kpohọ oria nọ u siomano nyae lẹ. (Mak 1:35) Ebaibol ọ ta kpahe oke jọ nọ Jesu ọ rọ lẹ asohẹrioke re Ọghẹnẹ o fiobọhọ kẹe, ọ vẹ sai ru oware jọ nọ u wuzou gaga. (Luk 6:12, 13) Yọ evaọ aso ẹdẹ nọ a ro mu Jesu taure a te ti kpei, ọ jẹ lẹ gaga. O ru ere keme edawọ nọ i bi ti tei e ga vi efa kpobi nọ i te rie no, yọ o roja nọ o re kru ẹrọwọ riẹ re ọ sai ru oware nọ Ọghẹnẹ o vi rie ze ti ru.—Mat. 26:39, 42, 44.

5. Ẹvẹ ma sae rọ rehọ aro kele Jesu evaọ ẹme olẹ?

⁵ Ẹvẹ ma sae rọ rehọ aro kele Jesu? Ma rẹ daoma ru uvẹ fihọ nọ ma rẹ hae rọ lẹ, o tẹ make rọnọ eware e vọ omai obọ nọ ma bi ru. O sae jọ nọ ohiohiẹ gaga ma fihọ nọ ma rẹ rọ lẹ, hayo uzou obọ owọwọ. Ma tẹ be hae lẹ, yọ ma be vuẹ Jihova nọ olẹ o were omai gaga. Oniọvo-ọmọtẹ jọ nọ a re se Lynne ọ ta kpahe epanọ eva e were riẹ te oke ọsosuọ nọ ọ rọ riẹ nọ ọ sae lẹ se Jihova oke kpobi. Ọ ta nọ: “Nọ mẹ jọ Ebaibol wuhrẹ nọ mẹ sae lẹ se Jihova oke kpobi, eva e were omẹ. O lẹliẹ omẹ rri nọ Jihova yọ Ogbẹnyusu ọkpekpe mẹ. Fikiere mẹ tẹ gwọlọ nọ me re ru epanọ olẹ mẹ o re ro woma vi epaọ ọsosuọ.” Ma riẹ nọ ere mai ibuobu ma rri olẹ re. Obọnana joma ta kpahe eware isoi jọ nọ e roja gaga nọ ma rẹ sae lẹ kpahe.

EWARE ISOI JỌ NỌ I WUZOU NỌ WHỌ RẸ SAE LẸ KPAHE

6. Eme obe Eviavia 4:10, 11 o ta nọ a rẹ kẹ Jihova fikinọ o gine te?

⁶ Ujiro nọ ma rẹ kẹ Jihova. Jọn ukọ na ọ ruẹ eruẹaruẹ jọ nọ i re mu urirẹ. Ọ ruẹ ekpako udhegbene evaọ obọ odhiwu nọ a bi guzou kpotọ kẹ Jihova yọ a bi jiri iei. A tẹ jẹ ta nọ Jihova o te ọnọ a rẹ kẹ “oruaro na gbe ọghọ na gbe ogaga na.” (Se Eviavia 4:10, 11.) U te no ekpako udhegbene na no, ikọ-odhiwu a be rọ ẹro ruẹ eware buobu nọ e rẹ lẹliẹ ae jiri Jihova re. Ae nọ a rrọ obọ odhiwu kugbe Jihova na, a riẹ Jihova gaga. A be hae ruẹ oghẹrẹ nọ Jihova o re ru eware, o tẹ be lẹliẹ ae riẹ oghẹrẹ uruemu nọ o wo. Enana kpobi o be lẹliẹ ae jiri Jihova.—Job 38:4-7.

7. Eware jọ vẹ ma rẹ rọ fiki rai jiri Jihova?

⁷ U fo nọ ma tẹ be lẹ se Jihova, ma rẹ hai jiri iei re. Ma re roro kpahe obọdẹ uruemu jọ nọ o wo nọ o were omai gaga, ma vẹ rọ fiki riẹ jiri iei. Who te bi se Ebaibol, hae romatotọ muẹrohọ obọdẹ uruemu nọ Jihova o wo nọ ọ were owhẹ gaga. (Job 37:23; Rom 11:33) Nọ whọ jẹ be lẹ se Jihova, who ve jiri iei fiki emamọ uruemu riẹ yena. Ma sai je jiri Jihova rọkẹ obọ nọ o bi fihọ kẹ omai gbe inievo ukoko na. Ọghẹnẹ ọ rẹ wezẹ hẹ. Ẹsikpobi ọ be sẹro mai.—1 Sam. 1:27; 2:1, 2.

8. Eware jọ vẹ ma rẹ rọ fiki rai yere Jihova? (1 Ahwo Tẹsalonika 5:18)

⁸ Uyere nọ ma rẹ kẹ Jihova. Eware buobu e riẹ nọ ma rẹ rọ fiki rai yere Jihova nọ ma tẹ be lẹ sei. (Se 1 Ahwo Tẹsalonika 5:18.) Ma re yere Jihova rọkẹ eware iwoma kpobi nọ ma wo keme obọ riẹ aikpobi na i no ze. (Jem. 1:17) Ma re yere Jihova rọkẹ otọakpọ owowoma nana nọ ọ ma kẹ omai na. Ma ve je yere iei rọkẹ eware efa nọ ọ ma keme emama riẹ i gbunu gaga. Ma re je yere Jihova fiki epanọ ọ be rọ sẹro uzuazọ mai, ahwo uviuwou mai, egbẹnyusu mai gbe fiki ẹruore nọ ma wo. Yọ ma re yere iei rọkẹ epanọ o ro ru re ma jọ egbẹnyusu riẹ.

9. Fikieme o rọ roja re ma hai roro kpahe eware nọ Jihova o ru kẹ omai no je yere iei?

⁹ Ẹsejọ u fo re ma romatotọ roro kpahe emamọ eware nọ Jihova o ru kẹ omai no. Ma rẹ daoma ru ere keme ahwo buobu a riẹ ọghọ họ evaọ akpọ nọ ma rrọ nẹnẹ na. Ohwo o te ru oware kẹ ae, re a yere ohwo na họ oware nọ o rẹ mae jarae oja ha, rekọ epanọ a re gbe ro ru eware efa kẹ ae ọvo. Ma te wo uruemu yena, elẹ mai kpobi i ve ti zihe ruọ erọ ‘kẹ omẹ, kẹ omẹ’ ọvo. Ma gwọlọ nọ elẹ mai e jọ ere he. Fikiere joma hai roro kpahe eware nọ Jihova o ru kẹ omai no, ma ve je yere iei.—Luk 6:45.

10. Ẹvẹ uyere nọ oniọvo jọ ọ jẹ hai yere Jihova u ro fiobọhọ kẹe thihakọ ẹbẹbẹ jọ? (Rri uwoho na re.)

¹⁰ Ma tẹ be hai yere Jihova rọkẹ eware nọ o ru kẹ omai, u re fiobọhọ kẹ omai thihakọ ebẹbẹ. Joma ta kpahe oniọvo jọ nọ a re se Kyung-sook. Iku riẹ e rrọ Uwou-Eroro Ọvo 15, 2015. Edọktọ ọ vuẹ riẹ nọ o wo ẹyao ekansa evaọ irue riẹ, yọ ẹyao na o kri rie oma no. Oniọvo na ọ ta nọ: “Oware na o kẹ omẹ uye gaga. Udu u je bru omẹ gaga keme me rri nọ akpọ mẹ o re no.” Kọ eme o fiobọhọ kẹ oniọvo na? Ọ ta nọ, kaso kaso taure o te ti kiẹzẹ, o re kpobọ ehru uwou riẹ, ọ vẹ lẹ se Jihova, yọ ọ jẹ hae lẹ do via. O re yere Jihova rọkẹ eware isoi jọ nọ o ru kẹe evaọ ẹdẹ yena. Ere nọ ọ jẹ hai ru na o jẹ hae lẹliẹ udu tei otọ, jẹ lẹliẹe vuẹ Jihova nọ o you rie gaga. Jihova o fiobọhọ kẹ oniọvo na wọhọ epanọ ọ be hai ru kẹ idibo riẹ efa nọ ebẹbẹ i te te ai na. Oniọvo na ọ ruẹ nọ, ebẹbẹ i te te omai, ma te muẹrohotọ ziezi, ma rẹ ruẹ nọ eware nọ Jihova o bi ru kẹ omai i tube bu vi ebẹbẹ na. Mai omamai, u wo eware buobu nọ Jihova o bi ru kẹ omai nọ ma rẹ rọ fiki riẹ yere iei ghele o tẹ make rọnọ ebẹbẹ i bi te omai. Ma tẹ be hai yere iei, o te lẹliẹ omai thihakọ yọ udu u ti te omai otọ.

11. Eme o via nọ u dhesẹ nọ ilele Jesu a re wo udu re a sae ta usi uwoma na?

¹¹ Olẹ nọ ma rẹ lẹ se Jihova re o fiobọhọ kẹ omai wo udu nọ ma rẹ rọ ta usi uwoma. Taure Jesu o te ti zihe kpobọ odhiwu, ọ vuẹ ilele riẹ nọ a ti se isẹri kpahe iẹe “evaọ Jerusalẹm, evaọ Judia soso gbe Sameria, je rite oria nọ o mai thabọ evaọ otọakpọ na.” (Iruẹru 1:8; Luk 24:46-48) Nọ Jesu o zihe kpobọ odhiwu no, u kri hi, isu ahwo Ju a te mu Pita avọ Jọn, a tẹ rehọ ae bru ogbẹgwae Sanhẹdrin. A tẹ vuẹ amọ Pita nọ jọ a gbẹ ta usi uwoma ha, inọ a tẹ gbẹ dawo iẹe, a ti ru ai gaga. (Iruẹru 4:18, 21) Kọ eme Pita avọ Jọn a ta kẹ ae?

12. Eme obe Iruẹru Ikọ 4:29, 31 o ta nọ ilele na a ru?

¹² Pita avọ Jọn a ta kẹ isu ahwo Ju na nọ: “Sọ u kiehọ evaọ aro Ọghẹnẹ re ma gaviezọ kẹ owhai viukpọ Ọghẹnẹ, wha bruoziẹ na kẹ omarai. Rekọ rọkẹ omai, ma rẹ sae siọ ẹme ba ẹta kpahe eware nọ ma ruẹ je yo ho.” (Iruẹru 4:19, 20) Nọ a siobọno Pita avọ Jọn no, ilele na a te kuomagbe, a tẹ lẹ re Jihova o fiobọhọ kẹ ae sai ru iruo nọ ọ kẹ rai. A lẹ sei nọ: “Kẹ idibo ra aruọwha nọ a rẹ rọ ruabọhọ ta ẹme ra ududu.” Olẹ na o no rai udu ze, yọ Jihova o yo olẹ rai.—Se Iruẹru Ikọ 4:29, 31.

13. Eme ma jọ iku Brọda Jin-hyuk na wuhrẹ?

¹³ Nọ egọmeti ọ tẹ ta nọ ma gbẹ ta usi uwoma ha, ma rẹ gbẹ ta usi uwoma na ghele wọhọ epanọ ilele Jesu a ru. Oke jọ o jariẹ nọ a ro fi oniọvo nọ a re se Jin-hyuk họ uwou-odi fikinọ ọ rọwo kuomagbe isoja ha. Nọ ọ jọ uwou-odi na, a tẹ vuẹe nọ jọ ọ hae rẹrote ahwo jọ nọ a fihọ uwou-odi rai sa. Rekọ a vuẹ riẹ nọ, ẹme nọ o wobọ kugbe iruo nọ a kẹ riẹ na ọvo o re lele ahwo na ta, ọ rẹ ta ẹme kpahe oware ofa ha, makọ ẹme Ebaibol dede. Oniọvo na ọ tẹ lẹ se Jihova re o fiobọhọ kẹe wo udu gbe areghẹ nọ ọ sae rọ ta usi uwoma ghele nọ uvẹ u te rovie. (Iruẹru 5:29) Ọ ta nọ: “Jihova o yo olẹ mẹ. O fiobọhọ kẹ omẹ wo udu gbe areghẹ. U te ru nọ mẹ jẹ sae rọ ta usi uwoma kẹ ahwo na je mu ai Ebaibol họ ewuhrẹ evaọ unuẹthẹ uwou-odi rai, o tẹ make rọnọ iminiti isoi ọvo dede. Evaọ aso, me re kere ileta nọ me ti ro se ahwo nọ mẹ ta usi uwoma kẹ na evaọ okiokiọ riẹ.” Ma riẹ nọ Jihova ọ sai fiobọhọ kẹ omai re ma ta usi uwoma na wọhọ epanọ o fiobọhọ kẹ oniọvo na. Ma rẹ sae lẹ se Jihova re o fiobọhọ kẹ omai wo udu gbe areghẹ wọhọ epanọ Jin-hyuk o ru na.

14. Nọ ebẹbẹ i te te omai, eme o rẹ sai fiobọhọ kẹ omai? (Olezi 37:3, 5)

¹⁴ Lẹ se Jihova re o fiobọhọ kẹ owhẹ thihakọ ebẹbẹ. Ebẹbẹ buobu i bi te omai. Ejọ ẹyao, ejọ ahwo mai nọ a whu ku omai. O sae jọ ọwọsuọ, ẹbẹbẹ uviuwou, hayo oghẹrẹ ẹbẹbẹ ọfa jọ. Eyao nọ i bi vo e sae jẹ romavia. Hayo o sae jọ nọ a bi fi ẹmo evaọ oria nọ ma rrọ, o vẹ lẹliẹ eware jẹ ga kẹ omai vi epanọ e rrọ vẹre. O tẹ rrọ ere, lẹ se Jihova, jẹ ta eva ra kpobi kẹe. Vuẹe epanọ eware e rrọ kẹ owhẹ wọhọ epanọ whọ rẹ vuẹ ogbẹnyusu ọkpekpe ra oware nọ o be kẹ owhẹ uye na. Whọ vẹ jẹ rọwo nọ Jihova “o ti fiobọhọ kẹ owhẹ.”—Se Olezi 37:3, 5.

15. Ẹvẹ olẹ o sai ro fiobọhọ kẹ omai “thihakọ evaọ otọ uye”? Kẹ oriruo.

¹⁵ Ma tẹ be hae lẹ se Jihova ẹsikpobi, o ti fiobọhọ kẹ omai “thihakọ evaọ otọ uye.” (Rom 12:12) Jihova ọ riẹ ebẹbẹ nọ i bi te idibo riẹ, yọ “o re yo ubo rai rọkẹ obufihọ.” (Ol. 145:18, 19) Sista Kristie nọ ọ rrọ ikpe udhegbizii nọ ọ rrọ ọkobaro ọ ruẹ nọ Jihova ọ ginẹ riẹ ebẹbẹ nọ i bi te omai. Oke jọ o jariẹ nọ ọ jẹ rọ mọ oghẹrẹ eyao egaga jọ. O tẹ whae ze nọ ọ jẹ hae rọ jọ ọkọkora gaga. Uwhremu na, oni riẹ o te wo ẹyao jọ nọ ọ rẹ sai si uwhu kpe ohwo. Sista Kristie ọ ta nọ: “Kẹdẹ kẹdẹ mẹ jẹ hae lẹ se Jihova re o fiobọhọ kẹ omẹ sai kru udu ga. Mẹ jẹ hai ru eware nọ i re si omẹ kẹle Jihova. Mẹ jẹ hai kpohọ ewuhrẹ je ru ewuhrẹ omobọ mẹ.” Ọ ta re nọ: “Olẹ u fiobọhọ kẹ omẹ gaga evaọ oke yena. Mẹ riẹ nọ Jihova ọ rrọ kugbe omẹ, yọ onana o jẹ hae ginẹ lẹliẹ oma sasa omẹ. Dede nọ ẹyao mẹ ọ nwani kpo okioke yena ha, mẹ ruẹ nọ Jihova o yo olẹ mẹ keme ọ jẹ hai ru udu te omẹ otọ.” Joma hae kareghẹhọ nọ “Jihova ọ riẹ epanọ o re ro siwi ahwo nọ a romakẹ Ọghẹnẹ no odawọ.”—2 Pita 2:9.

16. Fikieme u ro fo re ma hae lẹ nọ jọ Jihova o fiobọhọ kẹ omai siọ oware uyoma ba eru?

¹⁶ Hae lẹ nọ jọ Jihova o fiobọhọ kẹ owhẹ whaha oware uyoma. Mai ahwo-akpọ ma gba ha. Fikiere oma mai na o rẹ gwọlọ wọ omai nyai ru oware uyoma. Setan omariẹ o bi ru epa kpobi nọ ma re ro ru oware nọ o rẹ dha Ọghẹnẹ eva. Oware jọ nọ o bi ru họ, ọ be rehọ ifimu gbe ebe nọ a bi kere rọ gwọlọ ru re ma roro eware iyoma evaọ udu mai. Ma tẹ be hai rri oghẹrẹ ifimu itieye na je se ebe itieye na, o sae lẹliẹ eware nọ Jihova o mukpahe si omai urru. O vẹ te lẹliẹ omai raha uzi Ọghẹnẹ.—Mak 7:21-23; Jem. 1:14, 15.

17. Ma tẹ lẹ se Jihova nọ o fiobọhọ kẹ omai whaha oware uyoma, eme ma rẹ daoma ru? (Rri uwoho na re.)

¹⁷ Re ma siọ oware nọ o rẹ dha Jihova eva ba eru, ma rẹ lẹ sei re o fiobọhọ kẹ omai. Jesu ọ ta kpahe oware utioye na oke nọ o je wuhrẹ ilele riẹ epanọ a rẹ lẹ. O wuhrẹ i rai nọ jọ a lẹ nọ: “Who su omai ruọ odawọ họ, rekọ siwi omai no obọ omuomu na.” (Mat. 6:13) Dede nọ Jihova ọ gwọlọ fiobọhọ kẹ omai, ma rẹ lẹ sei ghele inọ jọ o fiobọhọ kẹ omai. Yọ ma tẹ lẹ no, ma rẹ daoma ru oware nọ u fo. Ma rẹ kẹnoma kẹ ifimu gbe ebe nọ a be jọ ta kpahe eware nọ e rẹ dha Jihova eva. Eware itieye na e da akpọ omuomu nana fia. (Ol. 97:10) Joma hai roro kpahe eware nọ e rẹ were Ọghẹnẹ. Oware nọ u re fiobọhọ kẹ omai ru ere họ, ma rẹ hae romatotọ se Ebaibol. Ma tẹ be hai kpohọ ewuhrẹ gbe usi uwoma, o te lẹliẹ omai roro kpahe eware iwoma re. Ma te bi ru ere, Jihova ọ ta nọ o ti fiobọhọ kẹ omai. Ọ te kuvẹ re odawọ nọ ọ rro vi omai o te omai hi.—1 Kọr. 10:12, 13.

18. Eme u fo nọ mai kpobi ma rẹ hai ru?

¹⁸ U fo nọ mai kpobi ma rẹ hae lẹ se Jihova re o fiobọhọ kẹ omai kru ẹrọwọ mai keme ebẹbẹ buobu i bi te omai evaọ edẹ urere nana. Fikiere hai ru uvẹ fihọ nọ whọ rẹ rọ lẹ no udu ze kẹdẹ kẹdẹ. Jihova ọ gwọlọ nọ ma lẹ sei jẹ ‘ta eva mai kpobi kẹe.’ (Ol. 62:8) Hai jiri Jihova je yere iei rọkẹ eware nọ o bi ru kẹ owhẹ. Hae lẹ sei re o fiobọhọ kẹ owhẹ wo udu nọ whọ rẹ rọ ta usi uwoma. Lẹ sei nọ jọ o fiobọhọ kẹ owhẹ thihakọ ebẹbẹ nọ i bi te owhẹ, o ve je fiobọhọ kẹ owhẹ re whọ siọ oware uyoma ba eru. Whọ kuvẹ re ohwo jọ hayo oware jọ o whae ze nọ whọ gbẹ rọ lẹ se Jihova ẹsikpobi hi hi. Kọ ma tẹ lẹ se Jihova no, ọ be hai yo olẹ mai? Ẹvẹ ọ be hai ro ru ei? Ma te kẹ uyo onọ yena nọ o roja gaga na evaọ uzoẹme notha.